ଜଗତସିଂହପୁର ବିଜେଡିରେ ତିନି ନେତା ମୁହାଁମୁହିଁ ! ବିଷ୍ଣୁ ଦାସଙ୍କୁ ସନ୍ୟାସ ନେବା ପାଇଁ ପରାମର୍ଶ ଦେଲେ ବିଧାୟିକା ରାଜଶ୍ରୀ, ଦାମ ମାରିଲେ ବାଣ ।
କନକ ବ୍ୟୁରୋ : ରୋଚକ ମୋଡ଼ ନେଉଛି ଜଗତସିଂହପୁର ବିଜେଡି ରାଜନୀତି । ଗୋଟିଏ ପଟେ ବିଜେଡି ଜିଲ୍ଲା ସଭାପତି ବିଷ୍ଣୁ ଦାସ, ଅନ୍ୟପଟେ ଜିଲ୍ଲା ମହିଳା ସଭାନେତ୍ରୀ ରାଜଶ୍ରୀ ମଲ୍ଲିକ । ଦଳ ବାହାରର କିଛି ନେତାଙ୍କୁ ବ୍ଲକ୍ ଓ ପୌରାଂଚଳରେ ଦଳୀୟ ପଦପଦବୀ ଦେବାକୁ ନେଇ ରାଜଶ୍ରୀ ମଲ୍ଲିକଙ୍କୁ ଟାର୍ଗେଟ୍ କରିଛନ୍ତି ବିଷ୍ଣୁ ଦାସ । ଜବାବରେ ରାଜଶ୍ରୀ କହିଛନ୍ତି, ବିଷ୍ଣୁ ଦାସ ରାଜନୀତିରୁ ସନ୍ୟାସ ନେଇଯିବା କଥା । ଏପଟେ ରାଜଶ୍ରୀଙ୍କ ସୁରରେ ତାଳ ମିଶାଇ ଜିଲ୍ଲାର ବିଜେଡି ନେତା ଦାମୋଦର ରାଉତ କହିଛନ୍ତି, ଲୋକେ ବିଷ୍ଣୁଙ୍କୁ ରାଜନୀତିରୁ ସନ୍ୟାସ ଦେଇ ସାରିଲେଣି ।
Kanak News is now on WhatsApp
Join and get latest news updates delivered to you via WhatsApp
ଜଗତସିଂହପୁର ବିଜେଡି ରାଜନୀତିର ଗୋଷ୍ଠୀ ବିବାଦ ଏବେ ଏତେ ତୀବ୍ର ହୋଇଛି ଯେ, ଜିଲ୍ଲା ବିଜେଡି ଜିଲ୍ଲା ସଭାପତି ବିଷ୍ଣୁ ଦାସଙ୍କୁ ରାଜନୀତିରୁ ସନ୍ୟାସ ନେଇଯିବାକୁ ପରାମର୍ଶ ଦେଉଛି ଜିଲ୍ଲା ବିଜେଡି ସଭାନେତ୍ରୀ ଡକ୍ଟର ରାଜଶ୍ରୀ ମଲ୍ଲିକ । ଆଉ ରାଜଶ୍ରୀଙ୍କ ସୁରରେ ତାଳ ମିଶାଇ ଜିଲ୍ଲାର ବିଜେଡି ନେତା ଦାମୋଦର ରାଉତ କହିଛନ୍ତି, ଲୋକେ ବିଷ୍ଣୁଙ୍କୁ ରାଜନୀତିରୁ ସନ୍ୟାସ ଦେଇ ସାରିଲେଣି । ତାଙ୍କ ଭଳି ନେତା ରାଜନୀତିରେ ରହିବା ଉଚିତ ନୁହେଁ ।
ରାଜଶ୍ରୀ ମଲ୍ଲିକ ଏବଂ ବିଷ୍ଣୁ ଦାସଙ୍କ ମଧ୍ୟରେ ବିବାଦର ମୂଳ ମଂଜି ହେଉଛି, ଦଳ ବାହାରେ ଥିବା କିଛି ମହିଳା ନେତ୍ରୀଙ୍କୁ ବିଜେଡିରେ ସାମିଲ କରିବା ସହ ଦଳର ବହୁ ଗୁରୁତ୍ୱପୂର୍ଣ୍ଣ ପଦପଦବୀରେ ରଖିଛନ୍ତି ଜିଲ୍ଲା ମହିଳା ସଭାନେତ୍ରୀ ରାଜଶ୍ରୀ ମଲ୍ଲିକ୍ । ଯାହାର ଏକ ବଡ ପ୍ରତିକ୍ରିୟା ଦେଖିବାକୁ ମିଳିଥିଲା, ବିଷ୍ଣୁ ଦାସଙ୍କ ଅଧ୍ୟକ୍ଷତାରେ ବସିଥିବା ପଂଚାୟତ ପ୍ରତିନିଧିଙ୍କ ସମ୍ମିଳନୀରେ । ଆଉ ଏହି ନିଯୁକ୍ତିକୁ ବିରୋଧ କରିଛନ୍ତି ଜିଲ୍ଲା ସଭାପତି ବିଷ୍ଣୁ ଦାସ ।
ଜଗତସିଂହପୁର ଜିଲ୍ଲା ବିଜେଡି ସଭାପତିଙ୍କ ଅଧ୍ୟକ୍ଷତାରେ ବସିଥିବା ଏହି ବୈଠକରେ ଦଳୀୟ ସଂଗଠନ ନେଇ ଯେତିକି ଆଲୋଚନା ହୋଇନଥିଲା, ତାଠୁ ଅଧିକ ଚର୍ଚ୍ଚା ହୋଇଥିଲା ତିର୍ତ୍ତୋଲ ବିଧାୟିକା ରାଜଶ୍ରୀ ମଲ୍ଲିକ ଏବଂ ପାରାଦୀପ ବିଧାୟକ ଦାମ ରାଉତଙ୍କ ସଂପର୍କରେ । ଯାହା ଫଳରେ ତିନି ନେତାଙ୍କୁ ନେଇ ଜଗତସିଂହପୁର ବିଜେଡି ରାଜନୀତି ବେଶ ସରଗରମ ହୋଇଛି ।