ବଡଦାଣ୍ଡ: ଉଚ୍ଛେଦ ପୂର୍ବରୁ ଥିଲା କେମିତି, ଏବେ ଦିଶୁଛିି କେମିତି ?

974

କନକ ବ୍ୟୁରୋ: ବଦଳୁଛି ପୁରୀର ଭୁଗୋଳ, ବଦଳୁଛି ବଡଦାଣ୍ଡର ଇତିହାସ । ଗତ ସପ୍ତାହେ ହେବ ଶ୍ରୀକ୍ଷେତ୍ରରେ ଭଙ୍ଗା ଚାଲିଛି ଦୀର୍ଘ ଦିନର ମଠ ମନ୍ଦିର । ଦଶନ୍ଧି ଦଶନ୍ଧି ଧରି ମନ୍ଦିର ଚାରିପାଖେ ରହିଥିବା ମଠ ଓ ଦୋକାନରେ ଚାଲୁଛି ବୁଲଡୋଜର । ଆଉ ଏତିକି ବେଳେ ବଡଦାଣ୍ଡରେ ଦିଶୁଛି ଦୁଇଟି ଚିତ୍ର, ବ୍ୟସ୍ତତା ଓ ବ୍ୟାକୁଳତାର ଚିତ୍ର । ଆଖି ଆଗରେ ଆବିର୍ଭାବ ହେଉଛି ଅତୀତର ବଡଦାଣ୍ଡ ଆଉ ବର୍ତ୍ତମାନର ବଡଦାଣ୍ଡର ଦୃଶ୍ୟ ।

ଦୁଇ ଦିନ ତଳେ ଶ୍ରୀମନ୍ଦିର ସାମ୍ନାରେ ଯେଉଁ ମଠ ଛିଡା ହୋଇଥିଲା ଆଜି ସେ ମଠ ମାଟିରେ ମିଶିଛି । ମଠର ସିମେଣ୍ଟ କାନ୍ଥରେ ଯେଉଁ ପୁରୁଣା ଦିନର ସ୍ମୃତି, ପୁରୁଣା ଦିନର କଥା ସବୁ ଟଙ୍ଗା ଯାଇଥିଲା ତାହା ବି ବୁଲଡୋଜର ମାଡରେ ବିକ୍ଷିପ୍ତ ହୋଇ ପଡିଛି । ଲଙ୍ଗୁଳି ମଠ ଭାଙ୍ଗିଛି, ଏମଆର ମଠ ଭାଙ୍ଗିଛି ଆଉ ମାଟିରେ ମିଶିଛି ମେଘନାଦ ଚାରିପାଖେ ଗଢି ଉଠିଥିବା ଛୋଟଛୋଟ ଦୋକାନ ବଜାର ।
ତେବେ ବଡଦାଣ୍ଡରେ ଦୀର୍ଘ ଦିନ ହେବ ମଠ ମନ୍ଦିର, ଦୋକାନ ବଜାର ଆଖିକୁ ସୁହାଇ ଯାଇଥିବା ବେଳେ ଏବେ ବଡଦାଣ୍ଡର ଭଗ୍ନଦୃଶ୍ୟ ଆଖିକୁ ଶ୍ମଶାନ ଭଳି ଦିଶୁଛି । ଯେଉଁଠି ଯାହା ଥିଲା, ସେଇଠି ସବୁ ଚିହ୍ନ ବର୍ଣ୍ଣ ଲିଭି ଯିବା ପରେ ଏବେ ବଡଦାଣ୍ଡ ଖାଁ ଖାଁ ଲାଗୁଛି… ଶ୍ରୀମନ୍ଦିର ସାମ୍ନାରେ ଶୂନ ଶାନ ରାଜୁତି କରୁଛି ।

ବୁଲଡୋଜର କାହା ଦୋକାନ ଉପରେ ବୁଲିଛି ତ କାହା ଜୀବନ ଜୀବିକା ଉପରେ ଚଢିଛି । ବର୍ଷ ବର୍ଷ ଧରି ବଡଦାଣ୍ଡରେ ବ୍ୟବସାୟ କରି ପରିବାର ପୋଷୁଥିବା ଅନେକ ବ୍ୟବସାୟୀଙ୍କ ବେଉସା ବୁଡାଇଛି । ଦୋକାନରୁ ରୋଜଗାର କରି କିଏ ଘର ଚଳାଏ ତ କିଏ ପୁଅକୁ ପାଠ ପଢାଏ ତ ପୁଣି କିଏ ତା ରୋଗୀଣା ମାଆର ଔଷଧ ଖର୍ଚ୍ଚ ବହନ କରେ । ହେଲେ ଦୋକାନ ଭାଙ୍ଗିବା ପରେ ଏବେ ସମସ୍ତେ ବେସାହାରା, ସବୁଠି ହଇରାଣର ହାହାକାର, ଥଇଥାନ କରିବାକୁ ସରକାରକୁ ନିବେଦନ, ଜଗାକୁ ଗୁହାରୀ

Comments are closed.