କନକ ବ୍ୟୁରୋ: କାଲି ଲାଗୁ ହେଲା, ଆଜି ଭଙ୍ଗା ହେଲା । ଓଭରବ୍ରିଜରେ ଓହଳି ରହିଲା ହେଲମେଟ ନିୟମ । ସରକାରୀ ନିୟମକୁ ଫୁ କରି ଓଭରବ୍ରିଜ ଉପରେ ବିନା ହେଲମେଟରେ ବୁଲିଲେ ବାଇକ ଆରୋହୀ । ହେଲମେଟ ପିନ୍ଧିବାକୁ ନିୟମ କଡାକଡି ହୋଇଥିଲେ ମଧ୍ୟ କେହି ମାନିବାକୁ ନାରାଜ । ପ୍ରତି ଦଶ ଜଣରେ ୪ ଜଣଙ୍କୁ ଛାଡିଦେଲେ ଆଉ ୬ ଜଣ ବିନା ହେଲମେଟରେ ଖୁବ ଜୋରରେ ଓଭର ବ୍ରିଜରେ ଗାଡି ଚଳାଉଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଭୁବନେଶ୍ୱରରେ ଓଭରବ୍ରିଜ ଉପରେ ଅଧିକ ଦୁର୍ଘଟଣା ହେଉଥିବାରୁ ଆଉ ଅକାଳରେ ଜୀବନ ଯାଉଥିବାରୁ ସମସ୍ତ ବାଇକ ଆରୋହୀଙ୍କ ପାଇଁ ଗତକାଲି ନିୟମ କଡାକଡି କରିଥିଲା ଜିଲ୍ଲା ପ୍ରଶାସନ । ଖଣ୍ଡଗିିରି ଛକରୁ ରସୁଲଗଡ ଯାଏଁ ଲମ୍ବିଥିବା ଓଭରବ୍ରିଜ ଉପରେ ସବୁଦିନ କିଛି ନା କିଛି ଦୁର୍ଘଟଣା ଘଟୁଛି । ବିଶେଷ କରି ଦ୍ରୁତ ଗତିରେ ଗାଡି ଚଳାଉଥିବା ବାଇକ ଆରୋହୀଙ୍କ ଅଧିକ କ୍ଷତି ହେଉଛି । ତେଣୁ ଦୁର୍ଘଟଣା ରୋକିବାକୁ କାଲି ବଡ ନିୟମ ଲାଗୁ କରିଥିଲା ଖୋର୍ଦ୍ଧା ଜିଲ୍ଲା ପ୍ରଶାସନ । ବାଇକ ଚାଳକ ବିନା ହେଲମେଟରେ ଓଭରବ୍ରିଜ ଉପରେ ଯାଇପାରିବେନି ବୋଲି କାଲି ନିୟମ ଲାଗୁ କରାଯାଇଥିଲା ଆଉ ଯିଏ ନିୟମ ଭାଙ୍ଗିବ ତା ଉପରେ କଡା କାର୍ଯ୍ୟାନୁଷ୍ଠାନ ହେବ ବୋଲି ମଧ୍ୟ କୁହାଯାଇଥିଲା ।
ହେଲେ ଆଜି ସ୍ଥିତି ଯଥା ପୂର୍ବଂ ତଥା ପରଂ । ଅର୍ଥାତ ସରକାରୀ ନିୟମ, ନିୟମ ହୋଇ ରହିଯାଇଛି । କାଁ ଭାଁ ବାଇକ ଚାଳକଙ୍କୁ ଛାଡିଦେଲେ ପ୍ରାୟ ଅନେକ ଲୋକ ବିନା ହେଲମେଟରେ ଯିବା ଆସିବା କରୁଛନ୍ତି । ଯଦିଓ କାଲି ନିୟମ ଲାଗୁ ପାଇଁ ଓଭରବ୍ରିଜର ବଡବଡ ଛକରେ ପୋଲିସ ଅଫିସର ଲୋକଙ୍କ ଯାଞ୍ଚ କରୁଥିଲେ ଆଉ ନିୟମ ବାବଦରେ ଅବଗତ କରାଉଥିଲେ । ହେଲେ ଆଜି ସେଭଳି କିଛି ଦୃଶ୍ୟ ଦେଖିବାକୁ ମିଳିନଥିଲା କି କୌଣସି ପୋଲିସଙ୍କୁ ଯାଞ୍ଚ କରିବାର ଚିତ୍ର ମିଳିନଥିଲା । ବରମୁଣ୍ଡା ଛକ ଛାଡିଦେଲେ ଅନ୍ୟ କେଉଁଠି ଯାଞ୍ଚ କରୁନଥିଲେ ପୋଲିସ କର୍ମଚାରୀ । ଆଚାର୍ଯ୍ୟବିହାର, ଜୟଦେବ ବିହାର, ବାଣୀବିହାର ଓ ରସୁଲଗରେ ପୋଲିସ ନଥିବାରୁ ଖୁଲମଖୁଲା ନିୟମ ଉପରେ ଗାଡି ଚଢ଼ାଇ ଦେଉଥିଲେ ଚାଳକ । ଏଥିରୁ ସ୍ପଷ୍ଟ ହେଉଛି କି ନିୟମ ପ୍ରଣୟନ ପରେ ଖାଲି ଲୋକ ନୁହେଁଁ ସରକାରୀ ବାବୁ ବି ଚୁପ୍ ବସିପଡନ୍ତି ।
ତେବେ ବାଣୀବିହାର ଓ ରସୁଲଗଡ ଛକରେ ଆମେ ଅନେକ ସମୟ ଧରି ଅନୁଧ୍ୟାନ କରିବା ପରେ ୪୦ ପ୍ରତିଶତ ଲୋକଙ୍କୁ ହେଲମେଟ ପିନ୍ଧି ବାଇକ ଚଳାଉଥିବା ଦେଖିଥିଲୁ ଆଉ ବାକି ଲୋକ ଖୁଲମଖୁଲା ଭାବେ ବିନା ହେଲମେଟରେ ବୁଲୁଥିଲେ । ଯେଉଁମାନେ ନିୟମ ବାବଦରେ କିଛିଟା ଖବର ରଖିଛନ୍ତି ସେମାନେ ପୋଲିସ ଅଛନ୍ତି କି ନାହିଁ ଆଗେ ଦେଖି ଦେଉଛନ୍ତି । ଯଦି ପୋଲିସ ନାହାନ୍ତି, ତେବେ ହେଲମେଟ ହାତରେ ଧରି ଶହେ ସ୍ପିଡିରେ ଗାଡି ଚଳାଉଛନ୍ତି । ବରମୁଣ୍ଡା ଛକରେ ଯାଞ୍ଚ ହେଉଥିବାରୁ ସେଠି ହେଲମେଟ ପିନ୍ଧିଦେଇ ବରମୁଣ୍ଡା ପାରେଇ ଆସିଲେ ମୁଣ୍ଡରୁ ହେଲମେଟ ଖୋଲି ଦେଉଛନ୍ତି ବାଇକ ଚାଳିକ । ଆଉ ସରକାରୀ ନିୟମକୁ ରାସ୍ତା ଉପରେ ଦଳି ପଳାଉଛନ୍ତି ଯାହା ଦେଖିପାରୁନି ପ୍ରଶାସନ ।