ମାନବିକତା ଦେଖାଇଲେ ଡ୍ରାଇଭର୍ ! ଦୂର୍ଘଟଣାରେ ସଡକରେ ପଡିଥିବା ଆହତଙ୍କୁ ଡାକ୍ତରଖାନା ଆଣିବା ସହ ଫେରାଇଲେ ୫୦ ହଜାର ଟଙ୍କା
ମାନବିକତା ଦେଖାଇଲେ ଆମ୍ବୁଲାନ୍ସ ଡ୍ରାଇଭର ଓ ଫାର୍ମାସିଷ୍ଟ । ଦୁର୍ଘଟଣାରେ ୨ ଆହତଙ୍କୁ ସ୍ୱାସ୍ଥ୍ୟକେନ୍ଦ୍ର ଆଣିଥିଲେ । ପରବର୍ତ୍ତି ସମୟରେ ଦୁର୍ଘଟଣାସ୍ଥଳରେ ପଡିଥିବା ୫୦ ହଜାର ଟଙ୍କା ଗୋଟାଇବା ପରେ ତାଙ୍କୁ ହସ୍ତାନ୍ତର ମଧ୍ୟ କରିଥିଲେ । ତେବେ ଏପରି ଲୋଭହୀନ ବ୍ୟକ୍ତିତ୍ୱ ଓ ମାନବିକତା ରଖିଥିବା ଡ୍ରାଇଭର ଓ ଫାର୍ମାସିଷ୍ଟ ଏବେ ଜିଲ୍ଲାଞ୍ଚଳରେ ପ୍ରଶଂସା ସାଉଁଟିଛନ୍ତି । ଆଦିବାସୀ ଅଧ୍ୟୁଷିତ ମାଲକାନଗିରି ଜିଲ୍ଲା ମାଥିଲି ବ୍ଲକ ଅନ୍ତର୍ଗତ କୋଷାବାହାଲ ନିକଟ ମୁଖ୍ୟରାସ୍ତାରେ ବାଇକରେ ଆସୁଥିବାବେଳେ ହଠାତ୍ ଆଗ ଚକା ଫାଟିଯିବାରୁ ଦୁର୍ଘଟଣାଗ୍ରସ୍ତ ହୋଇଥିଲେ ୨ ବାଇକ୍ ଆରୋହୀ । ସେମାନେ ହେଲେ ଛତିଶଗଡ ରାଜ୍ୟ ସୁକମା ଅଞ୍ଚଳର ଭି. ଆପାଲ ରାଜୁ (୪୦) ଓ ଡି. ନାଗା ରାଜୁ (୪୫) । ଉଭୟେ ମିଶି ଜୟପୁର ଅଭିମୂଖେ କୌଣସି କାମରେ ହାତରେ ୫୦ ହଜାର ଟଙ୍କା ଧରି ଯାଉଥିଲେ । ଏତିକିବେଳେ କୋଷାବାହାଲ ନିକଟରେ ଦୁର୍ଘଟଣା ହେବାରୁ ଧରିଥିବା ଅର୍ଥ ଏଣେତେଣେ ହେବା ସହିତ ୨ ଆରୋହୀ ମଧ୍ୟ ମୁଖ୍ୟରାସ୍ତା ଉପରେ ଛିଟିକି ପଡିଥିଲେ । ଏହି ରାସ୍ତା ଦେଇ ଅନ୍ୟ ଏକ ରୋଗୀଙ୍କୁ ବୋହି ମାଥିଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଆମ୍ବୁଲାନ୍ସ ଆସି ପହଞ୍ଚିଥିଲା । ପରେ ୧୦୮ ଆମ୍ବୁଲାନ୍ସ ଡ୍ରାଇଭର ଏ. କ୍ରିଷ୍ଣା ରାଓ ଏବଂ କାର୍ୟ୍ୟରତ ଫାର୍ମାସିଷ୍ଟ ରାମକୃଷ୍ଣ ସ୍ୱାଇଁ ସଙ୍ଗେ ସଙ୍ଗେ ଘଟଣାସ୍ଥଳରେ ପହଞ୍ଚି ଦୁର୍ଘଟଣାରେ ପଡିଥିବା ୨ ବାଇକ୍ ଆରୋହୀଙ୍କୁ ଉଦ୍ଧାର କରିବା ସହିତ ମାଥିଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ ଆଣି ଭର୍ତ୍ତି କରିଥିଲେ । ଏହାସହିତ ଗୋଟି ଗୋଟି କରି ରାସ୍ତା ଉପରେ ପଡିଥିବା ସମସ୍ତ ଟଙ୍କା ଗୋଟାଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଉଭୟ ଆରୋହୀଙ୍କ ଚେତା ଫେରିବା ପରେ ଆମ୍ବୁଲାନ୍ସ ଡ୍ରାଇଭର ରାଓ ଏବଂ ଫାର୍ମାସିଷ୍ଟ ସ୍ୱାଇଁ ମିଳିତ ଭାବେ ଆରୋହୀଙ୍କ ୫୦ ହଜାର ଟଙ୍କା ଫେରସ୍ତ କରିଥିଲେ । ମାନବିକତା ଦେଖାଇ ସମସ୍ତ ଅର୍ଥ ଫେରସ୍ତ କରିଥିବାରୁ ଉଭୟେ ଡ୍ରାଇଭର ଓ ଫାର୍ମାସିଷ୍ଟଙ୍କୁ ଧନ୍ୟବାଦ ଜଣାଇଛନ୍ତି । ଏହି ଘଟଣା ଏବେ ଜିଲ୍ଲାଞ୍ଚଳରେ ଚର୍ଚ୍ଚା ପାଲଟିଛି । ମାନବିକତା ଦେଖାଇଥିବା ଏହି ୨ କର୍ମଚାରୀଙ୍କ ନିସ୍ୱାର୍ଥପର କାମ ଓ ବ୍ୟକ୍ତିତ୍ୱକୁ ସମଗ୍ର ଅଞ୍ଚଳବାସୀ ପ୍ରଶଂସା କରିଛନ୍ତି ।