ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାଣୀଙ୍କର ବିବାଦୀୟ ବୟାନ ! କହିଲେ ଗୁଗୁଲ ଭଳି ସବୁକିଛି ଜାଣିଥିଲେ ନାରଦ ।
ତ୍ରିପୁରା ମୁଖ୍ୟମନ୍ତ୍ରୀ ବିପ୍ଲବ ଦେବଙ୍କ ପରେ ଏବେ ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାଣୀଙ୍କ ଚାଞ୍ଚଲ୍ୟକର ବୟାନକୁ ନେଇ ଏବେ ସୋସିଆଲ ମିଡିଆରେ ଚର୍ଚ୍ଚା ଜୋର ଧରିଛି । ତ୍ରିପୁରା ମୁଖ୍ୟମନ୍ତ୍ରୀ ବିପ୍ଳବ ଦେବ କହିଥିଲେ ଯେ, ମହାଭାରତ ସମୟରେ ଇଣ୍ଟରନେଟ ସେବା ରହିଥିଲା । ଏବେ ବିଜୟ ରୂପାଣୀ ଗୁଗୁଲକୁ ନାରଦଙ୍କ ସହ ସମକକ୍ଷ କରି କହିଛନ୍ତି ଯେ, ଏବେ ଯେପରି ସର୍ଚ୍ଚ ଇଞ୍ଜିନ ଗୁଗୁଲ ସବୁ ତଥ୍ୟ ଦେଉଛି ସେହିପରି ପ୍ରାଚୀନ କାଳରେ ଭାଗବାନ ନାରଦ ମଧ୍ୟ ସବୁ ବିଷୟର ଜ୍ଞାନ ରଖିଥିଲେ ।
Kanak News is now on WhatsApp
Join and get latest news updates delivered to you via WhatsApp
ରାଷ୍ଟ୍ରୀୟ ସ୍ୱୟଂ ସେବକ ସଂଘ ଏବଂ ବିଶ୍ୱ ସମ୍ବାଦ କେନ୍ଦ୍ର ପକ୍ଷରୁ ଆୟୋଜିତ ହୋଇଥିବା କାର୍ଯ୍ୟକ୍ରମରେ ଯୋଗ ଦେଇ ଗୁଜୁରାଟ ମୁଖ୍ୟମନ୍ତ୍ରୀ ବିଜୟ ରୂପାଣୀ କହିଛନ୍ତି ନାରଦ ସୂଚନାର ଗନ୍ତାଘର ଥିଲେ । ଏହା କଥା ଆଜି ବି ମଧ୍ୟ ପ୍ରାସଙ୍ଗିକ ଅଟେ ଯେ, ନାରଦ ସମଗ୍ର ଦୁନିଆ ବିଷୟରେ ଜାଣିଥିଲେ । ଯେମିତି ନାରଦ ସମଗ୍ର ଦୁନିଆର ଜ୍ଞାନ ରଖୁଥିଲେ ସେମିତି ଗୁଗୁଲ ମଧ୍ୟ ସୂଚନାର ସ୍ରୋତ ଅଟେ । କାହିଁକି ନା ଦୁନିଆରେ ଯାହା ବି ଘଟୁଛି ଏହାର ସମସ୍ତ ସୂଚନା ଗୁଗୁଲ ପାଖରେ ରହିଛି । ବିଜୟ ରୂପାଣୀ କହିଛନ୍ତି ଯେ, ମନୁଷ୍ୟ ଜାତିର ମଙ୍ଗଳ ପାଇଁ ସୂଚନା ଗୁଡିକୁ ଏକାଠି କରିବା ନାରଦଙ୍କ କାମ ଥିଲା । ଏହା ହିଁ ତାଙ୍କର ଧର୍ମ ଥିଲା ଏବଂ ଏହା ଅତ୍ୟନ୍ତ ଆବଶ୍ୟକୀୟ ମଧ୍ୟ ଥିଲା । ତେବେ ଏହି ଅବସରରେ ବିଜୟ ରୂପାଣୀ ଲୋକତନ୍ତ୍ର ଦେଶରେ ଗଣମାଧ୍ୟମର ଆବଶ୍ୟକତା ବିଷୟରେ କହିଥିଲେ ।
ତେବେ ଏହା ପୂର୍ବରୁ ତ୍ରିପୁରାର ନୂଆ ମୁଖ୍ୟମନ୍ତ୍ରୀ ବିପ୍ଲବ ଦେବ ମଧ୍ୟ ନିଜ ବିବାଦୀୟ ବୟାନ ପାଇଁ ଚର୍ଚ୍ଚାରେ ରହିଆସିଛନ୍ତି । ସେ କହିଥିଲେ ଯେ, ମହାଭାରତ ସମୟରେ ଇଣ୍ଟରନେଟ୍ ସେବା ରହିଥିଲା । ସେ ଏହି ବୟାନକୁ ଯୁକ୍ତି ବାଢିବା ସହ କହିଥିଲେ ଯେ, ଯଦି ଭାରତ ପାଖରେ ଇଣ୍ଟରନେଟ ସେବା ନଥାନ୍ତା ତେବେ ଧୃତରାଷ୍ଟ୍ରଙ୍କ ପାଖରେ ବସି ସଞ୍ଜୟ ତାଙ୍କୁ ମହାଭାରତ ଯୁଦ୍ଧର ସମସ୍ତ ବିବରଣୀ କିପରି ଦେଇଥାନ୍ତେ । ସେ ଏହା ବି ମଧ୍ୟ ଦାବି କରିଥିଲେ ଯେ, ଦେଶରେ ସେତେବେଳେ ସାଟେଲାଇଟ ମଧ୍ୟ ଥିଲା । ଏବଂ ସେହିଥିରୁ ଜଣାପଡୁଛି ଯେ, ଲକ୍ଷ ଲକ୍ଷ ବର୍ଷ ପୂର୍ବରୁ ମଧ୍ୟ ଦେଶରେ ସାଟେଲାଇଟ ରହିଥିଲା ।
ଗୁଜୁରାଟ ମୁଖ୍ୟମନ୍ତ୍ରୀଙ୍କର ଏଭଳି ଚାଞ୍ଚଲ୍ୟକର ବୟାନ ସହ ସହମତି ପ୍ରକାଶ କରିଥିଲେ ରାଜ୍ୟପାଳ । ମହାଭାରତ ସମୟରେ ଇଣ୍ଟରନେଟ୍ ସେବା ରହିଥିବା କଥାକୁ ସେ ସ୍ୱୀକାର କରିଥିଲେ । ଏହା ପରେ ମଧ୍ୟ ବିବାଦୀୟ ବୟାନ ଦେବାରୁ ନିଜକୁ ଦୂରାଇ ପାରିନଥିଲେ ବିପ୍ଳବ ଦେବ । ବିଶ୍ୱ ସୁନ୍ଦରୀ ଡାଇନା ହେଡେନଙ୍କର ସୁନ୍ଦରତାକୁ ନେଇ ମଧ୍ୟ ସେ ପ୍ରଶ୍ନ ଉଠାଇଥିଲେ । ଏପରିକି ବେରୋଜଗାର ଯୁବକଙ୍କୁ ପାନ ଦୋକାନ ଖୋଲିବା ଏବଂ ଗାଈ ପାଳିବା ଉପଦେଶ ଦେଇ ଅଡୁଆରେ ପଡିଥିଲେ ବିପ୍ଳବ ଦେବ । ତେବେ ଏପରି ବାରମ୍ବାର ବିବାଦୀୟ ବୟାନ ଦେବାକୁ ନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଗଣମାଧ୍ୟମ ଆଗରେ ଏଭଳି ବୟାନ ନଦେବାକୁ କହିଥିଲେ ।