ବାପା ବିକ୍ରି କରୁଥିଲେ ଚା’, ସିଝା ଅଣ୍ଡା । କଠିନ ପରିଶ୍ରମ ଏବଂ ଦୃଢ ଇଚ୍ଛାଶକ୍ତି ବଳରେ ଦେଶର ସବୁଠୁ କମ୍ ବୟସର ଆଇପିଏସ ଅଫିସର ବନିଲେ ସାଫିନ୍ ହାସନ ।
କନକ ବ୍ୟୁରୋ : କୁହାଯାଏ, ଦୃଢ ଇଚ୍ଛାଶକ୍ତି ଏବଂ ଆତ୍ମବିଶ୍ୱାସ ଥିଲେ, ଅସମ୍ଭବ କାମ ବି ସମ୍ଭବ ହୋଇଯାଏ । ସଫଳତା ପଥରେ ସବୁ ବାଧାବିଘ୍ନ ମୁଣ୍ଡ ନୁଆଁଇଥାଏ । ଆଉ ଏହାର ଏକ ବଡ ଉଦାହରଣ ସାଜିଛନ୍ତି ଗୁଜୁରାଟର ସାଫିନ୍ ହାସନ ।
Kanak News is now on WhatsApp
Join and get latest news updates delivered to you via WhatsApp
ସାଫିନ୍ ହାସନଙ୍କ ପାଇଁ ଆସନ୍ତା ଡିସେମ୍ବର ମାସ ୨୩ ତାରିଖ ସବୁଠାରୁ ସ୍ୱତନ୍ତ୍ର ଏବଂ ସ୍ମରଣୀୟ ହେବାକୁ ଯାଉଛି । କାହିଁକି ନା ଭାରତବର୍ଷରେ ସେଦିନ ଇତିହାସ ରଚିବାକୁ ଯାଉଛନ୍ତି ହାସନ । ଗୁଜୁରାଟର ୨୨ ବର୍ଷୀୟ ସାଫିନ୍ ହାସନ ଦେଶର ସବୁଠୁ କମ୍ ବୟସର ଆଇପିଏସ୍ ଅଫିସର ହେବାର ସୌଭାଗ୍ୟ ଅର୍ଜନ କରିଛନ୍ତି । ଆଉ ଆସନ୍ତା ୨୩ ତାରିଖରେ ସେ ଗୁଜୁରାଟର ଜାମନଗରରେ ଆସିଷ୍ଟାଣ୍ଡ ସୁପରିନଟେଣ୍ଡେଂଟ ବା ଏଏସପି ଭାବେ ଦାୟିତ୍ୱ ଗ୍ରହଣ କରିବେ ।
ଏତେ କମ୍ ବୟସରେ ଆଇପିଏସ ଅଫିସର ହେବା ହାସନଙ୍କ ପାଇଁ ଏତେ ସହଜ ନଥିଲା । ପିଲାଟି ବେଳୁ ପୋଲିସ ଅଫିସର ହେବା ପାଇଁ ସେ ସ୍ୱପ୍ନ ଦେଖୁଥିଲେ । ଆଉ ନିଜ ଲକ୍ଷ୍ୟ ସ୍ଥଳରେ ପହଂଚିବା ପାଇଁ ଦିନ ରାତି ଏକ କରି ପାଠ ପଢୁଥିଲେ । ଅନ୍ୟପଟେ ହାସନଙ୍କ ବାପା ମା ମଧ୍ୟ ପୁଅକୁ ପଢାଇବା ପାଇଁ ଅନେକ ପରିଶ୍ରମ କରିଛନ୍ତି । ଆସନ୍ତୁ ଜାଣିବା ସବୁଠୁ କମ୍ ବୟସର ଆଇପିଏସ ସାଫିନ୍ ହାସନଙ୍କ ସଂଘର୍ଷର କାହାଣୀ ।
ହାସନଙ୍କ ଘର ହେଉଛି ଗୁଜୁରାଟର ପାଲନପୁର ସ୍ଥିତ କନୋଦର ଗ୍ରାମରେ । ୨୦୧୭ରେ ସେ ୟୁପିଏସସି ପରୀକ୍ଷା ଦେଇଥିଲେ, ଯେଉଁଥିରେ ସେ ୫୭୦ ତମ ର୍ୟାଙ୍କ ହାସଲ କରିଥିଲେ । ଗରିବ ଘରେ ଜନ୍ମ ନେଇଥିବା ହାସନ ନିଜ ଲକ୍ଷ୍ୟ ସ୍ଥଳରେ ପହଂଚିବା ପାଇଁ କଠୋର ପରିଶ୍ରମ କରିଛନ୍ତି ।
ହାସନଙ୍କ ବାପା ଜଣେ ଇଲେକ୍ଟ୍ରିସିଆନ୍ ଭାବେ କାମ କରନ୍ତି । ଏବଂ ତାଙ୍କ ମା କେତେକ ହୋଟେଲ ଏବଂ ବିବାହ ଉତ୍ସବରେ ରୋଟି ତିଆରି କରିଥାନ୍ତି । ଶୀତ ଦିନେ ହାସନଙ୍କ ବାପା ଠେଲା ଗାଡିରେ ଚା ଆଉ ସିଝା ଅଣ୍ଡା ବିକ୍ରି କରିଥାନ୍ତି । ନିଜ ପୁଅର ସ୍ୱପ୍ନ ସାକାର କରିବା ପାଇଁ ଦିନରାତି ପରିଶ୍ରମ କରିଥିଲେ ବାପା ମା ।
ହାସନଙ୍କ କହିବା କଥା ହେଉଛି, ସେ ସ୍କୁଲରେ ପଢୁଥିବା ସମୟରେ ଥରେ ଜିଲ୍ଲାପାଳ ତାଙ୍କ ସ୍କୁଲକୁ ଆସିଥିଲେ । ଆଉ ସମସ୍ତେ ଜିଲ୍ଲାପାଳଙ୍କୁ ସମ୍ମାନ ପ୍ରଦାନ କରିଥିଲେ । ଆଉ ସେହିଦିନ ଠାରୁ ହିଁ ସେ ଜଣେ ଅଫିସର ହେବାକୁ ମନରେ ସ୍ଥିର କରିନେଇଥିଲେ । ବାପା ମାଙ୍କ କଠିନ ପରିଶ୍ରମ ହିଁ ତାଙ୍କୁ ଆଇପିଏସ ହେବାକୁ ପ୍ରେରଣା ଯୋଗାଇଥିଲା ବୋଲି କହିଛନ୍ତି ହାସନ ।
ତେବେ ଗୁରୁତ୍ୱପୂର୍ଣ୍ଣ କଥା ହେଉଛି, ଯେଉଁଦିନ ଆଇପିଏସ ପରୀକ୍ଷା ଦେବାକି ସେ ଯାଉଥିଲେ, ସେଦିନ ରାସ୍ତାରେ ତାଙ୍କର ଦୁର୍ଘଟଣା ହୋଇଥିଲା । କିନ୍ତୁ ସେମିତି ସ୍ଥିତିରେ ମଧ୍ୟ ସେ ପରୀକ୍ଷା ଦେଇଥିଲେ, ଏବଂ ପରୀକ୍ଷା ପରେ ହସ୍ପିଟାଲରେ ଆଡମିଟ୍ ହୋଇଥିଲେ ।
କଠିନ ପରିଶ୍ରମ, ଦୃଢ ଆତ୍ମବିଶ୍ୱାସ ଏବଂ ଇଚ୍ଛାଶକ୍ତି ଥିଲେ, ସଫଳତା ଆପେ ଆପେ ଆସେ । ଆଉ ଏହାର ଏକ ବଡ ଉଦାହରଣ ସାଜିଛନ୍ତି ଭାରତର ସବୁଠୁ କମ୍ ବୟସର ଆଇପିଏସ୍ ଅଫିସର ସାଫିନ୍ ହାସନ ।