କନକ ବ୍ୟୁରୋ: ବନ୍ଦୀ ଜୀବନ ମୁକ୍ତି ମିଳିବ । ଲୁହା ଶିକୁଳିରୁ ଜୀବନ ଫିଟିବ । ଆଉ ଜୀବନ- ଯନ୍ତ୍ରଣା ମଝିରେ ରଚା ହୋଇଥିବା ‘ଅଭିଶପ୍ତ’ ନାଟକର ଯବନିକା ପଡିବ । କାରଣ ରମାକାନ୍ତଙ୍କ ଜୀବନରେ ପଡିଥିବା ୩୦ ବର୍ଷିୟ ବେଡି ଫିଟାଇବ ପ୍ରଶାସନ, ସହାୟତା କରିବେ ସରକାର ।
Kanak News is now on WhatsApp
Join and get latest news updates delivered to you via WhatsApp
ଦୀର୍ଘ ୩୦ ବର୍ଷ ହେବ ଗୋଟିଏ ଘରେ ବନ୍ଧା ହୋଇ ଅନ୍ଧାରୀ ଜୀବନ କାଟୁଛନ୍ତି ଯାଜପୁର ଦଶରଥପୁର ବ୍ଲକ ଉଦୟପୁର ଗାଁର ରମାକାନ୍ତ ବେହେରା । ମାନସିକ ବିକୃତି ପାଇଁ ତାଙ୍କୁ ଶିକୁଳିରେ ବାନ୍ଧି ରଖାଯାଇଥିବା ବେଳେ ଚିକିତ୍ସା ପାଇଁ ଅର୍ଥ ନଥିବାରୁ ପରିବାର ଲୋକେ ହାତଟେକି ଦେଇଥିଲେ । ତେବେ ରମାକାନ୍ତଙ୍କ ଏ ଦୁଃଖର କାହାଣୀ କନକ ନ୍ୟୁଜରେ ପ୍ରସାରଣ ପରେ ତାଙ୍କ ପାଖରେ ପ୍ରଶାସନ ପହଞ୍ଚିଛି । ଆଉ ଖୋଦ ଜିଲ୍ଲାପାଳ ରଞ୍ଜନ ଦାସ ରମାକ୍ତନ୍ତଙ୍କୁ ସବୁ ସହାୟତା ଯୋଗାଇ ଦେବେ ବୋଲି ପ୍ରତିଶ୍ରୁତି ଦେଇଛନ୍ତି ।
ତେବେ ରମାକାନ୍ତଙ୍କ ଚିକିତ୍ସା ଖର୍ଚ୍ଚ ସହ ତାଙ୍କ ପରିବାରକୁ ମଧ୍ୟ ବିଜୁ ପକ୍କା ଘରର କାର୍ଯ୍ୟଦେଶ ଦିଆଯାଇଛି ଆଉ ପରିବାରର ସମସ୍ତ ସଦସ୍ୟଙ୍କୁ ରାସନ କାର୍ଡ ପ୍ରଦାନ କରାଯାଇଛି । ତେବେ ଅନ୍ଧାର ଘରୁ ଆଲୁଅ ଅପେକ୍ଷାରେ ଥିବା ରମାକାନ୍ତଙ୍କୁ ପ୍ରଶାସନର ପ୍ରତିଶ୍ରୁତି ମିଳିବା ପରେ ସାରା ପରିବାରରେ ଆଶା ସଞ୍ଚାର ହୋଇଛି । ଆଉ ଗାଁ ଲୋକେ ରମାକାନ୍ତଙ୍କୁ ସପୂର୍ଣ୍ଣ ସୁସ୍ଥ କରାଇବାକୁ ଜିଲ୍ଲାପାଳଙ୍କ ପାଖରେ ଗୁହାରୀ କରିଛନ୍ତି ।