ଅଫେରା ଦୁନିଆରେ ଅରୁଣ…ଅସୁସ୍ଥତା କାରଣରୁ ମିଡିଆଠାରୁ ଦୂରେଇ ରହୁଥିଲେ ବି ସୋସିଆଲ ମିଡିଆରେ ଥିଲେ ସକ୍ରିୟ, ପଢନ୍ତୁ ଅରୁଣ ଜେଟଲିଙ୍କ ସେହି ଶେଷ ବାର୍ତ୍ତା
ପରଲୋକରେ ଅରୁଣ ଜେଟଲି । ଦିଲ୍ଲୀ ଏମ୍ସ ଡାକ୍ତରଖାନାରେ ଚିକିତ୍ସାଧୀନ ଅବସ୍ଥାରେ ଆଜି ଦିନ ୧୨ଟା ୭ ମିନିଟରେ ତାଙ୍କର ପରଲୋକ ଘଟିଛି । ମୃତ୍ୟୁ ବେଳକୁ ତାଙ୍କୁ ୬୬ ବର୍ଷ ବୟସ ହୋଇଥିଲା । ଗତ ଅଗଷ୍ଟ ୯ ତାରିଖରେ ଛାତିରେ ଯନ୍ତ୍ରଣା ଓ ନିଶ୍ୱାସ ପ୍ରଶ୍ୱାସ ନେବାରେ କଷ୍ଟ ଅନୁଭବ କରିବାରୁ ତାଙ୍କୁ ଏମ୍ସରେ ଭର୍ତ୍ତି କରାଯାଇଥିଲା । ତାଙ୍କର ଚିକିତ୍ସାରେ ଏକ ସ୍ୱତନ୍ତ୍ର ଡାକ୍ତରୀ ଟିମ୍ ରହି ଚିକିତ୍ସା ବ୍ୟବସ୍ଥା ଦେଖୁଥିଲେ । ତେବେ ଡାକ୍ତରଙ୍କ ସମସ୍ତ ଉଦ୍ୟମ ସତ୍ୱେ ଆଖି ବୁଜିଛନ୍ତି ଅରୁଣ ଜେଟଲି ।
Kanak News is now on WhatsApp
Join and get latest news updates delivered to you via WhatsApp
ଗତ କିଛି ଦିନ ହେଲା ଗଭୀର ରୋଗରେ ଆକ୍ରାନ୍ତ ଥିବା ସତ୍ୱେ ବି ସେ ସୋସିଆଲ ମିଡାଆରେ ବହୁତ ସକ୍ରିୟ ଥିଲେ । ଅସୁସ୍ଥତା କାରଣରୁ ସେ ମିଡିଆ ସାମନାକୁ ଆସୁପାରୁନଥିଲେ ବି ନିଜର ମନ କଥା ତଥା ବାର୍ତ୍ତାକୁ ସୋସିଆଲ ମିଡିଆ ଜରିଆରେ ଲୋକଙ୍କ ନିକଟରେ ପହଂଚାଉଥିଲେ । ଗତ ୭ ଅଗଷ୍ଟ ତାରିଖରୁ ଅରୁଣ ଜେଟଲି ଶେଷ ସମୟ ପର୍ଯ୍ୟନ୍ତ ସୋସିଆଲ ସାଇଟରେ ସକ୍ରିୟ ଥିବା ନଜର ଆସିଥିଲେ । ଅଗଷ୍ଟ ୯ ତାରିଖରେ ନିଶ୍ୱାସ ପ୍ରଶ୍ୱାସ ନେବାରେ ସମସ୍ୟା କାରଣରୁ ତାଙ୍କୁ ଏମ୍ସରେ ଭର୍ତ୍ତି କରାଯାଇଥିଲା ଆଉ ସେବେଠାରୁ ହିଁ ଜେଟଲି ଏମ୍ସରେ ଭର୍ତ୍ତି ଥିଲେ । ଦୀର୍ଘ ଦିନ କାଳ ଏମ୍ସରେ ଚିକିତ୍ସାଧିନ ଅବସ୍ଥାରେ ଆଜି ଆଖି ବୁଜିଛନ୍ତି ଅରୁଣ ଜେଟଲି ।
महान संत तुलसीदास जी की जयंती पर उनको कोटि कोटि नमन | pic.twitter.com/sviPbLPlnK
— Arun Jaitley (@arunjaitley) August 7, 2019
ତେବେ ଶେଷ ଥର ପାଇଁ ଅରୁଣ ଜେଟଲି ଅଗଷ୍ଟ ୬ ତାରିଖରେ ଶ୍ରୀ ରାମଚରିତମାନସର ରଚୟିତା ଏବଂ ମହାନ ସନ୍ଥ ତୁଳସୀଦାସଙ୍କ ଜୟନ୍ତୀରେ ତାଙ୍କୁ ସ୍ମରଣ କରିଥିଲେ । ୫ରୁ ୬ ଅଗଷ୍ଟ ମଧ୍ୟରେ ଅରୁଣ ଜେଟଲି ନିଜ ବ୍ଲଗ ଅରୁଣ ଜେଟଲି ଡଟ୍ କମ ଏବଂ ଫେସବୁକ ପେଜରେ ଲଗାତର ସକ୍ରିୟ ଥିଲେ । ସୁଷମା ସ୍ୱାରଜଙ୍କ ନିଧନ ପରେ ବି ଅରୁଣ ଜେଟଲି ସୋସିଆଲ ମିଡିଆ ଜରିଆରେ ଗଭୀର ସମବେଦନା ବ୍ୟକ୍ତ କରିଥିଲେ । ଅଗଷ୍ଟ ୬ ତାରିଖ ୩ଟା ୧୪ରେ ବି ଅରୁଣ ଜେଟଲି ନିଜ ଫେସବୁକ ପେଜରେ ସଂସଦର ସଫଳ ଅଧିବେଶନ ଉପରେ ଏକ ଲମ୍ବା ବ୍ଲଗ ଲେଖିଥିଲେ । ଏହି ବ୍ଲଗରେ ଜେଟଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଗୃହମନ୍ତ୍ରୀ ଅମିତ ଶାହାଙ୍କୁ ସ୍ୱତନ୍ତ୍ର ଧନ୍ୟବାଦ ଜଣାଇବା ସହ ସରକାରଙ୍କ ଦ୍ୱାରା ନିଆଯାଇଥିବା ବିଭିନ୍ନ ଐତିହାସିକ ନିଷ୍ପତିକୁ ପ୍ରଶଂସା ମଧ୍ୟ କରିଥିଲେ ।
Prime Minister Shri Narendra Modi and Home Minister Shri Amit Shah achieved the Impossible with the new Kashmir policy. In my blog today, I have analysed the impact of this decision, and history of failed attempts on resolving the J&K issue.
— Arun Jaitley (@arunjaitley) August 6, 2019
ଅରୁଣ ଜେଟଲି ନିଜର ଶେଷ ଫେସବୁକ ବ୍ଲଗରେ ଲେଖିଥିଲେ କି, ସଂସଦର ଚଳିତ ଅଧିବେଶନ ଦେଶବାସୀଙ୍କ ପାଇଁ ବେଶ୍ ଲାଭଦାୟକ ରହିଛି । ଏହି ଅଧିବେଶନରେ ବହୁ ଐତିହାସିକ ବିଧାନ ପାରିତ କରାଯାଇଛି । ଟ୍ରିପଲ ତଲାକ ଆଇନ, ଭାରତର ଆତଙ୍କବାଦ ବିରୋଧୀ ଆଇନକୁ ମଜବୁତ କରିବା ଏବଂ ଅନୁଚ୍ଛେଦ ୩୭୦ ଉପରେ ନିଷ୍ପତି ନେବା ଭଳି ସମସ୍ତ ଅଭୁତପୂର୍ବ ନିଷ୍ପତି ଅଟେ । ସେହିଭଳି ଅନୁଚ୍ଛେଦ ୩୭୦ ଉପରେ ବିଜେପି ଯେଉଁ ପ୍ରତିଶ୍ରୁତ ଦେଇଥିଲା, ତାର ଉପଲବ୍ଧି ଅବିଶ୍ୱସନୀୟ । ସରକାରଙ୍କ ନୂଆ କାଶ୍ମୀର ନୀତିର ସମର୍ଥନରେ ଜନତାଙ୍କ ମୁଡ ଏତେ ମଜଭୁତ ହୋଇଯାଇଛି କି ବିରୋଧୀମାନେ ବି ଜନତାଙ୍କ ଏହି ରାୟ ଆଗରେ ଆଣ୍ଠେଇ ବାକୁ ବାଧ୍ୟ ହୋଇଛନ୍ତି । ରାଜ୍ୟସଭା ପାଇଁ ଦୁଇ – ତୃତୀୟାଂଶ ବହୁମତ ଏହି ନିଷ୍ପତିକୁ ମଂଜୁରୀ ଦେବା କଳ୍ପନା ବାହରେ ଥିଲା । ଏହାପରେ ଜେଟଲି ଜମ୍ମୁ-କାଶ୍ମୀରକୁ ନେଇ ଗତ ୬ ତାରିଖ ସଂଧ୍ୟା ୪ଟାରୁ ଗୋଟିଏ ପରେ ଗୋଟିଏ ଟୁଇଟ୍ କରିଚାଲିଥିଲେ । କିଛି ଟୁଇଟରେ ତ ଜେଟଲି ଜମ୍ମୁକାଶ୍ମୀରର ଏଭଳି ସ୍ଥିତି ପାଇଁ କଂଗ୍ରେସକୁ ଦାୟୀ କରିଥିଲେ ତ ପୁଣି ଅନୁଚ୍ଛେଦ ୩୭୦କୁ ହଟାଇବା ନିଷ୍ପତି ପାଇଁ ଉଭୟ ପ୍ରଧାନମନ୍ତ୍ରୀ ଏବଂ ଗୃହମନ୍ତ୍ରୀଙ୍କୁ ପ୍ରଶଂସା କରିଥିଲେ ।
ବାସ୍ତବରେ ଅରୁଣ ଜେଟଲିଙ୍କ ପରଲୋକ ବିଜେପି ରାଜନୀତି ପାଇଁ ଏକ ବିରାଟ ଶୂନ୍ୟସ୍ଥାନ ସୃଷ୍ଟି କରିଛି । ୧୯୫୨ ମସିହା ଡିସେମ୍ୱର ୨୮ ତାରିଖରେ ନୂଆ ଦିଲ୍ଲୀରେ ଜନ୍ମ ଗ୍ରହଣ କରିଥିଲେ ଜେଟଲି । ଛାତ୍ରଜୀବନରେ ଏବିଭିପି ସହିତ ଜଡିତ ରହି ପ୍ରମୁଖ ଛାତ୍ରନେତା ଭାବେ ପରିଚିତି ହାସଲ କରିଥିଲେ । ଦେଶରେ ଜରୁରୀକାଳୀନ ସ୍ଥିତି ଯେତେବେଳେ ଲାଗୁ ହୋଇଥିଲା ୧୯ ମାସ ଧରି ଜେଲ ଭୋଗିଥିଲେ ଜେଟଲି । ଆଡଭାନୀ ବାଜପେୟୀଙ୍କ ସମୟରୁ ବର୍ତ୍ତମାନର ମୋଦି ସରକାରଙ୍କ ଯାଏଁ ରହିଥିଲା ତାଙ୍କର ରାଜନୈତିକ କ୍ୟାରିୟର । ୧୯୯୬ରେ କେନ୍ଦ୍ରରେ ଯେତେବେଳେ ବାଜପେୟୀଙ୍କ ନେତୃତ୍ୱରେ ସରକାର ଗଢିଥିଲା ବିଜେପି , ସେତେବେଳେ ଅର୍ଥ , ପ୍ରତିରକ୍ଷା, କର୍ପୋରେଟ୍ ଆଫାୟାର୍ସ, ବାଣିଜ୍ୟ ଓ ଶିଳ୍ପ ପରି ପ୍ରମୁଖ ବିଭାଗର ମନ୍ତ୍ରୀ ପଦ ସମ୍ଭାଳିଥିଲେ ।
ମୋଦି ସରକାରଙ୍କ ପ୍ରଥମ ପାଳିରେ ଅର୍ଥ ଓ ପ୍ରତିରକ୍ଷା ବିଭାଗ ଦାୟିତ୍ୱ ବି ତୁଲାଇଥିଲେ । ଏକାଧାରରେ ଜେଟଲି ଥିଲେ ଜଣେ ବିଚକ୍ଷଣ ରାଜନେତା ଓ ଓକିଲ ମଧ୍ୟ । ତାଙ୍କର ଏପରି ପରଲୋକ ରାଜନୈତିକ ମହଲରେ ଏକ ବିରାଟ ଶୂନ୍ୟ ସ୍ଥାନ ସୃଷ୍ଟି କରିବ । ବାଜପେୟୀଙ୍କ ପରେ ଯଦି କେବେ ଦ୍ୱିତୀୟ ଧାଡିର ନେତାଙ୍କୁ ବଛାଯାଏ, ତେବେ ଆଗରେ ଆସିବେ ଜେଟଲି । ଆଜି ତାଙ୍କର ପରଲୋକ ବିଜେପି ପାଇଁ ଜାତୀୟ ରାଜନୀତିରେ ଏକ ବଡ ଝଟକା ହୋଇଛି ।