ଆସାମରେ ବନ୍ୟା ସ୍ଥିତି ଗମ୍ଭୀର । ମୃତ୍ୟୁ ସଂଖ୍ୟା ୬କୁ ବୃଦ୍ଧି, ପାଣିଘେରରେ ୫ଶହ ଗାଁ, ଉଦ୍ଧାରକାର୍ଯ୍ୟରେ ସେନା, NDRF ଓ SDRF ।
କନକ ବ୍ୟୁରୋ : ଆସାମରେ ବନ୍ୟା ସ୍ଥିତି ଏବେ ଭୟଙ୍କର ରୂପ ନେଇଛି । ରାଜ୍ୟର ପ୍ରାୟ ୫ ଶହ ଗ୍ରାମ ସଂପୂର୍ଣ୍ଣ ପାଣି ଘେରରେ ରହିଥିବା ବେଳେ ୬ ଜଣଙ୍କ ମୃତ୍ୟୁ ଘଟିଥିବା ଖବର ମିଳିଛି । ରାଜ୍ୟର ୩୩ଜିଲ୍ଲାରୁ ୨୧ ଜିଲ୍ଲାରେ ପ୍ରାୟ ୮.୭ ଲକ୍ଷ ଲୋକ ବନ୍ୟାରେ ପ୍ରଭାବିତ ହୋଇଛନ୍ତି । ସମସ୍ତ ନଦୀରେ ଜଳସ୍ତର ବିପଦସଙ୍କେତ ଟପି ପ୍ରବାହିତ ହେଉଛି । ଆସାମ ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଏଏସଡିଏମ୍ଏ)ର ଏକ ରିପୋର୍ଟ ଅନୁଯାୟୀ ୨୧ ଜିଲ୍ଲାର ୧୫୫୬ ଗ୍ରାମରେ ୮.୬୯ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ବନ୍ୟା ହେତୁ ଧେମାଜୀ, ଲକ୍ଷ୍ମୀପୁର, ବିଶ୍ବନାଥ, ସୋନିତପୁର, ଦାରାନ୍ଦ, ବକ୍ସା, ବାରପେଟା, ନଳବରୀ, ଚିରାଙ୍ଗ୍, ବେଙ୍ଗାଇଗାଓଁ, କୋକ୍ରାଝର, ମୋରିଗାଓଁ, ହୋଜାଇ, ନାଗାଓଁ, ଗୋଲାଘାଟ, ମଜୁଲି, ଜୋରହାଟ, ଦିବ୍ରୁଗଡ଼, ତିନସୁକିଆ ଏବଂ ଶିବସାଗରର ଜିଲ୍ଲା ଅଧିକ ପ୍ରଭାବିତ ହୋଇଛି । ୭,୬୦୦ରୁ ଅଧିକ ଲୋକ ଏବେ ଘର ଛାଡ଼ି ୬୮ଟି ଆଶ୍ରୟସ୍ଥଳରେ ରହୁଛନ୍ତି । ବନ୍ୟା ହେତୁ ୨୭,୮୬୪ ହେକ୍ଟର ଚାଷଜମି ମଧ୍ୟ ପ୍ରଭାବିତ ହୋଇଛି । ଗୋଲାଘାଟ ଏବଂ ଦିମା ହାସାଓ ଜିଲ୍ଲାରେ ୩ ଜଣଙ୍କ ମୃତ୍ୟୁ ହୋଇଥିବା ବେଳେ ବୋକାଖାଟ ରେଭିନ୍ୟୁ ସର୍କଲ୍ରେ ୨ ଜଣଙ୍କ ମୃତ୍ୟୁ ହୋଇଛି । ସେହିପରି ଦିମା ହସାଓ ଜିଲ୍ଲାର ହାଫଲଙ୍ଗ୍ରେ ଭୂସ୍ଖଳନ ଯୋଗୁଁ ଜଣଙ୍କ ମୃତ୍ୟୁ ହୋଇଛି । ସେନା, ଏନ୍ଡିଆରଏଫ୍ ଏବଂ ଏସ୍ଡିଆରଏଫ୍ ପକ୍ଷରୁ ବିଭିନ୍ନ ସ୍ଥାନରେ ଉଦ୍ଧାରକାର୍ଯ୍ୟ ଜାରି ରହିଛି । ଏଯାବତ୍ ରାଜ୍ୟରେ ୧୧୬୦ ଲୋକଙ୍କୁ ବନ୍ୟା ପ୍ରବଣ ଅଞ୍ଚଳରୁ ଉଦ୍ଧାର କରାଯାଇଛି ।