କନକ ବ୍ୟୁରୋ : ବାଙ୍କୀରେ ବି ବନ୍ୟାସ୍ଥିତି ଗମ୍ଭୀର ରହିଛି । ମହାନଦୀର ଜଳସ୍ତର କମିଥିଲେ ବି ୬ଟି ପଂଟାୟତର ୭ଟ ଗାଁ ପାଣିଘେରରେ ରହିଛି । ବିଲିପଡା ପଂଚାୟତ ଅଧିକ କ୍ଷତିଗ୍ରସ୍ତ ହୋଇଛି । ତାଳବସ୍ତ ପଂଚାୟତର ଦୁଇଟି ଗାଁ ଓ ସିମିଳିପୁର ପଂଚାୟତର ଗୋଟିଏ ଗାଁ କ୍ଷତିଗ୍ରସ୍ତ ହୋଇଛି । ପ୍ରଶାସନ ଲୋକଙ୍କ ପାଖରେ ପଂହଚିପାରିନାହିଁ । ସେପଟେ ରାଜୁଅ ନଦୀରେ ବନ୍ୟା ପରେ ଖୋର୍ଧା ଜିଲ୍ଲାରେ ଗୋଟିଏ ମାସରେ ଦ୍ୱିତୀୟ ଥର ପାଇଁ ଆସିଛି ବନ୍ୟା । ଏହି ବନ୍ୟା ପାଇଁ ଖୋର୍ଧାର ଓରବରସିଂ, ନରଣଗଡ ପଂଚାୟତର ୧୫ଟି ଗାଁରେ ପଶିଛି ବନ୍ୟାପାଣି ।
Kanak News is now on WhatsApp
Join and get latest news updates delivered to you via WhatsApp
ଦିନକୁ ଦିନ ରାଜୁଅ ନଦୀରେ ବନ୍ୟା ଜଳ ସ୍ତର ବଢୁଥିବାରୁ ଅଂଚଳରେ ବି ବନ୍ୟା ଜଳସ୍ତର ବଢିବାରେ ଲାଗିଛି । ହରିମୂଳ ଗାଁ ଏବେ ସଂପୂର୍ଣ୍ଣ ରୂପେ ବାହ୍ୟ ଜଗତରୁ ବିଛିନ୍ନ ହୋଇଯାଇଛି । ଏଠାକୁ ପହଁଚିବାକୁ ଡଙ୍ଗା ହିଁ ଏକମାତ୍ର ଭରସା । ଲୋକେ ନିତ୍ୟ ବ୍ୟବହାର ସାମଗ୍ରୀ ପାଇଁ ଡଙ୍ଗା ଉପରେ ଭରସା କରୁଛନ୍ତି । ସେପଟେ ବନ୍ୟା ପ୍ରଭାବିତ ଅଂଚଳକୁ ମେଡିକାଲ ଟିମ୍ ପହଁଚି ବିପନ୍ନଙ୍କୁ ସ୍ୱାସ୍ଥ୍ୟସେବା ଯୋଗାଇ ଦେବାକୁ ଉଦ୍ୟମ ଆରମ୍ଭ କରିଥିବା ଜଣାପଡିଛି । ଏପଟେ ଜଳବନ୍ଦୀରେ ପୁରୀ ଜିଲ୍ଲା କଣାସ ବ୍ଲକର ୪ଟି ଗ୍ରାମ ପଂଚାୟତ ।
ଦୟା ଓ ରାଜୁଅ ନଦୀରେ ବନ୍ୟା ଆସିବା ପରେ ଏହି ସାରା ଅଂଚଳ ଜଳବନ୍ଦୀ ହୋଇଯାଇଛି । ବୁଡି ଯାଇଛି ପୋଲ । ଗାଁ ଦାଣ୍ଡରେ ଲହଡି ମାରୁଛି ବନ୍ୟା ପାଣି । ଘର ଭିତରେ ଆଣ୍ଠୁଏ ପାଣି । ମାସେ ନପୁରୁଣୁ ଏ ହେଉଛି କଣାସ ବ୍ଲକରେ ଦ୍ୱିତୀୟ ବନ୍ୟା । କଣାସ ବ୍ଲକର ୪ଟି ପଂଚାୟତରେ ବନ୍ୟା ପାଣି ପଶିଥିବାରୁ ଲୋକେ ଅନେକ ସମସ୍ୟାର ସମ୍ମୁଖୀନ ହେଉଛନ୍ତି । ଦୋକନ୍ଦା, କେରା ବଡାସ, ଗୋପିନାଥପୁର ପଂଚାୟତର ବିଭିନ୍ନ ଗାଁ ଏବେ ଦୟା ଓ ରାଜୁଆ ନଦୀର ବନ୍ୟା ଜଳରେ ଜଳବନ୍ଦୀ ହୋଇଛି । ଗାଁରେ ଘର ଗୁଡିକରେ ପାଣି ପସିଥିବାବେଳେ ସ୍କୁଲ ଘରେ ବି ପାଣି ପସିଛି । ସବୁଠି ଆଣ୍ଠୁଏ ଉଚ୍ଚରେ ପାଣି ଚାଲୁଛି । କହିବାକୁ ଗଲେ ପୁରା ଅଂଚଳ ଜଳବନ୍ଦୀ ।
ଯୁଆଡେ ଅନେଇଲେ କେବଳ ପାଣି ଆଉ ପାଣି । ବନ୍ୟାରେ ସବୁ ରାସ୍ତା ବୁଡି ଯାଇଥିବାରୁ ପୁରା ଅଂଚଳକୁ ଗମନାଗମନ ପୁରା ଠପ୍ ହୋଇଯାଇଛି । ସେପଟେ ବିପନ୍ନଙ୍କ ନିକଟରେ ପ୍ରଶାସନ ପହଁଚି ନଥିବା ଅଭିଯୋଗ ଆସିଛି । ପାଣିରେ ସବୁ କିଛି ବୁଡିବା ପରେ ବିପନ୍ନଙ୍କ ଭରସା ଏବେ ଶୁଖିଲା ଖାଦ୍ୟ । ଦୟା ଓ ରାଜୁଅ ନଦୀରେ ଜଳସ୍ତର ବଢୁଥିବାରୁ ଲୋକଙ୍କ ଦୁର୍ଦ୍ଦଶା ବି ବଢିବାରେ ଲାଗିଛି । ସେପଟେ ବନ୍ୟା ସ୍ଥିତି ଉପରେ ପ୍ରଶାସନ ନଜର ରଖିଥିବା କହିଛନ୍ତି ତହସିଲଦାର । ପାଣି ଘେରରେ ଥିବା ପଂଚାୟତ ଗୁଡିକ ଉପରେ ଖାସ୍ ନଜର ରହିଛି । ବନ୍ୟା ବିପନ୍ନଙ୍କୁ ସମସ୍ତ ସରକାରୀ ସହାୟତା ଯୋଗାଇ ଦିଆଯିବ ବୋଲି କହିଛନ୍ତି କଣାସ ବିଡିଓ ।