ଆସାମରେ ବନ୍ୟା । ବ୍ରହ୍ମପୁତ୍ର ନଦୀରେ ପ୍ରବଳ ପାଣି ଆସିବାରୁ ବନ୍ୟାସ୍ଥିତି, ତଳିଆ ଅଞ୍ଚଳର ଲୋକମାନଙ୍କୁ ସତର୍କ ରହିବା ପାଇଁ ପରାମର୍ଶ

କନକ ବ୍ୟୁରୋ : ଦେଶରେ ଗୋଟିଏ ପରେ ଗୋଟିଏ ରାଜ୍ୟରେ ବନ୍ୟା ହେବାରେ ଲାଗିଛି । ମିଳିଥିବା ସୂଚନା ଅନୁସାରେ ଅରୁଣାଂଚଳ ପ୍ରଦେଶରେ ଲଗାତାର ବର୍ଷା ଫଳରେ ବ୍ରହ୍ମପୁତ୍ର ଏବଂ ଏହାର ସହଯୋଗୀ ନଦୀରେ ଜଳସ୍ତର ବୃଦ୍ଧି ପାଇଛି । ଫଳରେ ଆସାମରେ ୬ଟି ଜିଲ୍ଲାରେ ଭୟାନକ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଯେଉଁଥିରେ ଏକ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି । ବ୍ରହ୍ମପୁତ୍ର ନଦୀରେ ପ୍ରବଳମାତ୍ରାରେ ପାଣି ଆସିବାରୁ ଅନେକ ତଳିଆ ଅଞ୍ଚଳରେ ଲୋକମାନଙ୍କ ଘର ଭିତରେ ପାଣି ପଶିଯାଇଛି ।  ।

ଆସାମର ବିପର୍ଯ୍ୟୟ ପରିଚାଳନା ବିଭାଗ ଏକ ରିପୋର୍ଟରେ କହିଛି କି, ରାଜ୍ୟର ଧେମାଜୀ, ଲକ୍ଷ୍ମୀପୁର, ବିଶ୍ୱନାଥ, ବାରପେଟା, ମାଜୁଲୀ ଏବଂ ଦିବ୍ରୁଗଡ ଜିଲ୍ଲାରେ ବନ୍ୟାର ଭୟାନକ ରୂପ ଦେଖିବାକୁ ମିଳିଛି । ବର୍ତ୍ତମାନ ପର୍ଯ୍ୟନ୍ତ କେହି ମୃତ୍ୟୁବରଣ କରିଥିବା ଖବର ଆସିନାହିଁ । କିନ୍ତୁ ୧,୩୮,୯୮୫ ଲୋକ ପ୍ରଭାବିତ ହୋଇଥିବା ରିପୋର୍ଟରେ ଦର୍ଶାଯାଇଛି । ତେବେ ଆସାମରେ ବନ୍ୟା ଘେରରେ ଅନେକ ଲୋକ ଫସି ରହିଛନ୍ତି । ସେମାନଙ୍କୁ ସଠିକ ଭାବରେ ଉଚ୍ଚସ୍ଥାନକୁ ନିଆଯିବା ସହ ସରକାରଙ୍କ ସମସ୍ତ ସୁବିଧା ଯୋଗାଇ ଦିଆଯିବ ବୋଲି ସ୍ଥାନୀୟ ପ୍ରଶାସନର ଜଣେ ବରିଷ୍ଠ ଅଧିକାରୀ ସୂଚନା ଦେଇଛନ୍ତି । ତେବେ ଗତବର୍ଷ ମଧ୍ୟ ଆସାମରେ ବନ୍ୟା ହୋଇ ଅନେକ କ୍ଷତି ହୋଇଥିଲା । ଆସାମ ସରକାର କହିଛନ୍ତି ଯେ, ବର୍ତ୍ତମାନ ସମୟରେ କୈାଣସି କ୍ଷୟକ୍ଷତିର ସୂଚନା ମିଳିନାହିଁ । ପାଣି କମିଲେ ସମସ୍ତ ତଥ୍ୟ ଜଣାପଡିବ ବୋଲି ସରକାର କହିଛନ୍ତି ।