କନକ ବ୍ୟୁରୋ : ମୋତେ ଯେତେ ମାଠିବୁ ମାଠ୍, ମୁଁ ସେଇ ଦରପୋଡା କାଠ୍ । ଉପରୋକ୍ତ ଫଟୋଟି ଦେଖିଲା ପରେ ଏଭଳି ଢଗ ଆପଣାଛାଏଁ ମନକୁ ଚାଲି ଆସୁଛି । ଗୋଟିଏ ପଟେ ହକି ବିଶ୍ୱକପ ପାଇଁ ପୂରା ରାଜଧାନୀକୁ ନୂଆ ବୋହୂର ରୂପ ଦେବାକୁ ଚେଷ୍ଟା କରାଯାଉଛି । କାନ୍ଥ ବାଡ ଠାରୁ ଆରମ୍ଭ କରି ରାସ୍ତାଘାଟ ସବୁକୁ ସୁନ୍ଦର ଭାବରେ ସଜାଯାଉଛି । ଆଉ ଏହା ପଛର କାରଣ ହେଉଛି, ଯିଏ ବି ଓଡିଶା ଆସିବ କିଛି ସୁନ୍ଦର ସ୍ମୃତି ସାଉଁଟି ଓଡିଶାରୁ ଫେରିବ । କିନ୍ତୁ ରାସ୍ତାକଡରେ ପରିସ୍ରା କରିବାକୁ ନିଜର ଜନ୍ମସିଦ୍ଧ ଅଧିକାର ବୋଲି ଧରି ନେଇଥିବା କିଛି ଅସଭ୍ୟ ବ୍ୟକ୍ତି ନିଜର ପ୍ରକୃତି ବଦଳାଇବାକୁ ଚାହୁଁନାହାନ୍ତି । ଆଉ ସେହିଭଳି ଜଣେ ବ୍ୟକ୍ତିଙ୍କ କାରାନାମା ଏବେ ସୋସିଆଲ ମିଡିଆରେ ଭାଇରାଲ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ହକି ବିଶ୍ୱକପକୁ ଆଉ ଦିନ କେଇଟା ବାକି ଥିବା ବେଳେ ଏବେ ରାଜଧାନୀର କାନ୍ଥ ବାଡରେ ପେଣ୍ଟିଂ ମାଧ୍ୟମରେ ରାଜ୍ୟର ଐତିହ୍ୟ ଓ ସଂସ୍କୃତିକୁ ପ୍ରଚାର କରିବାକୁ ଉଦ୍ୟମ କରାଯାଉଛି । କିନ୍ତୁ ସେହି ପେଣ୍ଟିଂକୁ ଖରାପ କରିବାକୁ ଏହା ଉପରେ ମଳତ୍ୟାଗ କରିବାକୁ ମଧ୍ୟ ପଛାଉନାହାନ୍ତି ରାଜଧାନୀ ବାସିନ୍ଦା । ତାହା ବି ପୁଣି ଦିନ ଦ୍ୱିପ୍ରହରରେ । ଟିକିଏ ପରିଷ୍କାର ସ୍ଥାନ ଦେଖିଲେ ପରିସ୍ରା କରିବାର ଅଭ୍ୟାସ ଏଯାଏଁ ଛାଡି ପାରି ନାହାନ୍ତି ଏଭଳି କିଛି ବିବେକହୀନ ବ୍ୟକ୍ତି । ନା ଏମାନଙ୍କୁ ଲଜ୍ଜା ଅଛି ନା କାହାର ଖାତିର । କାହାକୁ ପରବାଏ ନକରି ରାସ୍ତାକଡର କାନ୍ଥରେ ହୋଇଥିବା ହକି ଷ୍ଟିକର ପେଣ୍ଟିଂ ଉପରେ ମଳତ୍ୟାଗ କରୁଛନ୍ତି ଏହି ବ୍ୟକ୍ତି ଜଣକ । ଆଉ ଏହି ସମୟର ଫଟୋ କ୍ୟାମେରାରେ କଏଦ ହେବା ପରେ ସୋସିଆଲ ମିଡିଆରେ ଭାଇରାଲ ହୋଇଛି । ଦେଶର ଏକ ନମ୍ବର ସ୍ମାର୍ଟସିଟିର ସ୍ମାର୍ଟ ବାସିନ୍ଦାଙ୍କ ଏହି ଅଭ୍ୟାସ ଦେଖିବା ପରେ ଲାଜରେ ମୁହଁ ତଳକୁ ହୋଇଯାଉଛି ।
ଏହି ଫଟୋ ସୋସିଆଲ ମିଡିଆରେ ଭାଇରାଲ ହେବା ପରେ କିଛି ୟୁଜର୍ସ ଏହି ଅସଭ୍ୟ ବ୍ୟକ୍ତିଙ୍କୁ ମନଭରି ଗାଳି ଦେଇଛନ୍ତି । ଜଣେ ୟୁଜର୍ସ ଲେଖିଛନ୍ତି, ଉକ୍ତ ବ୍ୟକ୍ତି ଜଣଙ୍କ ହକି ଷ୍ଟିକକୁ ଗଛ ବୋଲି ବୋଧେ ଭାବୁଛନ୍ତି । ଅନ୍ୟଜଣେ କହିଛନ୍ତି, ତାଙ୍କୁ ଲାଜ ଲାଗିବା ଦରକାର । ଗୋଟିଏ ପଟେ ହକି ବିଶ୍ୱକପ୍ ପାଇଁ ଭୁବନେଶ୍ୱରରେ ପୁରୁଷଙ୍କ ପାଇଁ ୩୦ଟି ସ୍ମାର୍ଟ ଟଏଲେଟର ବ୍ୟବସ୍ଥା କରିଛନ୍ତି ବିଏମସି ଓ ବିଡିଏ । ଲୋକେ ଯେପରି ବାହାରେ ମଳତ୍ୟାଗ ନ କରିବେ ସେଥିପାଇଁ ଏଭଳି ଅତ୍ୟାଧୁନିକ ବ୍ୟବସ୍ଥା କରାଯାଇଛି । କିନ୍ତୁ ଆମ ରାଜଧାନୀବାସୀ ଟଏଲେଟ ବଦଳରେ ଫାଙ୍କା ସ୍ଥାନ ଦେଖି ମଳତ୍ୟାଗ କରିବାକୁ ବେଶ ପସନ୍ଦ କରୁଛନ୍ତି । ଯିଏ ଯେଉଁଠି ପାଇଲା ମଳତ୍ୟାଗ କରୁଛି ।
ତେବେ ଏହି ଖବର ପରିବେଷଣ କରି ଉପରୋକ୍ତ ବ୍ୟକ୍ତିଙ୍କୁ ସମାଲୋଚନା କରିବା କିମ୍ବା ଅସଭ୍ୟ କହିବା ଆମର ଉଦ୍ଦେଶ୍ୟ ନୁହେଁ । କିନ୍ତୁ ଯେତେବେଳେ ରାଜଧାନୀ ନୂଆ ରୂପରେ ସଜେଇ ହେବା ସହ ସ୍ୱଚ୍ଛତା ଓ ବିକାଶ ଦିଗରେ ଆଗକୁ ବଢୁଛି ସେହିଭଳି ସମୟରେ ରାଜଧାନୀବାସୀ ହିସାବରେ ଏହାକୁ ଗ୍ରହଣ କରିନେବା କଣ ଆମର କର୍ତ୍ତବ୍ୟ ନୁହେଁ । ଦେଶର ୧ ନମ୍ବର ସ୍ମାର୍ଟ ସିଟି ସ୍ୱଚ୍ଛତାରେ ୧ ନମ୍ବରରେ ରହୁ ଏହା କଣ ଭୁବନେଶ୍ୱର ବାସିନ୍ଦା ଚାହୁଁନାହାନ୍ତି । ସ୍ୱାର୍ଟ ସିଟିକୁ ସ୍ୱଚ୍ଛ କରିବାକୁ ଯେତେବେଳେ ସ୍ମାର୍ଟ ଟଏଲେଟର ବ୍ୟବସ୍ଥା କରାଯାଉଛି ସେତେବେଳେ ଏହାର ବ୍ୟବହାର କରିବା ବଦଳରେ ରାସ୍ତା କଡରେ ପରିସ୍ରା କରିବା କେତେଦୂର ଠିକ୍ ।