ଦିଲ୍ଲୀପ ଦଳ ଛାଡିପାରନ୍ତି, ହେଲେ ସେ ଉଠାଇଥିବା ପ୍ରସଙ୍ଗ ବିଜେପିର ପିଛା ଛାଡିବନି ।

ସୁନ୍ଦରଗଡ ଥିଲା ଏକମାତ୍ର ଲୋକସଭା ଆସନ, ଯେଉଁଥିରୁ ଜିତି ଜୁଏଲ ଓରାମ କେନ୍ଦ୍ରରେ ମନ୍ତ୍ରୀ ଅଛନ୍ତି । ଏହି ବିଜୟ ପଛରେ ଦିଲ୍ଲୀପ ରାୟଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା ।

234

୨୦୧୪ରେ କିଏ କଣ ପ୍ରତିଶ୍ରୁତି ଦେଇଥିଲା, କେତେ ପୂରଣ ହେଲା କେତେ ଅଧୁରା ରହିଗଲା ତାର ସମୀକ୍ଷା ଭିତରେ ଏବେ ରାଉରକେଲାରୁ ଉଠିଥିବା ଯୁକ୍ତି ବିଜେପି ପାଇଁ ଅଶ୍ୱସ୍ତିକର ବାତାବରଣ ସୃଷ୍ଟି କରିଛି । ଏଠି କଥାଟି ଭିନ୍ନ କାରଣ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରାଉରକେଲା ମାଟିରେ ଠିଆ ହୋଇ ଯେଉଁ ପ୍ରତିଶ୍ରୁତି ଦେଇଥିଲେ, ତାହା ଅଧୁରା ରହିଗଲା ବୋଲି ଧାରଣା ସୃଷ୍ଟି କରିଛନ୍ତି ବିଧାୟକ ଦିଲ୍ଲୀପ ରାୟ । ଦେଶରେ ଶାସନ ଚାଲିଛି ବିଜେପିର, ସୁନ୍ଦରଗଡରୁ ସାଂସଦ ବିଜେପିର, ରାଉରକେଲା ବିଧାୟକ ବିଜେପିର । ହେଲେ ମୋଦି ଦେଇଥିବା କଥା କିନ୍ତୁ ପୂରଣ ହୋଇପାରିଲା ନାହିଁ ।


ମାଟି, ପାର୍ଟିର ଲଢେଇ
ବିଜେପିର ଅଦର୍ଶ, ଆଗ ମାଟି ପରେ ପାର୍ଟି । ବୋଧହୁଏ ପରିବର୍ତ୍ତିତ ସ୍ଥିତି ଆଉ କ୍ଷମତା ଆହରଣର ଅହେତୁକ ଆଗ୍ରହ ଭିତରେ ବିଜେପିର ନୀତି ବଦଳିଛି ବୋଲି କୁହାଯାଇପାରେ । ହେଲେ ଦିଲ୍ଲୀପ ରାୟ କିନ୍ତୁ ଏଥିରୁ ବିଚ୍ୟୁତ ହୋଇନାହାନ୍ତି । ମାଟି ପାଇଁ ଅର୍ଥାତ୍ ରାଉରକେଲା ବିକାଶର ପ୍ରସଙ୍ଗକୁ ନେଇ ସେ ବିଧାୟକ ପଦକୁ ମଧ୍ୟ ଛାଡିଦେଇ ପାରନ୍ତି ବୋଲି ସଂକେତ ଦେଇସାରିଲେଣି ।


ବିଜୟ ପଛରେ ଦିଲ୍ଲୀପ!
ସୁନ୍ଦରଗଡ ଥିଲା ଏକମାତ୍ର ଲୋକସଭା ଆସନ, ଯେଉଁଥିରୁ ଜିତି ଜୁଏଲ ଓରାମ କେନ୍ଦ୍ରରେ ମନ୍ତ୍ରୀ ଅଛନ୍ତି । ଏହି ବିଜୟ ପଛରେ ଦିଲ୍ଲୀପ ରାୟଙ୍କ ଭୂମିକା ଗୁରୁତ୍ୱପୂର୍ଣ୍ଣ ଥିଲା । ସୁନ୍ଦରଗଡ ଲୋକସଭା ନିର୍ବାଚନ ମଣ୍ଡଳୀ ଅଧୀନରେ ରାଉରକେଲା ହିଁ ଏକମାତ୍ର ବିଧାନସଭା କ୍ଷେତ୍ର ଥିଲା ଯେଉଁଥିରୁ ବିଜେପି ବିଧାୟକ ଭାବେ ଦିଲ୍ଲୀପ ରାୟ ନିର୍ବାଚିତ ହୋଇଥିଲେ । ୩ଟି ଆସନରେ ବିଜେପି ତୃତୀୟ, ୨ଟି ଆସନରେ ଦ୍ୱିତୀୟ ଏବଂ ଗୋଟିଏ ଆସନରେ ଚତୁର୍ଥ ସ୍ଥାନରେ ଥିଲା ।

Dilip-Ray-
ରାଉରକେଲା ପାଇଁ ଜିତିଥିଲେ ଜୁଏଲ!
ଗଣିତ ବେଶ ସ୍ପଷ୍ଟ । ବିଜେଡିର ଦିଲ୍ଲୀପ ତିର୍କୀଙ୍କୁ ମାତ୍ର ୧୮, ୮୨୯ ଖଣ୍ଡ ଭୋଟରେ ହରାଇ ସାଂସଦ ଭାବେ ଜୁଏଲ ଓରାମ ନିର୍ବାଚିତ ହୋଇଥିଲେ । ବିଜୟ ପଛରେ ରାଉରକେଲା ବିଧାନସଭା କ୍ଷେତ୍ରର ଅବଦାନ ବେଶ ଗୁରୁତ୍ୱପୂର୍ଣ୍ଣ ଥିଲା । ସୁନ୍ଦରଗଡ ସଂସଦୀୟ କ୍ଷେତ୍ର ଅଧୀନରେ ଯେଉଁ ଲିଡ୍ ଜୁଏଲ ପାଇଥିଲେ, ସେଥିପାଇଁ ହିଁ ସେ ଏକମାତ୍ର ବିଜେପି ସାଂସଦ ଭାବେ ଓଡିଶାରୁ ଜିତିଥିଲେ ।
ଜୁଏଲ ଓରାମ ସୁନ୍ଦରଗଡ ସଂସଦୀୟ କ୍ଷେତ୍ର ଅଧୀନରେ ଆସୁଥିବା ତଳସରା ବିଧାନସଭା କ୍ଷେତ୍ରରେ ମାତ୍ର ୧୩ ଖଣ୍ଡ ଭୋଟରେ ଆଗୁଆ ଥିବା ବେଳେ ସୁନ୍ଦରଗଡ, ରାଜଗାଙ୍ଗପୁରରେ ତୃତୀୟ ସ୍ଥାନରେ, ରଘୁନାଥପଲ୍ଲୀରେ ଦ୍ୱିତୀୟ ସ୍ଥାନରେ, ବୀରମିତ୍ରପୁରରେ ପାଖାପାଖି ୭ ହଜାର ଭୋଟରେ ଆଗୁଆ ଥିଲେ । ହେଲେ ରାଉରକେଲାରୁ ଯେଉଁ ବଡ ସମର୍ଥନ ମିଳିଥିଲା ଜୁଏଲଙ୍କୁ ସେଥିରେ ରାଉରକେଲାର ଅବଦାନ ବେଶ ବଡ ଥିଲା । ପାଖାପାଖି ୨୨ ହଜାର ଭୋଟରେ ଏଠି ଜୁଏଲ ନିଜ ନିକଟତମ ପ୍ରତିଦ୍ୱନ୍ଦ୍ୱୀଙ୍କ ଠାରୁ ଆଗରେ ଥିଲେ । ଯାହା ତାଙ୍କ ବିଜୟର ରାସ୍ତାକୁ ସୁଗମ କରିଥିଲା ।


ଦିଲ୍ଲୀପଙ୍କୁ ଅଣଦେଖା!
ତଥ୍ୟ ବାବଦରେ ଆପଣଙ୍କୁ ଜଣାଇବା ଏଥିପାଇଁ ଗୁରୁତ୍ୱପୂର୍ଣ୍ଣ ଥିଲା କାରଣ, ଯେଉଁ ବିଧାନସଭା ନିର୍ବାଚନ ମଣ୍ଡଳୀର ଅବଦାନ ପାଇଁ ବିଜେପି ଓଡିଶାର ତାର ସାଂସଦ ଖାତା ଖୋଲିଥିଲା, ସେହି ନିର୍ବାଚନ ମଣ୍ଡଳୀକୁ ଆଜି ଅଣଦେଖା କରାଯାଉଥିବା ଅଭିଯୋଗ ହୋଇଛି । ଦିଲ୍ଲୀପ ରାୟ କହିଛନ୍ତି, ରାଉରକେଲାର ବିକାଶ ହେଲେ କାଳେ ସେ ବାହାବା ନେଇଯିବେ, ସେଥିପାଇଁ ବ୍ରାହ୍ମଣୀ ସେତୁ ଓ ଆଇଜିଏଚ କାମ ଆଗକୁ ବଢୁନାହିଁ । ଏପରିକି ସୁନ୍ଦରଗଡ ସଂସଦୀୟ କ୍ଷେତ୍ରରେ ବିଜେପି ଜିତୁ, ଏକଥା ଦଳର ଜଣେ ତୁଙ୍ଗ ନେତା କୁଆଡେ ଚାହୁଁନାହାନ୍ତି ।

dilip-ray
ବିଜେପିର ଶତ୍ରୁ କିଏ?
ସ୍ୱାଭାବିକ ଭାବେ ପ୍ରଶ୍ନ ଉଠିବ, କିଏ ସୁନ୍ଦରଗଡରେ ବିଜେପିର ବିଜୟ ବାନା ଉଡାଇବାରେ ବାଧକ ସାଜୁଛି । ଦିଲ୍ଲୀପ ରାଏ କାହା ଆଡକୁ ଇଙ୍ଗିତ କରୁଛନ୍ତି? ରାଉରକେଲା ବିକାଶରେ କିଏ ପ୍ରତିବନ୍ଧକ ଆଣୁଛି? ଯଦିଓ ଦିଲ୍ଲୀପ କାହା ନଁ ନେଇନାହାନ୍ତି ତେବେ ଏତିକି ବୁଝିବା ଯଥେଷ୍ଟ, ଦିଲ୍ଲୀପଙ୍କ ଇଙ୍ଗିତ ବିଜେପିର ତଥାକଥିତ କ୍ଷମତାକେନ୍ଦ୍ର ଆଡକୁ ଯାଉଛି । ଏପରିକି କୋଇଲା ବ୍ଲକ ଆବଂଟନ ମାମଲାରେ ଦିଲ୍ଲୀପଙ୍କୁ ଫଶାଇବାକୁ ଜଣେ ପ୍ରଭାବଶାଳୀ ନେତାଙ୍କ ଭୂମିକା ଥିବା ମଧ୍ୟ ଚର୍ଚ୍ଚା ହୋଇଥିଲା ।

dilip ray
ଦିଲ୍ଲୀପଙ୍କୁ ଅଣଦେଖା କାହିଁକି?
ଦୀର୍ଘ ଦିନ ଧରି ଦିଲ୍ଲୀପ ରାୟ ଦଳରେ ଥିଲେ ବି କୈାଣସି ବଡ କାର୍ଯ୍ୟକ୍ରମରେ ତାଙ୍କୁ ଦେଖିବାକୁ ମିଳୁନଥିଲା । ଏପରିକି ସାଂଗଠନିକ କାର୍ଯ୍ୟକ୍ରମରେ ସେ ସାମିଲ ହେଉନଥିଲେ । ରାଜ୍ୟ ସ୍ତରର ନେତା ମଧ୍ୟ ତାଙ୍କୁ ଲୋଡୁନଥିଲେ । ଯାହା ସ୍ପଷ୍ଟ ଦର୍ଶାଉଥିଲା ଦିଲ୍ଲୀପ ଆଉ ବିଜୟଙ୍କ ଭିତରେ ସବୁ କିଛି ଠିକ ଚାଲିନଥିଲା ।
୨୦୦୯ ନିର୍ବାଚନର ଠିକ ପୂର୍ବରୁ ଯେତେବେଳେ ବିଜୟ ମହାପାତ୍ର ଓ ଦିଲ୍ଲୀପ ରାଏ ବିଜେପିରେ ସାମିଲ ହୋଇଥିଲା, ସେହି ସ୍ଥିତି ଆଉ ଉତ୍ସବର ମାହୋଲକୁ ମନେ ପକାଇଲେ ଢେର କିଛି ଫରକ ଆପଣ ପାଇବେ । ସେତେବେଳେ ସ୍ୱାଗତ କରିବାକୁ ଯେଉଁ ତତ୍ପରତା ଆଉ ମାହୋଲ ଦଳ ପକ୍ଷରୁ ସୃଷ୍ଟି କରାଯାଇଥିଲା, ଆଜି ସେସବୁ ଉଭେଇ ଯାଇଛି । ଗୋଟିଏ କଥା ସ୍ପଷ୍ଟ ହେଉଛି, ବିଜେପିରେ ଆଜି ସଂପୂର୍ଣ୍ଣ ଅଲୋଡା ହୋଇ ଯାଇଛନ୍ତି ଏହି ଦୁଇ ନେତା ।


କଥା ରଖିଲେନି ମୋଦି!
ସ୍ୱାଭାବିକ ଭାବେ ଯେତେବେଳେ ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏକ ପ୍ରତିଶ୍ରୁତି ଦିଅନ୍ତି, ସେତେବେଳେ ସମସ୍ତଙ୍କର ଆଶା ଥାଏ, ଏହା ନିଶ୍ଚିତ ପକ୍ଷେ ପୂରଣ ହେବ । ନଚେତ ଲୋକଙ୍କ ମନରେ ଧାରଣା ତିଆରି ହେବ, ମୋଦି କଥା ଦେଇ ଭୂଲିଯାଆନ୍ତି । ଆଜି ଠିକ ସେଭଳି ଏକ ସ୍ଥିତି ସୃଷ୍ଟି ହୋଇଛି, ଯାହା ମୋଦିଙ୍କ କଥାର ବିଶ୍ୱସନୀୟତା ଉପରେ ପ୍ରଶ୍ନଚିହ୍ନ ସୃଷ୍ଟି କରିଛି ।

ବିଜେପିରେ କେହି ଅଲୋଡା ନୁହେଁ । ଦଳ କାହାକୁ ଅପମାନିତ କରିନି । ଦଶ ବର୍ଷ ଧରି ୟୁପିଏ ସରକାର ଟେଣ୍ଡର କରିକି ମଧ୍ୟ ବ୍ରାହ୍ମଣୀ ସେତୁ କରିନଥିଲେ । ମୋଦି ସରକାର ଆସିବା ପରେ ବ୍ରାହ୍ମଣୀ ସେତୁ ଓ ଆଇଜିଏଚ କାମ ଆରମ୍ଭ ହୋଇଛି ।
ଗୋଲକ ମହାପାତ୍ର, ବିଜେପି ନେତା

ଦିଲ୍ଲୀପଙ୍କ ରାସ୍ତାରେ ବିଜୟ
ରାଜ୍ୟ ରାଜନୀତିରେ ଉଭୟ ଦିଲ୍ଲୀପ ରାଏ ଓ ବିଜୟ ମହାପାତ୍ରଙ୍କ ଦବଦବା ଢେର ଅଧିକ । ଆଜି ବି ଏହି ଦୁଇ ବିଜୁ ଅନୁଗତ ନେତାଙ୍କ ରାଜନୈତିକ ବିଚକ୍ଷଣତା ପ୍ରତିପକ୍ଷକୁ ମାତ୍ ଦେବଇ ପାଇଁ ଯଥେଷ୍ଟ । ଦିଲ୍ଲୀପଙ୍କ ପରେ ଏବେ ବିଜୟ ସାମ୍ନାକୁ ଆସିଛନ୍ତି ।

ଦିଲ୍ଲୀପ ଯେଉଁ ପ୍ରଶ୍ନ ଉଠାଇଛନ୍ତି, ସେଥିରେ ଯଥାର୍ଥତା ରହିଛି । ବହୁ ଆଗରୁ ସରକାର ଓ ଦଳ ଏ ବାବଦରେ ଚିନ୍ତା କରିବା ଦରକାର ଥିଲା । ଏବେ ବହୁତ ବିଳମ୍ବ ହୋଇଗଲାଣି । ପ୍ରତ୍ୟେକ ବ୍ୟକ୍ତିର ନିଜ ବିଷୟରେ ନିଷ୍ପତି ନେବାର ସ୍ୱାଧୀନତା ଅଛି । ଜଣେ ବିଧାୟକ ଅପମାନିତ ହେବା ଅନୁଭବ କରିଥିବେ ତେଣୁ ଏମିତି କହିଛନ୍ତି । ଦୁଇ ଜଣ ଆଲୋଚନା କରି ପରର୍ବତୀ ନିଷ୍ପତି ଜଣାଇବୁ ।
ବିଜୟ ମହାପାତ୍ର, ବିଜେପି ନେତା

 

କୁଆଡେ ଯିବେ ବିଜୟ-ଦିଲ୍ଲୀପ?

ଗୋଟିଏ କଥା ସ୍ପଷ୍ଟ, ଦିଲ୍ଲୀପଙ୍କ ଭଳି ବିଜୟ ମଧ୍ୟ ଅସନ୍ତୁଷ୍ଟ । ଦଳ ଯେଉଁଭଳି ପରିଚାଳିତ ହେଉଛି, ତାକୁ ନେଇ ଖୋଲାଖୋଲି ମତ ରଖିଛନ୍ତି । ଦୁଇ ନେତା ବିଜେପିରୁ ଇସ୍ତଫା ଦେଇ ଭବିଷ୍ୟତ ରଣନୀତି ତିଆରି କରିପାରନ୍ତି । ବିଜେଡିକୁ ଫେରିବାରେ ଦିଲ୍ଲୀପଙ୍କ ପାଇଁ କିଛି ବାଧାବିଘ୍ନ ନଥିବା ବେଳେ ବିଜୟଙ୍କୁ ନେଇ କିନ୍ତୁ ଢେର କସରତ ଚାଲିଛି । ନୂଆବର୍ଷରେ ନୂଆ ଖବର ପାଇବାକୁ ରାଜନୈତିକ ଗୋଟିଚାଳନା ହେଉଥିବା କୁହାଯାଉଛି ।

କ୍ଷତି ସହିବ ବିଜେପି?
ଶକ୍ତି ସଂଗ୍ରହ କରି ମିଶନ ୧୨୦କୁ ସାକାର କରିବାକୁ ଲକ୍ଷ୍ୟ ରଖିଥିବା ବିଜେପିର ଦୁଇ ପାଖୁଡା ଖସିବା ନିହାତି ଭାବେ ଦଳ ଉପରେ ନକରାତ୍ମକ ପ୍ରଭାବ ପକାଇବ । ରଣନୀତି ପ୍ରସ୍ତୁତିରେ ବା ତାକୁ କାର୍ଯ୍ୟକାରୀ କରାଇବାରେ ବିଜୟ ମହାପାତ୍ର ତାଙ୍କ ପାରଦର୍ଶିତା ଅତୀତରେ ଦେଖାଇଛନ୍ତି । ଏପରିକି କନ୍ଧମାଳ ଲୋକସଭା ଉପ-ନିର୍ବାଚନରେ ବିଜେପି ତାଙ୍କ ନେତୃତ୍ୱରେ ଲଢିଥିଲା । ହେଲେ ଏବେ ସ୍ଥିତି ଠିକ ଓଲଟା ।
ବିଜେପିରେ ରାଜ୍ୟ ସ୍ତରରେ ଆଜି ବହୁ ତୁଙ୍ଗ ନେତା ଅଲୋଡା ହେଉଥିବା ଚର୍ଚ୍ଚା ହେଉଛି । ନୂଆ ନେତୃତ୍ୱ ଆଉ କିଛି କୋଟେରୀ ନେତାଙ୍କୁ ନେଇ ଦଳ ପରିଚାଳିତ ହେଉଥିବା ଅଭିଯୋଗ ଭିତରେ, ଯେଉଁ ଅପବାଦ ଦିଲ୍ଲୀପ ଲଗାଇଛନ୍ତି ତାକୁ ଦୂର କରିବାରେ ଦଳ ସକ୍ଷମ ନ’ହୋଇପାରିଲେ ଢେର ମୂଲ୍ୟ ଦେବାକୁ ପଡିପାରେ ।

Comments are closed.