ରାଜନୀତିରେ ନିଆଁ ଲଗାଇଲା ଇଣ୍ଡିଆ ଟୁଡେ’ର ସର୍ଭେ ରିପୋର୍ଟ! ଧର୍ମେନ୍ଦ୍ର କହିଲେ, ନବୀନ ରାଜା, ସେ ରଙ୍କ । ବିଜେଡିର ଜବାବ, ପରିବର୍ତନର ନାରା ନଦେଲେ ତାଙ୍କ କଥା ଶୁଣିବ କିଏ ?
କନକ ବ୍ୟୁରୋ : ଓଡିଶାକୁ ନେଇ ଇଣ୍ଡିଆ ଟୁଡେର ସର୍ଭେ ରିପୋର୍ଟ ଉପରେ ପ୍ରତିକ୍ରିୟା ରଖି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଛନ୍ତି ନବୀନ ରାଜା ଓ ସେ ରଙ୍କ । କଟାକ୍ଷ କରି କହିଛନ୍ତି ସେ ବାଳି ରାଜା ଓ ନିଜେ ଗୁଣ୍ଡୁଚି ମୂଷା । ନବୀନଙ୍କ ସହ ତାଙ୍କର କୌଣସି ତୁଳନା ନାହିଁ ବୋଲି କହି, ଓଡିଶାରେ ପରିବର୍ତନର ଆଭାସ ମିଳୁଛି ବୋଲି କହିଛନ୍ତି । ସେପଟେ ସାଂସଦ ସୌମ୍ୟରଂଜନ କହିଛନ୍ତି , ହାରୁଥିବା ଦଳ ମଧ୍ୟ ଏଭଳି କହିଥାଏ , ନଚେତ ତାଙ୍କ କଥା କେହି ଶୁଣିବେ ନାହିଁ ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ସାଧାରଣ ନିର୍ବାଚନ ପୂର୍ବରୁ ଇଣ୍ଡିଆ ଟୁଡେର ସର୍ଭେ ରିପୋର୍ଟ, ଠିକ୍ କ୍ରିକେଟ ଖେଳର ଗୁଗଲି ଭଳି ସାମ୍ନାକୁ ଆସିଛି । ଓଡ଼ିଶାରେ ନବୀନ ଏବଂ ଦେଶରେ ମୋଦି । ଭୋଟରଙ୍କ ମୁଡକୁ କିଛି ଏଭଳି ଢ଼ଙ୍ଗରେ, ପଲିଟିକାଲ ଷ୍ଟକ୍ ଏକ୍ସଚେଂଜର ସର୍ଭେ ରିପୋର୍ଟ ଆକଳନ କରିଛି । କିନ୍ତୁଏହି ସର୍ଭେକୁ ନିଜ ଢ଼ଙ୍ଗରେ ବିଶ୍ଲେଷଣ କରି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଧର୍ମେନ୍ଦ୍ରଙ୍କ ଯୁକ୍ତି ହେଉଛି ରାୟ ଗୋଟିଏ ଆସିବ । ଓଡ଼ିଶାରେ ବିଜେଡି ଜିତିବ, ନହେଲେ ବିଜେପି ଜିତିବ । ଆଉ ଯୁବପୀଢ଼ିଙ୍କ ମୁଡକୁ ଦେଖି ଉଭୟ କେନ୍ଦ୍ର ଓ ରାଜ୍ୟରେ ମୋଦିଙ୍କ ସପକ୍ଷରେ ଭୋଟ୍ ଯିବ ବୋଲି କହିଛନ୍ତି କେନ୍ଦ୍ରମନ୍ତ୍ରୀ । ଏପଟେ ବିଜେଡି କହିଛି- ବଡ ପରିବର୍ତନର ନାରା ନଦେଲେ ତାଙ୍କ କଥା ଶୁଣିବ କିଏ, ତେଣୁ କହୁଛନ୍ତି ।
ଆଉ ଏସବୁ ଭିତରେ ବିଜେଡି ଓ ବିଜେପିର ସଂପର୍କ ନେଇ ପ୍ରଭୁ ଚାୱାଲା ଯେତେବେଳେ ପ୍ରଶ୍ନ କରିଥିଲେ, ଧର୍ମେନ୍ଦ୍ର ସିଧାସଳଖ ବିଜେଡିକୁ ସୁବିଧାବାଦୀର ଆଖ୍ୟା ଦେବାକୁ ପଛାଇ ନଥିଲେ । ରାଷ୍ଟ୍ରପତି ନିର୍ବାଚନ ହେଉ କିମ୍ବା ଅନାସ୍ଥା ପ୍ରସ୍ତାବ ହେଉ, ବିଜେଡି ନିଜ ସୁବିଧା ଅନୁସାରେ କେନ୍ଦ୍ର ସରକାରଙ୍କୁ ସମର୍ଥନ କରୁଥିବା କହିଛନ୍ତି ଧର୍ମେନ୍ଦ୍ର ।ବିଜେଡି-ବିଜେପି ରାଜନୈତିକ ପ୍ରତିଦ୍ୱନ୍ଦିତା ଭିତରେ ରାଜ୍ୟ ସରକାରଙ୍କ ଦୁଇ ମନ୍ତ୍ରୀ, ବଦ୍ରୀ ପାତ୍ର ଏବଂ ପ୍ରଦୀପ ମହାରଥୀଙ୍କୁ ସମାଲୋଚନା କରିବାକୁ ଭୁଲି ନାହାଁନ୍ତି ଧର୍ମେନ୍ଦ୍ର । ମହିଳାଙ୍କୁ ନେଇ ମହାରଥୀଙ୍କ ବୟାନ ଏବଂ ମନ୍ତ୍ରୀଙ୍କ ପୁଅ ଗିରଫ ହେବା ପ୍ରସଙ୍ଗରେ ନବୀନ ସରକାରଙ୍କୁ ସମାଲୋଚନା କରିଛନ୍ତି । ଯାହାର ଜବାବ ରଖିଛି ବିଜେଡି ।
ବିଜେଡ଼ି ସାଂସଦ ସୌମ୍ୟରଂଜନ ପଟ୍ଟନାୟକ କହିଛନ୍ତି ଯେ, ନିର୍ବାଚନ ପୂର୍ବରୁ ସମସ୍ତ ଦଳ ଏଭଳି କହିଥାନ୍ତି । ଅମାନତ ହରାଇଥିବା ଦଳ ନିର୍ବାଚନ ପୂର୍ବରୁ ଶାସନକୁ ଆସିବା କଥା କୁହନ୍ତି । ୧୮ ବର୍ଷ ହେଲା ବିଜେଡ଼ିକୁ ଭୋଟ ଦେଇ ନିର୍ବାଚନ ଜିତାଉଛନ୍ତି ଓଡ଼ିଶାବାସୀ । ଯଦି ଏଭଳି ବଡ଼ ପରିବର୍ତ୍ତନ କଥା ନ କହିବେ ତାଙ୍କ କଥା ଶୁଣିବ କିଏ ବୋଲି କହି ଧର୍ମେନ୍ଦ୍ରଙ୍କ କୋର୍ଟ କୁ ବଲ୍ ଫିଙ୍ଗି ଦେଇଛନ୍ତି ସାଂସଦ ସୌମ୍ୟରଂଜନ ପଟ୍ଟନାୟକ । ନିର୍ବାଚନ ଯେତିକି ପାଖେଇ ଆସୁଛି ଏହି ପ୍ରତିଯୋଗିତା ସେତିକି ବଢ଼ୁଛି । ଜଣେ ଆଉ ଜଣଙ୍କୁ କାଠଗଡ଼ାରେ ଠିଆ କରୁଛନ୍ତି । ଆଉ ସବୁର ମୁଳରେ ସେଇ ୨୦୧୯ ନିର୍ବାଚନ ।