କନକ ବ୍ୟୁରୋ : ଚକୁଳି ଖାଇବ, ଚକୁଳି, ୫ ଟଙ୍କାରେ ପେଟପୁରା ଚକୁଳି ଖାଇବାକୁ ଦେଉଛନ୍ତି କଟକ ନନ୍ଦୀ ସାହିର ଚକୁଳି ମାଉସୀ ଅନ୍ନପୂର୍ଣ୍ଣା ସାହୁ । ଚକୁଳି ସାଙ୍ଗକୁ ଧନିଆ-ରସୁଣର ଚଟଣି ଯିଏ ଥରେ ଖାଇଛି ସିଏ ବାରମ୍ବାର ଆସିଛି । କାରଣ ମାଉସୀର ଏହି ଚକୁଳି ପ୍ରସ୍ତୁତିରେ ଭରି ରହିଥାଏ ଅମାପ ଆତ୍ମୀୟତା । ସେଥିପାଇଁ ତ ସ୍ନେହ ମିଶା ବାମ୍ପ ଚକୁଳି ଖାଇବାକୁ ଛୁଟି ଆସନ୍ତି କଟକିଆ । ୪୫ ବର୍ଷ ଧରି କଟକର ଏହି କୁନି ଘରେ ମାଉସୀ ପରସି ଚାଲିଛନ୍ତି ଚକୁଳି । ମୁସମୁସିଆ ଚକୁଳି ଖାଇବାକୁ ସବୁ ବର୍ଗର ଲୋକ ଭିଡ ଜମାନ୍ତି ।
Kanak News is now on WhatsApp
Join and get latest news updates delivered to you via WhatsApp
ମାଉସୀ ଆଉ ଖଣ୍ଡେ ତୁମ ସୁଆଦିଆ ଚକୁଳି ଦିଅ, କିଛି ଏହି କଥା ମାଉସୀର ଛୋଟ ଦୋକାନରେ ସବୁବେଳେ ଶୁଣିବାକୁ ମିଳେ । ବଡି ଭୋରରୁ ଉଠି ମାଉସୀ ଲାଗିପଡନ୍ତି ଚକୁଳି ପ୍ରସ୍ତୁତିରେ । ସକାଳ ୬ଟାରୁ ଦିନ ୧୧ଟା ଯାଏଁ ଖୋଲେ ମାଉସୀଙ୍କର ଏହି ଚକୁଳି ପସରା । ବିଶେଷ କରି ଡେ଼କଚି ଉପରେ ପିଠଉରେ ପ୍ରସ୍ତୁତ କରନ୍ତି ଭିନ୍ନ ଚକୁଳି । ସେଥିପାଇଁ ତ ସ୍ଥାନୀୟ ଅଞ୍ଚଳର ବ୍ୟବସାୟୀଙ୍କଠାରୁ ଆରମ୍ଭ କରି ଛାତ୍ରଛାତ୍ରୀ ମାଉସୀଙ୍କର ନିତିଦିନିଆ ଗ୍ରାହକ ପାଲଟିଯାଇଛନ୍ତି । ହୋଟେଲରେ ହୁଏତ ଏହି ବାମ୍ଫ ଚକୁଳି ମିଳି ନପାରେ, କିନ୍ତୁ ଅନ୍ନପୂର୍ଣ୍ଣା ମାଉସୀଙ୍କ ଚକୁଳି ଯଦି ଖାଇଥାନ୍ତି ତେବେ ଅଭୁଲା ହୋଇ ରହିଯିବ ।