କନକ ବ୍ୟୁରୋ: ୨୦୧୯ ମହାଯୁଦ୍ଧରେ ରାଜ୍ୟର ୨୧ ଲୋକସଭା ଆସନରେ ମାଟି କାମୁଡ଼ିଥିବା କଂଗ୍ରେସ ପାଇଁ ସଂଜୀବନୀ ପାଲଟିଲେ ସପ୍ତଗିରି ଉଲ୍ଲାକା । ରାଜନୀତି ମୈଦାନରେ ବେଶୀ ଅଭିଜ୍ଞତା ନରଖିଥିଲେ ମଧ୍ୟ କଂଗ୍ରେସ ପାଇଁ ଏକମାତ୍ର ଲୋକସଭା ଆସନ ଅକ୍ତିଆର କରି ସମ୍ମାନ ବଞ୍ଚାଇଛନ୍ତି ସପ୍ତଗିରି । ନିକଟତମ ବିଜେଡି ପ୍ରାର୍ଥୀ କୌଶଲ୍ୟ ହିକ୍କକାଙ୍କୁ ୩ ହଜାର ୬୧୩ ଖଣ୍ଡ ଭୋଟ୍ ବ୍ୟବଧାନରେ ପରାଜିତ କରି କଂଗ୍ରେସ ଖାତାକୁ ଦେଇଛନ୍ତି ଗୋଟିଏ ଲୋକସଭା ଆସନର ବିଜୟ ଖୁସି ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼ କଥା ହେଲା କି, କଂଗ୍ରେସର ଯୁବ ଚେହେରା ଏବେ କଂଗ୍ରେସ ଶିବିର ବାଦ୍ ରାଜ୍ୟ ରାଜନୀତିରେ ବେଶ୍ ପରିଚିତ ହେବାରେ ଲାଗିଲେଣି । କାରଣ ଜଣେ କମ୍ପ୍ୟୁଟର ଇଂଜିନିୟରରୁ ରାଜନୀତି ବ୍ୟାଟେଲ୍ ଗ୍ରାଉଣ୍ଡକୁ ଏଣ୍ଟ୍ରିମାରିବା ସହ ପ୍ରଥମଥର ପାଇଁ ଲୋକସଭା ନିର୍ବାଚନ ଲଢି ନିର୍ବାଚିତ ହୋଇଛନ୍ତି । ଆଉ ସାମ୍ନାରେ ବିଜେପିର ପୁରୁଖା ନେତା ଜୟରାମ ପାଙ୍ଗୀଙ୍କ ଗଣିତ ବିଗାଡ଼ିବା ସହ ବିଜେଡି ମହିଳା କାର୍ଡକୁ ମଧ୍ୟ ପୁରାପୁରି ଫେଲ୍ କରିଦେଇଛନ୍ତି ସପ୍ତଗିରି । ଯାହା ଏବେ କଂଗ୍ରେସ ଶିବିରକୁ ଉତ୍ସାହିତ କରିଛି ।
ଅବଶ୍ୟ କୋରାପୁଟ ପୂର୍ବରୁ କଂଗ୍ରେସ ଗଡ଼ ଥିବାବେଳେ ସପ୍ତଗିରି ଉଲ୍ଲାକା ହେଉଛନ୍ତି ପୂର୍ବତନ ମନ୍ତ୍ରୀ ରାମଚନ୍ଦ୍ର ଉଲ୍ଲାକାଙ୍କ ପୁଅ । ତେଣୁ ରାଜନୀତି ପରିବାରରୁ ସମ୍ପର୍କ ରହିଥିବାରୁ ତାଙ୍କ କମ୍ପ୍ୟୁଟର ଶିକ୍ଷା ଏବଂ ରାଜନୀତି ଗୋଟିଚାଳନା କରିବାରେ ସେ ସକ୍ଷମ ହୋଇଛନ୍ତି । ଯେଉଁଥି ପାଇଁ ମୋଟ୍ ୩ଲକ୍ଷ ୭୧ ହଜାର ୧୨୯ ଖଣ୍ଡ ଭୋଟ୍ ପାଇ କୋରାପୁଟବାସୀଙ୍କ ମନ ଜଣିଣିପାରିଛନ୍ତି ସପ୍ତଗିରି ଉଲ୍ଲାକା । ଯେଉଁଥି ପାଇଁ ତାଙ୍କୁ ଏବେ କଂଗ୍ରେସର ହିରୋ ବୋଲି ସମ୍ବର୍ଦ୍ଧନା କରାଯାଉଛି । ଯେଉଁଠି ରାଜ୍ୟ ରାଜନୀତିର ଅନେକ କଂଗ୍ରେସ ହେଭିୱେଟ୍ ପରାଜୟର ଦ୍ୱାର ଦେଖିଛନ୍ତି ତାହାରି ଭିତରେ ସପ୍ତଗିରି ଉଲକା ପରି ଚମକି ଉଠିଛନ୍ତି ।