ଗୋଟିଏ ପଟେ ନୂଆ ଜାରି ହୋଇଥିବା ୫୦୦ ଓ ୨୦୦୦ ଟଙ୍କାର ନୋଟ ଉପରେ ରଙ୍ଗ ଲଗାଇବା, କିଛି ଲେଖିବା କିମ୍ବା ପିନ୍ ମାରିବା ଉପରେ ସରକାର ରୋକ ଲଗାଇଛନ୍ତି । କିନ୍ତୁ ଅନ୍ୟପଟେ ଦେଶର ସବୁଠୁ ବଡ ବ୍ୟାଙ୍କ କୁହାଯାଉଥିବା ଏସବିଆଇ ଏଟିଏମରୁ ଚିରା ଫଟା ସହ ରଙ୍ଗ ଲାଗିଥିବା ନୋଟ ବାହାରୁଛି । ଏଭଳି ଏକ ଘଟଣା ରାୟପୁରରେ ଦେଖିବାକୁ ମିଳିଛି । ରବିବାର ରାୟପୁରରେ ଏସବିଆଇ ଏଟିଏମରୁ ଟଙ୍କା ଉଠାଇବା ବେଳେ ଚିରା ଫଟା ଓ ରଙ୍ଗ ଲାଗିଥିବା ୫୦୦ ଟଙ୍କା ବାହାରିଥିବା ଘଟଣା ସାମ୍ନାକୁ ଆସିଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁୂଯାୟୀ, ବାରଡେରାର ସିଆରପିଏଫ କ୍ୟାମ୍ପ ପାଖରେ ଥିବା ଷ୍ଟେଟ ବ୍ୟାଙ୍କ ଅଫ ଇଣ୍ଡିଆର ଏଟିଏମରୁ ଦୁଇଜଣ ବ୍ୟକ୍ତି ହରିଶଙ୍କର ଟଣ୍ଡନ ଓ ନରୋତ୍ତମ ଦେବାଙ୍ଗନ ୧୦ ହଜାର ଟଙ୍କା ଲେଖାଏଁ ଉଠାଇଥିଲେ । ତେବେ ଟଙ୍କା ଉଠାଇବା ପରେ ଉଭୟ ଆଶ୍ଚର୍ଯ୍ୟ ହୋଇଯାଇଥିଲେ । କାରଣ ଅଧିକାଂଶ ନୋଟ ଉପରେ ରଙ୍ଗ ଲାଗିଥିଲା ଓ କିଛି ନୋଟର ରଙ୍ଗ ମଧ୍ୟ ଉଡିଯାଇଥିଲା । ଏପରିକି କିଛି ଏଭଳି ନୋଟ ଥିଲା ଯେଉଁଗୁଡିକ ଚିରି ଯାଇଥିଲା । ତେବେ ଏନେଇ ବ୍ୟାଙ୍କର ଟୋଲ ଫ୍ରି ନମ୍ବରରେ ଅଭିଯୋଗ କରିଥିଲେ ମଧ୍ୟ କୌଣସି ଆଶ୍ୱସନା ନ ମିଳିବାରୁ ଉଭୟ ଲୋକ ଥାନାରେ ଅଭିଯୋଗ କରିଛନ୍ତି ।