ବନ୍ଦ ଲଫାପାର ଡୁପ୍ଲିକେଟ ଚାବିକୁ ନେଇ ସବୁଆଡ଼ୁ ସମାଲୋଚନା : ଜଗନ୍ନାଥଙ୍କ ଶରଣରେ ଜିଲ୍ଲାପାଳ
କନକ ବ୍ୟୁରୋ : ରତ୍ନଭଣ୍ଡାର ଚାବି ମିଳିବା ପରେ କୋଟି କୋଟି ଭକ୍ତ ଆଶ୍ୱସ୍ତ ହୋଇଥାଇ ପାରନ୍ତି , ହେଲେ ଏହି ପ୍ରସଙ୍ଗକୁ ନେଇ ବଢିଛି ରାଜନୀତିର ତାତି । ବିରୋଧୀଙ୍କ ଟାର୍ଗେଟରେ ଏବେ ପୁରୀ ଜିଲ୍ଲାପାଳ ଅରବିନ୍ଦ ଅଗ୍ରୱାଲ ।ପୁରୀ ଜିଲ୍ଲାପାଳଙ୍କ ରତ୍ନଭଣ୍ଡାରର ଭିତର ଭଣ୍ଡାର ଡୁପ୍ଲିକେଟ ଚାବି ମିଳିବା ନେଇ ଘୋଷଣା ପରେ ଏବେ ଜୋର ଧରିଛି ରାଜନୀତି । ପୂର୍ବରୁ ଚାବି ମିଳୁ ନଥିବା କହୁଥିବା ଜିଲ୍ଲାପାଳ କେମିତି ଆଜି ଚାବି ପାଇଲେ ବୋଲି ପ୍ରଶ୍ନ ଉଠାଇଛନ୍ତି ବିରୋଧୀ ।
Kanak News is now on WhatsApp
Join and get latest news updates delivered to you via WhatsApp
ପୂର୍ବତନ ଆଇନମନ୍ତ୍ରୀ ବିଶ୍ୱଭୂଷଣ ହରିଚନ୍ଦନ କହିଛନ୍ତି, ଡୁପ୍ଲିକେଟ ଚାବି କଥା ସେ ଆଇନମନ୍ତ୍ରୀ ଥିବା ବେଳେ ମଧ୍ୟ ଶୁଣିନାହାନ୍ତି । ଏପରିକି ଡପ୍ଲିକେଟ ଚାବି କଥା ଶ୍ରୀମନ୍ଦିର ଆଇନରେ କାହିଁ କେଉଁଠି ଉଲ୍ଲେଖ ଥିବା କଥା ମଧ୍ୟ ସେ ଜାଣିନାହାନ୍ତି । ସବୁଠୁ ବଡ଼ କଥା ହେଲା, ଟ୍ରେଜେରୀ ରୁମରେ ଯେଉଁ ଚାବି ରହିବା କଥା ତାହା ରେକର୍ଡ଼ ରୁମକୁ କିଭଳି ଆସିଲା । ତାହା ପୁଣି ଅସଲି ନୁହେଁ ନକଲି । ଏଭଳି କହି ଜିଲ୍ଳାପାଳଙ୍କୁ ସିଧାସଳଖ ଟାର୍ଗେଟ କରିଛନ୍ତି ବିଶ୍ୱଭୂଷଣ ହରିଚନ୍ଦନ ।
ସେହିଭଳି କଂଗ୍ରେସ ମଧ୍ୟ ଜିଲ୍ଲାପାଳଙ୍କୁ ରତ୍ନଭଣ୍ଡାର ଚାବି ବିବାଦ ଭିତରକୁ ଟାଣିଛନ୍ତି । ସରକାର, ମନ୍ଦିର ପ୍ରଶାସନ କିଭଳି ଦାୟିତ୍ୱହୀନ ଭଳି କାମ କରୁଛନ୍ତି ତାହା କହିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ । ସେହିଭଳି ଜଗନ୍ନାଥ ସେନା ପକ୍ଷରୁ କୁହାଯାଇଛି, ରତ୍ନଭଣ୍ଡାରର ଡ଼ୁପ୍ଲିକେଟ ଚାବି ତିଆରି ହୋଇପାରିବ ନାହିଁ ବୋଲି ଆଇନ ରହିଛି । କିନ୍ତୁ ଏଭଳି ସ୍ଥଳେ ଡ଼ୁପ୍ଲିକେଟ ଚାବି କେଉଁଠୁ ଆସିଲା । ରତ୍ନଭଣ୍ଡାରରେ ୩ଟି ତାଲା ପଡ଼ିଛି । ତେଣୁ ୩ଟି ଚାବିକୁ ଏକାଠି କଲେ ହିଁ ରତ୍ନଭଣ୍ଡାର ଖୋଲିବ । ଯଦି ଡ଼ୁପ୍ଲିକେଟ ଚାବି ତିଆରି ହୋଇଛି ତେବେ କେଉଁ ସରକାର ଏଭଳି ନିର୍ଦ୍ଦେଶ ଦେଇଥିଲେ ତାହା ସ୍ପଷ୍ଟ କରାଯାଉ ।
ରତ୍ନଭଣ୍ଡାର ଭଳି ଅତି ଗୁରୁତ୍ୱପୂର୍ଣ୍ଣ ଓ ଭକ୍ତଙ୍କ ଭାବାବେଗ ସହ ଜଡିତ ଏହି ପ୍ରସଙ୍ଗ ହଠାତ୍ ବିବାଦ ଘେରକୁ ଆସିଗଲା, ଯେତେବେଳେ ଚାବି ଟ୍ରେଜେରୀରେ ନାହିଁ ବୋଲି ପ୍ରଶାସନ କହିଲା ଏବଂ ପରେ ପରେ ରେକର୍ଡ ରୁମରେ ଚାବି ମିଳିଲା ବୋଲି ଘୋଷଣା କରାଗଲା । ଏହାକୁ ନେଇ ଏବେ ଜିଲ୍ଲାପାଳଙ୍କୁ ଟାର୍ଗେଟ କରିଛନ୍ତି ବିଜୟ ମହାପାତ୍ର । ମିଳିଥିବା ଚାବି ରତ୍ନଭଣ୍ଡାରର ହୋଇଥିବ ତେବେ ଏହା ନିଶ୍ଚିତ ଭାବେ ଏକ ଆଶ୍ୱସ୍ତି କର କଥା । କିନ୍ତୁ ଜିଲ୍ଲାପାଳଙ୍କ ଠାରୁ ଏଭଳି ଦାୟିତ୍ୱହୀନ ବିବୃତି ଆଦୌ ଗ୍ରହଣୀୟ ନୁହେଁ । ଏପରିକି ଜିଲ୍ଲାପାଳଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବା ଆବଶ୍ୟକ ବୋଲି କହିଛନ୍ତି ବିଜୟ ମହାପାତ୍ର । ତେବେ ରତ୍ନଭଣ୍ଡାର ଚାବି ପ୍ରସଙ୍ଗରେ ଆଇନମନ୍ତ୍ରୀ ପ୍ରତାପ ଜେନା କହିଛନ୍ତି ତଦନ୍ତ କମିଶନ ରିପୋର୍ଟ ଆସିବା ପରେ ଏହା କେଉଁ ଚାବି ତାହା ସ୍ପଷ୍ଟ ହୋଇଯିବ । ବନ୍ଦ ଥିବା ଲଫାପା ଭିତରେ ମହାପ୍ରଭୁଙ୍କ ରତ୍ନଭଣ୍ଡାରର ଚାବି ଅଛି କି ନାହିଁ ତାହା ଏବେ ଦେଖିବା ବାକି ରହିଲା ।
ଏସବୁ ଭିତରେ ଶ୍ରୀମନ୍ଦିର ରତ୍ନଭଣ୍ଡାର ଚାବି ହଜିବା ବିବାଦରେ ଗଠିତ ନ୍ୟାୟିକ ତଦନ୍ତ କମିଶନର ଟର୍ମସ ଅଫ ରେଫରେନ୍ସ ପାଇଁ ଆଜି ବିଜ୍ଞପ୍ତି ପ୍ରକାଶ ପାଇଛି । କେଉଁ ପରିସ୍ଥିତିରେ ଚାବି ହଜିଲା ସେ ନେଇ ତଦନ୍ତ କରିବ କମିଶନ । ଚାବି ହଜିବା ଘଟଣାରେ ବ୍ୟକ୍ତିବିଶେଷ, ଗୋଷ୍ଠୀ କିମ୍ବା ଅନୁଷ୍ଠାନର କୌଣସି ଭୂମିକା ଅଛି ନା ନାହିଁ ସେନେଇ ବି ତଦନ୍ତ ହେବ । ଭବିଷ୍ୟତରେ ଏଭଳି ଘଟଣାର ଯେଭଳି ପୁନରାବୃତି ନ ହୁଏ ସେ ଦିଗ ପ୍ରତି ବି ଧ୍ୟାନ ଦେବେ କମିଶନ । ୩ ମାସ ମଧ୍ୟରେ ଏହି କମିଟି ତଦନ୍ତ କରି ସରକାରଙ୍କୁ ରିପୋର୍ଟ ଦେବେ । ପୂର୍ବରୁ କମିଶନ ଗଠନ ନେଇ ଘୋଷଣା କରିଥିଲେ ମୁଖ୍ୟମନ୍ତ୍ରୀ । ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ ରଘୁବୀର ଦାସ ଘଟଣାର ତଦନ୍ତ କରିବେ । ବିଜ୍ଞପ୍ତିରେ କୁହାଯାଇଛି ଯେ, କମିଶନ ଅଫ ଇନକ୍ୱାରୀ ଆକ୍ଟ ୧୯୫୨ ଅନୁସାରେ ଘଟଣାର ତଦନ୍ତ ହେବା ଦରକାର । ସେପଟେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ମନ୍ଦିର ସୁପରିଚାଳନା ନେଇ କମିଟି ଗଠନ କରିଛି ଆଇନବିଭାଗ । ଏହି କମିଟି ରାଜ୍ୟ ବାହାରକୁ ଯାଇ ବିଭିନ୍ନ ମନ୍ଦିରର ପରିଚାଳନାର ଅନୁଧ୍ୟାନ କରିବେ । ସୁରେଶ ମହାପାତ୍ରଙ୍କୁ ଏହି କମିଟିର ଅଧ୍ୟକ୍ଷ ଭାବେ ମନୋନୀତ କରାଯାଇଛି । ବରିଷ୍ଠ ଆଇପିଏସ୍ ଅଧିକାରୀ ସୋ÷ମେନ୍ଦ୍ର ପ୍ରୀୟଦର୍ଶିଙ୍କୁ କମିଟିର ସଦସ୍ୟ ଭାବେ ମନୋନୀତ କରାଯାଇଛି । ସେହିପରି ଶ୍ରୀମନ୍ଦିର ପରିଚାଳନା କମିଟିର ସଦସ୍ୟ ମହିମୋହନ ତ୍ରିପାଠୀ କମିଟିର ସଦସ୍ୟ ରହିଛନ୍ତି । ଶ୍ରୀମନ୍ଦିରରେ ବାରମ୍ବାର ବିଶୃଙ୍ଖଳା ହେବା ପ୍ରସଙ୍ଗରେ ଏକ ଆବେଦନର ଶୁଣାଣି କରି ତିରୁପତି ଓ ବୈଷ୍ଣୋଦେବୀ ମନ୍ଦିରର ପରିଚାଳନାକୁ ଅନୁଧ୍ୟାନ କରିବାକୁ ପରାମର୍ଶ ଦେଇଥିଲେ ସୁପ୍ରିମକୋର୍ଟ ।