ନବୀନଙ୍କ ମାରାଥନ ପ୍ରଚାର । ଫୁଲବାଣୀ ତୁମୁଡିବନ୍ଧରେ ବିଜେଡି ସୁପ୍ରିମୋଙ୍କ ରାଲି । ଜନସଭାରେ ଯୋଗଦେଇ କହିଲେ, ଶେଷ ନିଶ୍ୱାସ ପର୍ଯ୍ୟନ୍ତ ଓଡିଶାବାସୀଙ୍କ ସେବା କରିବି
ସାଢେ ୪କୋଟି ଓଡିଶାବାସୀ ମୋର ପରିବାର
କନକ ବ୍ୟୁରୋ: ସାଢେ ୪କୋଟି ଓଡିଶାବାସୀ ମୋର ପରିବାର । ମହିଳାଙ୍କୁ ବିଜେଡି ଅଗ୍ରାଧିକାର ଦେଇ ଆସିଛି । ମା’ମାନେ ହେଉଛନ୍ତି ବିକାଶର ପ୍ରକୃତ ଡବଲ ଇଂଜିନ । କାଳିଆ ଯୋଜନାକୁ କେହି ବନ୍ଦ କରିପାରିବେ ନାହିଁ ବୋଲି ନିର୍ବାଚନୀ ପ୍ରଚାର ମୈଦାନରେ ଆଜି ପୁଣି ଥରେ ଦୋହରାଇଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ୧୮ ତାରିଖରେ ହେବାକୁ ଥିବା ଦ୍ୱିତୀୟ ପର୍ଯ୍ୟାୟ ନିର୍ବାଚନ ପାଇଁ ଆଜି ପୁଣି ପ୍ରଚାର ମଇଦାନକୁ ଓହ୍ଲାଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କନ୍ଧମାଳ ଲୋକସଭା ନିର୍ବାଚନ ମଣ୍ଡଳୀ ଓ ତତସଂଲଗ୍ନ ବିଧାନସଭା ମଣ୍ଡଳୀ ପାଇଁ ଆଜି ପ୍ରଚାର କରୁଛନ୍ତି ନବୀନ । ତେବେ ଫୁଲବାଣୀରେ ନିର୍ବାଚନ ପ୍ରଚାର ଅବସରରେ ତୁମୁଡିବନ୍ଧରେ ଆୟୋଜିତ ଏକ ଜନସଭାରେ ଯୋଗଦେଇ ଦଳୀୟ ପ୍ରାର୍ଥୀଙ୍କ ପାଇଁ ଭୋଟ ମାଗିଛନ୍ତି ମୁଖ୍ୟମନ୍ତ୍ରୀ । ଏହି ଅବସରରେ ନିଜ ଅଭିଭାଷଣରେ ନବୀନ କହିଛନ୍ତି, ସାଢେ ୪କୋଟି ଓଡିଶାବାସୀ ମୋର ପରିବାର । ମୋର ଶେଷ ନିଶ୍ୱାସ ପର୍ଯ୍ୟନ୍ତ ରାଜ୍ୟବାସୀଙ୍କ ସେବା କରିବି ବୋଲି କହିଛନ୍ତି ନବୀନ ।
କେନ୍ଦ୍ରକୁ ଟାର୍ଗେଟ କରି ନବୀନ କହିଛନ୍ତି , କାଳିଆ ଯୋଜନାରେ ୪୦ ଲକ୍ଷ ଚାଷୀ ଉପକୃତ ହେଲେଣି । କିନ୍ତୁ କେନ୍ଦ୍ରର ବିଜେପି ସରକାର ଏହାକୁ ବନ୍ଦ କରିବାକୁ ଚକ୍ରାନ୍ତ କରୁଛି । କିନ୍ତୁ ମୁଁ ଥିବା ପର୍ଯ୍ୟନ୍ତ ଏହି ଯୋଜନାକୁ କେହି ବନ୍ଦ କରିପାରିବେ ନାହିଁ ବୋଲି କହିଛନ୍ତି ନବୀନ ।ବିଜୁ ଜନତା ଦଳ ଆସିବାର ପ୍ରଥମ ଦିନରେ ହିଁ ଚାଷୀଙ୍କୁ ୧୦ ହଜାର ଟଙ୍କା ମିଳିବ । ମିଶନ ଶକ୍ତି ମୋର ସବୁଠାରୁ ପ୍ରିୟ କାର୍ଯ୍ୟକ୍ରମ । ମା’ମାନେ ହେଉଛନ୍ତି ସମାଜର ଶକ୍ତି , ଦେଶର ଶକ୍ତି, ବିକାଶର ପ୍ରକୃତ ଡବଲ ଇଂଜିନ । ବିଜନେସ ଦେବାକୁ ଆମେ ମାନିଫିଷ୍ଟୋରେ ଘୋଷାଣା କରିଛୁ ।
ନିର୍ବାଚନ ସମୟରେ କେନ୍ଦ୍ରର ବଡ ବଡ ନେତାଙ୍କୁ ଓଡିଶାରେ ଦେଖିବାକୁ ମିଳେ କିନ୍ତୁ ବିପଦ ବେଳେ କାହାର ଦର୍ଶନ ମିଳିନଥାଏ । କିନ୍ତୁ ବିଜୁ ଜନତା ଦଳ ସବୁବେଳେ ଓଡିଶାବାସୀଙ୍କ ସହ ରହିଛି ଆଉ ଆଗକୁ ମଧ୍ୟ ରହିବ । ମୋର ଶେଷ ନିଶ୍ୱାସ ପର୍ଯ୍ୟନ୍ତ ଓଡିଶାବାସୀଙ୍କର ସେବା କରିିବି ବୋଲି କହିବା ସହ ସାଂସଦ ପ୍ରାର୍ଥୀ ଅଚ୍ୟୁତ ସାମନ୍ତ ଏବଂ ବିଧାୟକ ପ୍ରାର୍ଥୀ ଚକ୍ରମଣୀ କଅଁରଙ୍କ ପାଇଁ ଭୋଟ ମାଗିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ ।