କନକ ବ୍ୟୁରୋ : ୨୦୧୯ ନିର୍ବାଚନ ଫଳାଫଳ ଆସିସାରିଛି ଆଉ ଏହି ଫଳାଫଳରେ ଗୁରୁତ୍ୱପୂର୍ଣ୍ଣ କଥା ହେଉଛି କମ ଭୋଟ ବ୍ୟବଧାନରେ ପ୍ରାର୍ଥୀ ହାରିବା । ଅଳ୍ପ ଭୋଟ ବ୍ୟବଧାନରେ କିଏ ହାରିଛି ତ ଆଉ କିଏ ଜିତିଛି । ଲୋକସଭା ଓ ବିଧାନସଭାର କିଛି ଏମିତି ତଥ୍ୟ ଉପରେ ଆସନ୍ତୁ ନଜର ପକାଇ ନେବା ।
Kanak News is now on WhatsApp
Join and get latest news updates delivered to you via WhatsApp
କୋରାପୁଟ ଲୋକସଭା ଆସନରେ ଜୋରଦାର ଲଢେଇ ହୋଇଥିଲା କଂଗ୍ରେସ ପ୍ରାର୍ଥୀ ସପ୍ତଗିରି ଉଲାକା ଏବଂ ବିଜେଡି ପ୍ରାର୍ଥୀ କୌଶଲ୍ୟା ହିକକ୍କାଙ୍କ ମଧ୍ୟରେ । ପ୍ରତି ରାଉଣ୍ଡରେ, କେତେବେଳେ ଭୋଟ ବ୍ୟବଧାନ ବଢୁଥିଲା ତ ଆଉ କେତେବେଳେ ଭୋଟ ବ୍ୟବଧାନ କମୁଥିଲା । ଶେଷରେ ୩୬୧୩ ଭୋଟ ବ୍ୟବଧାନରେ କୌଶଲ୍ୟା ହିକକାଙ୍କୁ ହରାଇଥିଲେ ସପ୍ତଗିରି ଉଲାକା ।
ସମ୍ବଲପୁର ଲୋକସଭା ଆସନରେ ବିଜେପି ପ୍ରାର୍ଥୀ ନିତେଶ ଗଙ୍ଗଦେବଙ୍କୁ କଡା ଟକ୍କର ଦେଇଥିଲେ ବିଜେଡି ପ୍ରାର୍ଥୀ ନଳିନୀକାନ୍ତ ପ୍ରଧାନ । କଡା ମୁକାବିଲା ଭିତରେ ପଛରେ ପଡିଯାଇଥିଲେ ନଳିନୀକାନ୍ତ । ୯୧୬୨ ଭୋଟ ବ୍ୟବଧାନରେ ହାରିଥିଲେ ନଳିନିକାନ୍ତ ।
ପୁରୀ ଲୋକସଭା ଆସନରେ ବିଜେଡି ପ୍ରାର୍ଥୀ ପିନାକୀ ମିଶ୍ର ଏବଂ ବିଜେପି ପ୍ରାର୍ଥୀ ସମ୍ବିତ ପାତ୍ରଙ୍କ ମଧ୍ୟରେ ଲଢେଇ ଭିତରେ ପଛରେ ପଡିଯାଇଥିଲେ ସମ୍ବିତ । ମାତ୍ର ୧୧୭୧୪ ଭୋଟରେ ଜିତିଲେ ପିନାକୀ ମିଶ୍ର ।
କଂଟାବାଂଜି ବିଧାନସଭା କ୍ଷେତ୍ରରେ ସବୁଠୁ କମ ଭୋଟ ବ୍ୟବଧାନରେ ଜିତିଛନ୍ତି ସନ୍ତୋଷ ସିଂହ ସାଲୁଜା । ବିଜେପି ପ୍ରାର୍ଥୀ ଲକ୍ଷ୍ମଣ ବାଗଙ୍କୁ ମାତ୍ର ୧୩୮ ଖଣ୍ଡ ଭୋଟରେ ହରାଇଛନ୍ତି କଂଗ୍ରେସ ପ୍ରାର୍ଥୀ ସନ୍ତୋଷ ସିଂହ ସାଲୁଜା ।
ପରଜଙ୍ଗ ବିଧାନସଭା ଆସନରେ ବିଜେପି ପ୍ରାର୍ଥୀ ବିଭୁତି ଭୂଷଣ ପ୍ରଧାନଙ୍କୁ ୭୪୦ ଖଣ୍ଡ ଭୋଟ ବ୍ୟବଧାନରେ ହରାଇଛନ୍ତି ବିଜେଡି ପ୍ରାର୍ଥୀ ନୃସିଂହ ଚରଣ ସାହୁ ।
ରାଜଗାଙ୍ଗପୁରରେ ମଧ୍ୟ ସମାନ ଦୃଶ୍ୟ । ବିଜେପି ପ୍ରାର୍ଥୀ ନରସିଂହ ମିଞ୍ଜଙ୍କୁ ୯୪୬ ଭୋଟରେ ହରାଇଛନ୍ତି ସିଏସ ରଂଜନ ଏକା ।
ବଡଚଣାରେ ଖୁବ କମ ବ୍ୟବଧାନରେ ଜିତିଛନ୍ତି ବିଜେଡି ପ୍ରାର୍ଥୀ ଅମର ଶତପଥୀ । ବିଜେପି ପ୍ରାର୍ଥୀ ଅମର କୁମାର ନାୟକଙ୍କୁ ୧୪୮୫ ଭୋଟରେ ହରାଇଛନ୍ତି ଅମର ପ୍ରସାଦ ଶତପଥୀ ।
ସେହିପରି ଗୋପାଳପୁରରେ ବିଜେପି ପ୍ରାର୍ଥୀ ବିଭୁତି ଭୂଷଣ ଜେନାଙ୍କୁ ୨୬୭୩ ଭୋଟରେ ହରାଇଛନ୍ତି ବିଜେଡି ପ୍ରାର୍ଥୀ ପ୍ରଦୀପ କୁମାର ପାଣିଗ୍ରାହୀ ।
ଅଳ୍ପ ଭୋଟ ବ୍ୟବଧାନରେ କିଏ ହାରିଛି ତ ଆଉ କିଏ ଜିତିଛି । ଯାହାକି ରାଜନୈତିକ ମହଲରେ ବେଶ ଚର୍ଚ୍ଚାର ବିଷୟ ହୋଇଛି ।