ମୁସଲମାନଙ୍କୁ ଦେଶଭକ୍ତ ଓ ନିଷ୍ଠାବାନ କରାଇବା ଉଦ୍ଦେଶ୍ୟରେ ଚୀନ ଚଲାଇଛି ଅତ୍ୟାଚାର : ଚୀନ ସରକାର ଖୋଲିଲେ ବିଶେଷ ଟ୍ରାନ୍ସଫର୍ମେସନ୍ କ୍ୟାମ୍ପ
ଉଇଗର ମୁସଲମାନଙ୍କୁ ଦେଶଭକ୍ତ ଓ ନିଷ୍ଠାବାନ କରାଇବା ପାଇଁ ଚୀନ ସରକାର ବିଶେଷ ଟ୍ରାନ୍ସଫର୍ମେସନ୍ କ୍ୟାମ୍ପ ଖୋଲିଛନ୍ତି । ଏହି କ୍ୟାମ୍ପ ଉଇଗର ମୁସଲମାନଙ୍କୁ ଚୀନ ସରକାର ଓ ସେଠାକାର କମ୍ୟୁନିଷ୍ଟ ଦଳ ପ୍ରତି ବିଶ୍ୱସନୀୟତା ବଜାୟ ରଖିବା ପାଇଁ ଖୋଲାଯାଇଛି । ଏଥିରେ ଅଳ୍ପସଂଖ୍ୟକ ମୁସଲମାନଙ୍କୁ ଜୋର୍ ଜବରଦସ୍ତି ଆଣିକି ଦୁଇ ମାସ ପର୍ଯ୍ୟନ୍ତ ରଖାଯାଉଛି । ଏଠି ଚାଇନିଜ ଭାଷା ଶିଖିବା, ଆଇନ ପାଠ ପଢ଼ିବା ଓ ରୋଜଗାର ପାଇଁ ପ୍ରଶିକ୍ଷଣ ଦିଆଯାଉଥିବା ସରକାର କହିଛନ୍ତି । କିନ୍ତୁ ଅନ୍ତର୍ଜାତୀୟ ମାନବାଧିକାର ସଂସ୍ଥାଗୁଡିକର କହିବାନୁସାରେ, ସରକାର ଉଇଗର ମୁସଲମାନଙ୍କ ସାଂସ୍କୃତିକ ପରିଚୟକୁ ଶେଷ କରିବା ପାଇଁ ତାଙ୍କ ଉପରେ ବଳ ପ୍ରୟୋଗ କରି ଅତ୍ୟାଚାର କରୁଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନାଯୋଗ୍ୟ, ପାକିସ୍ତାନ ନିଜ ସୀମାର ଅତି ନିକଟରେ ହିଁ ମୁସଲମାନଙ୍କ ଉପରେ ହେଉଥିବା ଅତ୍ୟାଚାର ଉପରେ ନୀରବ ରହିଛି । ଯେବେକି ଭାରତରେ ମୁସଲମାନଙ୍କ ଉପରେ କଥିତ ଅତ୍ୟାଚାରକୁ ନେଇ ସେ ସବୁବେଳେ ମିଛ ପ୍ରଚାର କରିଆସିଛି । ଅନ୍ୟ ମୁସଲମାନ ଦେଶ ମଧ୍ୟ ଏହି ମାମଲାରେ ଏକଦମ୍ ନୀରବ ଅଛନ୍ତି, ଯେବେକି ପଶ୍ଚିମ ମାନବାଧିକାର ସଂଗଠନ ଏବେ ଏହି ଅତ୍ୟାଚାର ଉପରେ ସ୍ୱର ଉତ୍ତୋଳନ କରିବା ଆରମ୍ଭ କଲେଣି ।
ଆମେରିକାର ପ୍ରମୁଖ ସମ୍ବାଦ ପତ୍ର ନ୍ୟୁୟର୍କ ଟାଇମ୍ସ ଏକ ବହୁତ ବଡ ବିଲ୍ଡିଙ୍ଗର ଫଟୋ ନିଜ ପେପରରେ ସ୍ଥାନ ଦେଇଛି । ଯେଉଁଠି ମୁସଲମାନଙ୍କୁ ଦେଶଭକ୍ତ ଓ ନିଷ୍ଠାବାନ କରାଇବା ପାଇଁ ପ୍ରଶିକ୍ଷଣ ଦିଆଯାଉଛି । ଏଠି ପ୍ରତିଦିନ ଘଣ୍ଟା ଘଣ୍ଟା ଧରି କ୍ଲାସ ହୁଏ, ଯେଉଁଠି ଚୀନର କମ୍ୟୁନିଷ୍ଟ ଦଳକୁ ସମର୍ଥନ କରିବାକୁ ଶିକ୍ଷା ଦିଆଯାଇଥାଏ । ମୁସଲମାନଙ୍କୁ ନିଜ ସଂସ୍କୃତିର ନିନ୍ଦା କରିବା ପାଇଁ ବି କୁହାଯାଇଥାଏ । ରିପୋର୍ଟ ମୁତାବକ, ଏହି ପ୍ରଶିକ୍ଷଣର ଉଦ୍ଦେଶ୍ୟ ହେଲା ମୁସଲମାନଙ୍କ ମଧ୍ୟରେ ନିଜ ଧର୍ମ ପ୍ରତି ଥିବା ଆସ୍ଥାକୁ ଶେଷ କରିବା ଓ ଚୀନ ପ୍ରତି ନିଷ୍ଠାବାନ ହେବା ।
ଏହି ପ୍ରଶିକ୍ଷଣ କ୍ୟାମ୍ପରେ କୈାଣସି ବାହାର ବ୍ୟକ୍ତିଙ୍କୁ ଯିବା ପାଇଁ ଅନୁମତି ନାହିଁ । ଏହି କ୍ୟାମ୍ପର ବନ୍ଦୀରୁ ମୁକ୍ତ ହୋଇଥିବା ଜଣେ ବ୍ୟକ୍ତିଙ୍କ କହିବାନୁସାରେ, ଏଥିରେ ଶତାଧିକ ଉଇଗର ମୁସଲମାନଙ୍କୁ ଜବରଦସ୍ତୀ ସାମ୍ୟବାଦୀ ସାହିତ୍ୟ ପଢ଼ାଇବା ଓ ଲେଖାଇବା ପାଇଁ ବାଧ୍ୟ କରାଯାଏ । ଏହାର ଅର୍ଥ ଏହା ଯେ କି ସେମାନେ ଇସଲାମ ଛାଡି ଚୀନ ପ୍ରତି ନିଷ୍ଠାବାନ ହୋଇଯାଆନ୍ତୁ । ଚୀନ ସରକାର ଗତ କିଛି ବର୍ଷରେ ଏମିତି ଶତାଧିକ କ୍ୟାମ୍ପ ଖୋଲିଛନ୍ତି ।