କନକ ବ୍ୟୁରୋ: ଜହ୍ନମାମୁକୁ ଯାତ୍ରା କରି ଇତିହାସ ରଚିଛି ଇସ୍ରୋ, ଇତିହାସ ରଚିଛି ଭାରତ । ଅନେକ ଅପେକ୍ଷା ପରେ ଆଜି ଦିନ ୨ଟା ୪୩ ମିନିଟରେ ଶ୍ରୀହରିକୋଟାରୁ ଅନ୍ତରୀକ୍ଷକୁ ଅଭିଯାନ ଆରମ୍ଭ କରିଛି ଭାରତ । ତେବେ ଭାରତର ଚନ୍ଦ୍ର ଅଭିଯାନ, ଚନ୍ଦ୍ରାୟନ-୨ ଉତକ୍ଷେପଣ ସଫଳ ହୋଇଥିବା ସୂଚନା ଦେଇଛି ଇସ୍ରୋ ।
Kanak News is now on WhatsApp
Join and get latest news updates delivered to you via WhatsApp
ତେବେ ୨ଟା ୪୩ ମିନିଟରେ ମହାକାଶକୁ ଯାତ୍ରା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇଛନ୍ତି ଇସ୍ରୋ ଅଧ୍ୟକ୍ଷ କେ. ଶିବନ । ଚନ୍ଦ୍ରାୟନ-୨ର ଉତକ୍ଷେପଣ ସଫଳ ହୋଇଛି । ପ୍ରଥମ ସୋପାନରେ ଆମେ ସଫଳତା ପାଇଛୁ । ରକେଟର ଗତି ଓ ସ୍ଥିତି ସ୍ୱାଭାବିକ ରହିଛି । ଆଶା ଠାରୁ ଅଧିକ ସଫଳତା ମିଳିଛି । ଏହା ଭାରତ ପାଇଁ ଏକ ଐତିହାସିକ ଯାତ୍ରା କହିଲେ ଇସ୍ରୋ ଅଧ୍ୟକ୍ଷ ।
ସଫଳତା ପାଇଁ ପୂରା ଟିମକୁ ଧନ୍ୟବାଦ ଦେଲେ ଇସ୍ରୋ ମୁଖ୍ୟ । ସବୁ ବୈଜ୍ଞାନିକ, ଇଞ୍ଜିନିୟର, ଟେକ୍ନିସିଆନ ଅନକେ କଷ୍ଟ କରିଛନ୍ତି । ବହୁତ ରିସ୍କ ନେଇ ଉତକ୍ଷେପଣ କରାଯାଇଛି ତେଣୁ ପ୍ରଥମ ସଫଳତା ପାଇଁ ସମସ୍ତଙ୍କୁ ଶୁଭେଚ୍ଛା ଓ ଶୁଭାକାମନା ଦେଲେ ଶିବନ । ଖାଲି ଏଇଟା ନୁହେଁ ଆଗକୁ ଆମକୁ ଆହୁରି ଅନେକ ସଫଳତା ଅପେକ୍ଷା କରିଛି ବୋଲି ଇସ୍ରୋ ମୁଖ୍ୟ କହିଛନ୍ତି ।
ସେପଟେ ଚନ୍ଦ୍ରାୟନ-୨ର ସଫଳ ପରୀକ୍ଷଣ ପରେ ସବୁଠି ଖୁସିର ମାହୋଲ ଦେଖିବାକୁ ମିଳିଛି । ସଫଳ ପରୀକ୍ଷଣ ପାଇଁ ଇସ୍ରୋକୁ ସବୁଆଡୁ ଶୁଭେଚ୍ଛାର ସୁଅ ଛୁଟିଛି । ରାଷ୍ଟ୍ରପତି, ପ୍ରଧାନମନ୍ତ୍ରୀ ମୋଦିଙ୍କ ସମେତ ଅନେକ ବଡ ବଡ ନେତା ଇସ୍ରୋକୁ ଶୁଭେଚ୍ଛା ଜଣାଉଛନ୍ତି ।