କେନ୍ଦ୍ର ବିରୋଧରେ ବିଦ୍ରୋହ କଲା ଆନ୍ଧ୍ର: ଜାରି ହେଲା ସରକାରୀ ବିଜ୍ଞପ୍ତି, ରାଜ୍ୟ ସରକାରଙ୍କ ବିନା ଅନୁମତିରେ ରାଜ୍ୟରେ ପଶିପାରିବନି ସିବିଆଇ
ପୂର୍ବରୁ ଦିଆଯାଇଥିବା ସ୍ୱତନ୍ତ୍ର ଅନୁମତି ଅପସାରଣ
କନକ ବ୍ୟୁରୋ: କେନ୍ଦ୍ର ବିରୋଧରେ ବିଦ୍ରୋହ କଲା ଆନ୍ଧ୍ର । ଏଣିକି ରାଜ୍ୟ ସରକାରଙ୍କ ବିନା ଅନୁମତିରେ ସିବିଆଇ ଆନ୍ଧ୍ରପ୍ରଦେଶରେ ପଶିପାରିବ ନାହିଁ । ରାଜ୍ୟରେ ପ୍ରବେଶ କରିବା ପାଇଁ ସିବିଆଇକୁ ଦିଆଯାଇଥିବା ସ୍ୱତନ୍ତ୍ର ଅନୁମତିକୁ ଆଜି ଅପସାରଣ କରି ନେଇଛନ୍ତି ଆନ୍ଧ୍ରପ୍ରଦେଶ ସରକାର । ଏନେଇ ଆଜି ରାଜ୍ୟ ସରକାରଙ୍କ ପକ୍ଷରୁ ପ୍ରକାଶ ପାଇଛି ବିଧିବଦ୍ଧ ବିଜ୍ଞପ୍ତି ।
Kanak News is now on WhatsApp
Join and get latest news updates delivered to you via WhatsApp
ଏଥିରେ କୁହାଯାଇଛି ଆନ୍ଧ୍ରପ୍ରଦେଶ ସରକାରଙ୍କ ଅନୁମତି ନେବା ପରେ ଯାଇ ସିବିଆଇ ରାଜ୍ୟରେ କୌଣସି ପ୍ରସଙ୍ଗରେ ତଦନ୍ତ ବା ଚଢ଼ାଉ କରିପାରିବ । ଏହା ସହିତ ନୋଟିସରେ କୁହାଯାଇଛି ସିବିଆଇ ଯଦି ଆନ୍ଧ୍ରପ୍ରଦେଶରେ କୌଣସି ତଦନ୍ତ କରିବାକୁ ଚାହେଁ ତେବେ ଆଂଟି କରପ୍ସନ ବ୍ୟୁରୋ ସହଯୋଗରେ କାର୍ଯ୍ୟ କରିବ । ମୋଦି ସରକାର ସିବିଆଇ କାର୍ଯ୍ୟକ୍ରମରେ ହସ୍ତକ୍ଷେପ କରିବା ପରେ ଏହି ଜାତୀୟ ତଦନ୍ତକାରୀ ସଂସ୍ଥା ନିଜର ଅସ୍ଥିତ୍ୱ ହରାଇଛି ବୋଲି ଅଭିଯୋଗ କରିଛନ୍ତି ଆନ୍ଧ୍ରପ୍ରଦେଶରେ ଶାସକ ଦଳ ନେତା ଦିନାକର । ସେ କହିଛନ୍ତି କେନ୍ଦ୍ରର ବିଜେପି ସରକାର ନିଜର ସୁବିଧା ଦୃଷ୍ଟିରୁ ବିଜେପିକୁ ବ୍ୟବହାର କରୁଛି । ଆନ୍ଧ୍ରକୁ ସ୍ୱତନ୍ତ୍ର ରାଜ୍ୟ ପାହ୍ୟା ଦାବି କରି ଏନଡିଏ ସହ ସଂପର୍କ ଛିନ୍ନ କରିଛନ୍ତି ଆନ୍ଧ୍ର ସରକାର ।
ସେପଟେ, ଆନ୍ଧ୍ରପ୍ରଦେଶରେ ସିବିଆଇ ମନାକୁ ନେଇ ପ୍ରତିକ୍ରିୟା ରଖିଛି ବିଜେଡି । ଦଳ କହିଛି, ଏହା କେନ୍ଦ୍ର ଓ ଆନ୍ଧ୍ରପ୍ରଦେଶର ପ୍ରସଙ୍ଗ । ଏହା ସିବିଆଇର ଭୂମିକା ଉପରେ ସନ୍ଦେହ ସୃଷ୍ଟି କରୁଛି । ବିଭିନ୍ନ ରାଜ୍ୟ ଏ ନେଇ ଟିପ୍ପଣୀ ଦେଇଛନ୍ତି । ପ୍ରଥମ ଥର ପାଇଁ ଗୋଟିଏ ରାଜ୍ୟ ସ୍ୱର ଉତୋଳନ କରିଛି । ରାଜ୍ୟରେ ବିରୋଧୀମାନେ ବିଭିନ୍ନ ପ୍ରସଙ୍ଗ ନେଇ ସିବିଆଇ ତଦନ୍ତ ଦାବି କରୁଛନ୍ତି । ସିବିଆଇ ମଧ୍ୟ ବିଭିନ୍ନ ପ୍ରସଙ୍ଗରେ ରାଜ୍ୟରେ ତଦନ୍ତ କରୁଛି । ରାଜ୍ୟ ସରକାର ରାଜ୍ୟରେ ସିବିଆଇକୁ ସଂପୂର୍ଣ୍ଣ ସହଯୋଗ କରୁଛନ୍ତି । ତେଣୁ ସିବିଆଇକୁ ନେଇ ରାଜ୍ୟରେ ଏମିତି ପ୍ରଶ୍ନ ଉଠୁଛି କାହିଁକି ।