କନକ ବ୍ୟୁରୋ: ଆଜି ସକାଳୁ ୩ଟି ଦୁର୍ଘଟଣାରେ ୮ଜଣଙ୍କର ମୃତ୍ୟୁ ହୋଇଛି । ସମ୍ବଲପୁର ବତେଗୁଡାରେ ଗଛର ମାରୁତି ଭ୍ୟାନ ପିଟି ହେବା ଯୋଗୁଁ ଦୁର୍ଘଟଣାସ୍ଥଳରେ ୪ଜଣଙ୍କର ମୃତ୍ୟୁ ହେବା ସହ ୨ଜଣ ଗୁରୁତର ଆହତ ହୋଇଛନ୍ତି । ସେପଟେ ଖୋର୍ଦ୍ଧାରେ ମଧ୍ୟ ଦୁର୍ଘଟଣା ଘଟିଛି । ଏକ ଟ୍ରାକ୍ଟର ଉପରେ ହାଇୱା ଚଢିଯିବାରୁ ଘଟଣାସ୍ଥଳରେ ୩ଜଣଙ୍କର ମୃତ୍ୟୁ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ରାୟଗଡ଼ା ଜିଲ୍ଲା କାଶିପୁର ପିଡବ୍ଲ୍ୟୁଡି ବିଭାଗର କନିଷ୍ଠ ଯନ୍ତ୍ରୀ ଗୋପୀନାଥ କିଷାନ ନିଜ ପରିବାର ସହିତ ନୂଆଖାଇ ଉପଲକ୍ଷେ ଏକ ଭ୍ୟାନରେ ନିଜ ପୈତୃକ ଗ୍ରାମ ଗଡ଼ପୋଷ ଥାନା ଅନ୍ତର୍ଗତ ଘନସରା ଗାଁକୁ ଆସୁଥିଲେ । ସୋନପୁର- ସମ୍ବଲପୁର ୧୫ ନମ୍ବର ଜାତୀୟ ରାଜପଥର ଖୁଣ୍ଟି ନିକଟରେ ଡ୍ରାଇଭର ଭାରସାମ୍ୟ ହରାଇ ଗାଡ଼ିକୁ ଏକ ଗଛରେ ପିଟି ଦେଇଥିଲେ ।
ଫଳରେ ଘଟଣାସ୍ଥଳରେ ଡାଇଭର ସଞ୍ଜୟ ମଟାଙ୍ଗୀ, ଗୋପୀନାଥଙ୍କ ପତ୍ନୀ ତପସ୍ୱିନୀ କିଷାନ, ମାଉସୀ ବୀଣାପାଣି କିଷାନ ଓ ଗୋପିନାଥଙ୍କ ଦେଢ଼ବର୍ଷର ଝିଅ ଜ୍ଞାନଦା କିଷାନଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିଲା । ଗୋପୀନାଥ ଓ ଅନ୍ୟ ଜଣେ ଡ୍ରାଇଭର ମଦନ ନାୟକଙ୍କୁ ଉଦ୍ଧାର କରାଯାଇ ଗୁରୁତର ଅବସ୍ଥାରେ ଡାକ୍ତରଖାନାରେ ଭର୍ତ୍ତି କରାଯାଇଛି ।
ସେପଟେ, ଖୋର୍ଦ୍ଧା ଥାନା ଅନ୍ତର୍ଗତ ଗଡ଼ଖୋର୍ଦ୍ଧା ନିକଟରେ ମଧ୍ୟ ଏକ ଟ୍ରାକ୍ଟର ଉପରେ ଡମ୍ପର ଚଢ଼ିଯିବାରୁ ଘଟଣାସ୍ଥଳରେ ୩ ଜଣଙ୍କର ମୃତ୍ୟୁ ଘଟିଥିବା ବେଳେ ୨ ଜଣ ଗୁରୁତର ଭାବେ ଆହତ ହୋଇଛନ୍ତି । ଖବରପାଇ ପୁଲିସ ଓ ଦମକଳବାହିନୀ ଘଟଣାସ୍ଥଳରେ ପହଞ୍ଚି ମୃତାହତମାନଙ୍କୁ ଉଦ୍ଧାର କରିଛନ୍ତି । ମୃତ୍ୟୁବରଣ କରିଥିବା ବ୍ୟକ୍ତିମାନେ ଟ୍ରାକ୍ଟରରେ ଥିବା ସନ୍ଦେହ କରାଯାଉଛି । ସେମାନଙ୍କ ପରିଚୟ ଏ ପର୍ଯ୍ୟନ୍ତ ମିଳି ନାହିଁ ।
ସେହିପରି, ରାଜଗାଙ୍ଗପୁର କାଂଶବାହାଲରେ ସକାଳୁ ଜଣେ ସାଇକେଲ ଆରୋହୀଙ୍କ ଉପରେ ବସ୍ ମାଡି ଯିବାରୁ ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଛି ।