ନବରଙ୍ଗପୁର କୋସାଗୁମୁଡାରେ ଚାଂଚଲ୍ୟ । ନାବାଳିକାକୁ ଗଣଦୁଷ୍କର୍ମ ପରେ ହତ୍ୟା ଅଭିଯୋଗ ଆଣିଲେ ପରିବାର ଲୋକେ
ଗତକାଲି ରାତିରୁ ନିଖୋଜ ପରେ ଆଜି ବିଲ ଭିତରୁ ମିଳିଲା ମୃତଦେହ
କନକ ବ୍ୟୁରୋ: ନବରଙ୍ଗପୁର କୋସାଗୁମୁଡା ଥାନା ଅଂଚଳରେ ଚାଂଚଲ୍ୟ । ଗଣଦୁଷ୍କର୍ମ ପରେ ନାବାଳିକାଙ୍କୁ ହତ୍ୟା କରାଯାଇଥିବା ଅଭିଯୋଗ ହୋଇଛି । ସ୍ୱେଚ୍ଛାସେବୀ ସଂଗଠନ ମା’ଘର ଓ ପରିବାର ଲୋକଙ୍କ ପକ୍ଷରୁ ଦୁଷ୍କର୍ମ ଓ ହତ୍ୟା ଅଭିଯୋଗ କରାଯାଇଛି । ଗତକାଲି ରାତିରୁ ନାବାଳିକା ଜଣକ ନିଖୋଜ ଥିବା ବେଳେ ଆଜି ବିଲ ଭିତରୁ ତାଙ୍କର ମୃତଦେହ ମିଳିଛି । ପୋଲିସ ଘଟଣାସ୍ଥଳରେ ପହଂଚି ତଦନ୍ତ ଆରମ୍ଭ କରିଛି । ଘଟଣାସ୍ଥଳରୁ ଚପଲ ଓ ଜିନ୍ସ ପ୍ୟାଂଟ ଜବତ କରିଛି ପୋଲିସ ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁଯାୟୀ ନବରଙ୍ଗପୁର ଜିଲ୍ଲାର କୋସାଗୁମୁଡା ଥାନା ଗୁମଣ୍ଡଳୀ ଗାଁରେ ଜଣେ ନାବାଳିକାଙ୍କ ମୃତ ଦେହ ଉଦ୍ଧାର କରାଯାଇଛି । ଗୁମଣ୍ଡଳୀରେ ଗତକାଲି ଦିଆଳି ପର୍ବ ଥିବା ବେଳେ ଗ୍ରାମରେ ସମସ୍ତେ ମଉଜ ମଜଲିସରେ ବ୍ୟସ୍ତ ଥିଲେ । ନାବାଳିକାଜଣକ ଦିଆଳି ପର୍ବ ଦେଖି ଘରକୁ ଫେରିଥିଲେ ଏବଂ ରାତି ପ୍ରାୟ ସାଢ଼େ ୭ଟା ରୁ ୮ ଟା ମଧ୍ୟରେ ସେ ପରିସ୍ରା କରିବାଲାଗି ବାହାରକୁ ଯାଇ ଆଉ ଘରକୁ ଫେରିନଥିଲେ । ନାବାଳିକା ନ ଫେରିବାରୁ ବାଧ୍ୟ ହୋଇ ଘରଲୋକେ ରାତିସାରା ଖୋଜାଖୋଜି କରିଥିଲେ, କିନ୍ତୁ ନାବାଳିକାଙ୍କୁ ପାଇ ନ ଥିଲେ।
ଆଜି ସକାଳେ ଗାଁର କିଛି ମହିଳା ନାବାଳିକାଙ୍କ ମୃତ ଦେହ ଗାଁଠାରୁ ପ୍ରାୟ ଅଧା କିଲୋମିଟର ଦୂରରେ ଥିବା ଏକ ବିଲରେ ପଡିଥିବା ଦେଖି ପରିବାର ଲୋକଙ୍କୁ ଜଣାଇଥିଲେ । ଶବ ନିକଟରେ ଦୁଇଟି ଜିନ୍ସ ପ୍ୟାଣ୍ଟ ପଡ଼ିରହିଛି, ନାବାଳିକାଙ୍କ ହାତ ଓ ପାଦରେ କ୍ଷତ ଚିହ୍ନ ଥିବା ବେଳେ ଦେହରେ ଅନେକ ସ୍ଥାନରେ କ୍ଷତ ଚିହ୍ନ ରହିଛି । ପରିପାର୍ଶିକ ପରିସ୍ଥିତିକୁ ଆଧାର କରି ପରିବାର ଲୋକେଏହା ଏକ ଗଣଦୁଷ୍କର୍ମ ପରେ ହତ୍ୟା ବୋଲି ଅଭିଯୋଗ କରିଛନ୍ତି ।