ନିର୍ବାଚନ ସମୟରେ ବିଜେପିର ଅପରାଧିକ କାର୍ଯ୍ୟକଳାପ ନେଇ ବିଜେଡିର କାଉଣ୍ଟର । କହିଲା ବିଜେପିକୁ ଘାରିଛି ପରାଜୟର ଭୟ ।
କନକ ବ୍ୟୁରୋ : ଦ୍ୱିତୀୟ ପର୍ଯ୍ୟାୟ ନିର୍ବାଚନ ଶେଷ ହୋଇଥିବା ବେଳେ, ଆଜି ସୋରଡାରେ ଯେଉଁ ଅଭାବନୀୟ ଘଟଣା ଦେଖିବାକୁ ମିଳିଥିଲା, ତାକୁ ନେଇ ପ୍ରତିକ୍ରିୟା ରଖିଛି ବିଜେଡି । ବିଜେପି ପ୍ରାର୍ଥୀଙ୍କ ଇଭିଏମ୍ ଭଙ୍ଗାରୁଜା ଓ ବୁଥରେ ଆକ୍ରମଣ ଘଟଣାକୁ ଦଳ ପକ୍ଷରୁ ନିନ୍ଦା କରାଯାଇଛି । ବିଜେପି ନିର୍ବାଚନ ହାରିବା ଭୟରେ ଏଭଳି ହିଂସା ଭିଆଉଥିବା ବିଜେଡି କହିଛି । କେବଳ ଏତିକି ନୁହେଁ ବିଜେପି ପ୍ରାର୍ଥୀ ନୀଳମଣି ବିଷୋୟୀଙ୍କ ନାଁରେ ୨୮ରୁ ଅଧିକ ମାମଲା ରହିଛି । ତାଙ୍କ ପ୍ରାର୍ଥୀତ୍ୱକୁ ନେଇ ପ୍ରଶ୍ନ ଉଠାଇଛି ବିଜେଡି ।
Kanak News is now on WhatsApp
Join and get latest news updates delivered to you via WhatsApp
କେବଳ ଏତିକି ନୁହେଁ, ଦୁଇଦିନ ତଳେ ବୁର୍ଲା ଏମସିଏଲ ହେଲିପ୍ୟାଡରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସୁଟକେସ୍ ଯାଞ୍ଚ ପ୍ରସଙ୍ଗ ମଧ୍ୟ ଉଠାଇଛି ବିଜେଡି । ହେଲିପ୍ୟାଡରେ ନଜର ଆସିଥିବା ଧର୍ମେନ୍ଦ୍ରଙ୍କ ସୁଟକେସରେ କ’ଣ ଥିଲା ଏବଂ ଧର୍ମେନ୍ଦ୍ର ଯାଞ୍ଚରେ କାହିଁକି ସହଯୋଗ କଲେନି ବୋଲି ବୋଲି ଦଳ ପକ୍ଷରୁ ପ୍ରଶ୍ନ କରାଯାଇଛି । ଏହା ସହ କେନ୍ଦ୍ରମନ୍ତ୍ରୀଙ୍କ ଗ୍ୟାଙ୍ଗଷ୍ଟାର ଧଳସାମନ୍ତ ଏବଂ ଟିଟୋ ସହ ଲିଙ୍କ ରହିଥିବା ବିଜେଡି କହିଛି । ତେବେ ବିଜେପିର ଏପରି ଅନେକ ଅପରାଧିକ କାର୍ଯ୍ୟକଳାପ ଥିବା ବେଳେ ନିର୍ବାଚନ ସମୟରେ ପରାଜୟ ଭୟରେ ହିଂସା ଭିଆଉଥିବା ବିଜେଡି କହିଛି ।
ସୂଚନା ଅନୁଯାୟୀ, ଆଜି ସୋରଡ଼ା ନିର୍ବାଚନ ମଣ୍ଡଳୀର ସୋରଡ଼ା ରେଂଟ୍ ଗାଁର ବୁଥ ନମ୍ବର ୧୮୨ରେ ବିଜେପି ପ୍ରାର୍ଥୀ ଇଭିଏମ୍ କଂଟ୍ରୋଲ ୟୁନିଟ୍ ଭଙ୍ଗାରୁଜା କରିଥିବା କହିଛନ୍ତି ଗଂଜାମ ଜିଲ୍ଲାପାଳ । ଜିଲ୍ଲାପାଳ ବିଜୟ ଅମତ୍ର କୁଲାଙ୍ଗି କହିଛନ୍ତି, ବିଜେପି ପ୍ରାର୍ଥୀ ଜୋରଜବରଦସ୍ତ ବୁଥ ଭିତରେ ପଶି ଇଭିଏମ୍ କଂଟ୍ରୋଲ ୟୁନିଟ୍ ଭଙ୍ଗାରୁଜା କରିଥିଲେ । ଏ ନେଇ ଥାନାରେ ଏତଲା ଦିଆଯିବା ସହ ରାଜ୍ୟ ନିର୍ବାଚନ ଅଧିକାରୀଙ୍କୁ ଅବଗତ କରାଯାଇଛି । ତେବେ ଏହି ଘଟଣା ପରେ ସ୍ଥାନୀୟ ଅଂଚଳରେ ଉତ୍ତେଜନା ସୃଷ୍ଟି ହୋଇଛି ।