୯୦ ବର୍ଷର ନିଷ୍ପତ୍ତି ୯୦ ମିନିଟରେ । ପଛୁଆବର୍ଗଙ୍କ ସର୍ଭେ ପାଇଁ ମନାକଲା କେନ୍ଦ୍ର, ଅଂଟା ଭିଡିଲା ରାଜ୍ୟ ।
ଏପରିକି ବର୍ତ୍ତମାନର ବିଜେପି ସରକାର ୨୦୧୩ରେ କଂଗ୍ରେସକୁ ଏନେଇ ସମାଲୋଚନା କରିଥିଲା । ଆଉ କ୍ଷମତାକୁ ଆସିଲେ ଜାତିଭିତ୍ତିକ ତଥ୍ୟ ପ୍ରଦାନ କରିବ ବୋଲି ପ୍ରତିଶ୍ରୁତି ଦେଇଥିଲେ କିନ୍ତୁ ତାହା ଏଯାବତ୍ କରିନାହାନ୍ତି ।
କନକ ବ୍ୟୁରୋ: ରାଜ୍ୟ ବିଧାନସଭାରେ ଐତିହାସିକ ନିଷ୍ପତ୍ତି । ପାରିତ ହେଲା ଓଡ଼ିଶା ପଛୁଆ ବର୍ଗ କମିଶନ ବିଲ୍ ୨୦୨୦ । ପଛୁଆ ବର୍ଗଙ୍କୁ ଅଧିକ ଫୋକସ୍ ଦେଇ କିଛିଦିନ ପୂର୍ବେ ରାଜ୍ୟ ସରକାର ଓବିସି କମିଶନ୍ ଗଠନ କରିଥିବା ବେଳେ ଆଜି ଏସଂକ୍ରାନ୍ତୀୟ ବିଲ ପାରିତ କରିଛନ୍ତି । ଏହାର ମୂଳ ଲକ୍ଷ୍ୟ ରାଜ୍ୟରେ ଥିବା ପଛୁଆବର୍ଗଙ୍କର ସାମାଜିକ ଓ ଶିକ୍ଷାଗତ କ୍ଷେତ୍ରରେ ସର୍ଭେ କରିବା ।
Kanak News is now on WhatsApp
Join and get latest news updates delivered to you via WhatsApp
ବିଧାନସଭାର ବଜେଟ୍ ଅଧିବେଶନରେ ଏହି ବିଲ୍ ପାରିତ ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କହିଛନ୍ତି, ୧୯୩୧ ମସିହାରେ ଶେଷ ଥର ପାଇଁ ଜାତିଭିତ୍ତିକ ଜନଗଣନା କରାଯାଇଥିଲା । ଏହାପରେ ୨୦୧୧ ଏସଇସିସି ସର୍ଭେରେ ଓବିସି ତଥ୍ୟ ସଂଗ୍ରହ କରାଯାଇଥିଲେ ବି ତଥ୍ୟ ସାମ୍ନାକୁ ଅଣାଯାଇ ନଥିଲା । ଏପରିକି ବର୍ତ୍ତମାନର ବିଜେପି ସରକାର ୨୦୧୩ରେ କଂଗ୍ରେସକୁ ଏନେଇ ସମାଲୋଚନା କରିଥିଲା । ଆଉ କ୍ଷମତାକୁ ଆସିଲେ ଜାତିଭିତ୍ତିକ ତଥ୍ୟ ପ୍ରଦାନ କରିବ ବୋଲି ପ୍ରତିଶ୍ରୁତି ଦେଇଥିଲେ କିନ୍ତୁ ତାହା ଏଯାବତ୍ କରିନାହାନ୍ତି ।
ସେହିପରି ୨୦୧୮, ଅଗଷ୍ଟ ୩୧ରେ ପୂର୍ବତନ ଗୃହମନ୍ତ୍ରୀ ରାଜନାଥ ସିଂ ୨୦୨୧ ଜନଗଣନା ନେଇ ସମୀକ୍ଷା କରିବାବେଳେ ଓବିସିଙ୍କ ତଥ୍ୟ ପ୍ରକାଶ କରାଯିବ ବୋଲି ନିଷ୍ପତି ନେଇଥିଲେ ମଧ୍ୟ ସେ ଚୁପ୍ ରହିଗଲେ । ଏସବୁ ବାଦ୍ ଓଡ଼ିଶା ସରକାର ଚଳିତ ଜାନୁଆରୀରେ ୨୦୨୧ ଜନଗଣନାରେ ଜାତିଭିତ୍ତିକ ଜନଗଣନା ନେଇ ଏକ ସଂକଳ୍ପ ପତ୍ର କେନ୍ଦ୍ର ସରକାରଙ୍କ ନିକଟକୁ ପଠାଇଥିଲେ । ଏପରିକି ଉଭୟ ରାଜ୍ୟସଭା ଓ ଲୋକସଭାରେ ବିଜେଡି ସାଂସଦ ମାନେ ଏନେଇ ବାରମ୍ବାର ସ୍ୱର ଉଠାଇଚାଲିଛନ୍ତି । ହେଲେ କେନ୍ଦ୍ର ଏନେଇ ନକରାତ୍ମକ ଆଭିମୁଖ୍ୟ ଦେଖାଇବା ପରେ ରାଜ୍ୟ ସରକାର ନିଜସ୍ୱ ଉଦ୍ୟମରେ ଆଗକୁ ବଢିବାକୁ ନିର୍ଣ୍ଣୟ କରିଛନ୍ତି ।
ଏପଟେ ରାଜ୍ୟ ବିଧାନସଭାରେ ନବୀନ ଖେଳିଛନ୍ତି ମାଷ୍ଟର ଷ୍ଟ୍ରୋକ୍ । ସାରା ଦେଶକୁ ଚକିତ କଲା ଭଳି ପଛୁଆବର୍ଗଙ୍କୁ ଅଧିକ ଫୋକସ୍ ଦେଇ ୧୯୯୩ ପଛୁଆ ବର୍ଗ ଆଇନରେ ସଂଶୋଧନ କରି ଓଡ଼ିଶା ପଛୁଆବର୍ଗ କମିଶନ ବିଲ୍ ୨୦୨୦ ପାରିତ କରିଛନ୍ତି । ଯାହାଦ୍ୱାରା ଏହି କମିଶନ ପଛୁଆ ବର୍ଗଙ୍କ ସାମାଜିକ ଓ ଶିକ୍ଷାଗତ ଦିଗ ନେଇ ସର୍ଭେ କରିବ । ତେବେ ଯାହାକୁ ନେଇ ଦୀର୍ଘ ୧୯୩୧ ମସିହାରୁ ଏଯାବତ୍ ଅପେକ୍ଷା କରି ରହିଥିଲେ ପଛୁଆବର୍ଗର ଲୋକେ ତାହା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସାକାର କରିବାକୁ ଯାଉଛନ୍ତି । ପଛୁଆ ବର୍ଗର ଲୋକଙ୍କୁ କିଭଳି ତାଙ୍କର ନାର୍ଯ୍ୟ ଅଧିକାର ମିଳିବ ସେନେଇ ସରକାର ଆରମ୍ଭ କରିଛନ୍ତି ପ୍ରସ୍ତୁତି ।
ତେବେ ବଡ କଥା ହେଉଛି, କମିଶନଙ୍କ ଗଣନା ପରେ ଏହାରି ଆଧାରରେ ସଂରକ୍ଷଣ ଦେବାକୁ ରାଜ୍ୟ ସରକାର ନିଷ୍ପତି ନେବେ କି ନାହିଁ? ଆଗାମୀ ୨୦୨୪ ନିର୍ବାଚନ ପୂର୍ବରୁ ଏହା ସବୁଠାରୁ ବଡ ମୁଦ୍ଦା ହେବାର ଅନୁମାନ କରାଯାଉଛି । କାରଣ କମିଶନଙ୍କ କାର୍ଯ୍ୟକାଳକୁ ୩ ବର୍ଷ ରଖାଯାଇଥିବା ବେଳେ ଯେଉଁ ରିପୋର୍ଟ ଆସିବ, ତାରି ଆଧାରରେ ରାଜ୍ୟ ସରକାର ବଡ ଘୋଷଣା କରିବାର ସମ୍ଭାବନା ମଧ୍ୟ ରହୁଛି ।