ଚୁପ୍ ରହିଲେ ଚାଣକ୍ୟ ! ପ୍ରଶ୍ନ ଆସିଲା ହେଲେ ମିଳିଲାନି ଉତ୍ତର
କନକ ବ୍ୟୁରୋ : ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା କେତେକ ଗୁରୁତ୍ୱପୂର୍ଣ୍ଣ ପ୍ରଶ୍ନ ଉପରେ ଚୁପ୍ ରହିଥିଲେ । କହିବାକୁ ଚାହିଁ ନଥିଲେ ନବୀନ ପଟ୍ଟନାୟକଙ୍କୁ ଟକ୍କର ଦେବା ପାଇଁ ୨୦୧୯ରେ କେଉଁ ଚେହେରାକୁ ବାଛିବ କେନ୍ଦ୍ରୀୟ ନେତୃତ୍ୱ ।
Kanak News is now on WhatsApp
Join and get latest news updates delivered to you via WhatsApp
ଅମିତ ଶାହାଙ୍କ ସାମ୍ବାଦିକ ସମ୍ମିଳନୀରୁ ଅନେକ ଉତ୍ତର ଆଶା କରାଯାଉଥିଲେ ବି ରାଜନୈତିକ ଦୃଷ୍ଟିରୁ ସମ୍ବେଦନଶୀଳ ପ୍ରସଙ୍ଗକୁ ଚତୁରତାର ସହ ଏଡାଇଗଲେ ବିଜେପିର ଚାଣକ୍ୟ । ୨୦୧୯ରେ ଯୁବ ନେତୃତ୍ୱ ବିଜେପି ମଙ୍ଗ ଧରିବେ ବୋଲି ଦୃଢୋକ୍ତି ଦେଖାଉଥିବା ବେଳେ ମିଶନ ୧୨୦ ପ୍ଲସର ସେନାପତି କିଏ ହେବ, ସେନଇ ଚୁପ ରହିଥିଲେ ଅମିତ ଶାହା ।
ସେହିଭଳି କିଛି ଦିନ ଆଗରୁ ଇଣ୍ଡିଆ ଟୁଡେରେ ବାହାରିଥିବା ରିପୋର୍ଟ ଉପରେ ବି ମାପିଚୁପି ମନ୍ତବ୍ୟ ଦେଇଥିଲେ ଅମିତ ଶାହା । ସୋମନାଥ ନାଥ, କାଶୀ ବିଶ୍ୱନାଥ ଧାମ ପରେ ମୋଦି ଜଗନ୍ନାଥ ଧାମ ଅର୍ଥାତ୍ ପୁରୀରୁ ଆଗାମୀ ନିର୍ବାଚନ ଲଢିପାରନ୍ତି ବୋଲି ରିପୋର୍ଟ ବାହାରିଥିଲା । ହେଲେ ଏହାକୁ ନେଇ ମାପିଚୁପି ବୟାନ ରଖିଥିଲେ ଶାହା ।
ରାଜ୍ୟ ରାଜନୈତିକ ଦୃଶ୍ୟପଟ୍ଟରେ କଂଗ୍ରେସ ଶକ୍ତିଶାଳୀ ହେଲେ ବିଜେପିର ସ୍ଥିତି କଣ ହେବ? କାରଣ ପଂଚାୟତ ନିର୍ବାଚନରେ କଂଗ୍ରେସର ବହୁ ଭୋଟ ବିଜେପି ଖାତାକୁ ଆସିଥିଲା । ତେବେ ଶାହା ରାଜ୍ୟ ରାଜନୀତିର ଗଣିତକୁ ନେଇ ଉତ୍ତର ଦେବା ବଦଳରେ ଜାତୀୟ ଦୃଶ୍ୟପଟ୍ଟକୁ ଆୟୁଧ କରି ବେଶ ଚଚ୍ଛୁରତାର ସହ ଏହା ଭିତରୁ ବାହାରି ଗଲେ ।
ସାଧାରଣତଃ ରାଜନୈତିକ ଦଳ ନିଜ ରଣନୀତି ଗଣମାଧ୍ୟମ ସାମ୍ନାରେ ରଖିନଥାନ୍ତି, ହେଲେ ଯେଉଁ ୧୨୦ ଆସନ କଥା କୁହାଯାଉଛି, ସେଥିରେ ବିନା ସେନାପତିରେ ଏହା ହାସଲ କରିବା କିଭଳି ସମ୍ଭବ ତାକୁ ନେଇ ଏବେ ଚର୍ଚ୍ଚା । ରାଜନୈତିକ ବାଧ୍ୟବାଧ୍ୟକତା ଅନେକ ସମୟରେ ଦଳୀୟ ନିଷ୍ପତ୍ତିକୁ ଝୁଲାଇ ରଖିଥାଏ । ଏହାର ଅନେକ ନଜିର ମଧ୍ୟ ରହିଛି । ବୋଧହୁଏ ବିଜେପିର ଚାଣକ୍ୟ ଯେଉଁ ଆଧାର ବଳରେ ୧୨୦ ସଂଖ୍ୟା କଥା କହୁଛନ୍ତି, ତାର କାର୍ଡକୁ ଗଣମାଧ୍ୟମ ସାମ୍ନାରେ ଖୋଲିବାକୁ ଚାହୁଁନାହାନ୍ତି ।