ଯାଜପୁର : ଚଣ୍ଡିଖୋଲ ଆର୍ଟିଓ ତଥା ଭୂତଗାଡ଼ି ମାମଲାରେ ନୂଆ ଟୁଇଷ୍ଟ୍ । ଘୋଟାଲାର ଦୁଇ ଖଳନାୟକଙ୍କ ସହ ବିଜେଡି ଲିଙ୍କ୍ ଅଭିଯୋଗ । ଶାସକ ଦଳର ଚାପରେ ଅଭିଯୁକ୍ତ ସୂର୍ଯ୍ୟକାନ୍ତ ପରିଡ଼ା ଓ ଦିଲ୍ଲୀପ ନାୟକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ହେଉନଥିବା ଅଭିଯୋଗ କରିଛି ଉଭୟ ବିଜେପି ଓ କଂଗ୍ରେସ ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ଫ୍ରେମରେ ବିଜେଡି ବିଧାୟକ ଅମର ଶତପଥୀ ଏବଂ ଚଣ୍ଡିଖୋଲ ଆର୍ଟିଓ ତଥା ଭୂତଗାଡ଼ି ମାମଲାର ଦୁଇ ଖଳନାୟକ ଥିବାକୁ ନେଇ ଏବେ ବଡ଼ଚଣା ଅଂଚଳରେ ଚର୍ଚ୍ଚା। ଫଟୋରେ ଭୂତ ଟ୍ୟାଙ୍କର ମାମଲାର ଦୁଇ ଅଭିଯୁକ୍ତ ସୂର୍ଯ୍ୟକାନ୍ତ ପରିଡ଼ା ଓ ଦିଲ୍ଲୀପ ନାୟକ, ବଡ଼ଚଣାର ବିଜେଡି ବିଧାୟକ ଅମର ଶତପଥୀଙ୍କୁ ଫୁଲତୋଡ଼ା ଦେଉଛନ୍ତି । ତେବେ ଚଣ୍ଡିଖୋଲ ଆର୍ଟିଓ ଅଫିସରେ କେଳେଙ୍କାରୀ ଘଟଣା ସାମ୍ନାକୁ ଆସିବା ପରେ ଏବେ ଫେରାର୍ ଅଛନ୍ତି ସୂର୍ଯ୍ୟକାନ୍ତ ଓ ଦିଲ୍ଲୀପ । ପୂର୍ବରୁ ବାଇକ୍ ଚୋରି ମାମଲାରେ ଜେଲ ବି ଯାଇସାରିଛନ୍ତି ସୂର୍ଯ୍ୟକାନ୍ତ । ଆଉ ଦିଲ୍ଲୀପ ହେଉଛନ୍ତି ସିହା ପଂଚାୟତର ସରପଂଚଙ୍କ ପୁଅ ।
ତେବେ ଏ ଫଟୋକୁ ନେଇ ପ୍ରତିକ୍ରିୟା ରଖିଛନ୍ତି ବିଜେଡି ବିଧାୟକ ଅମର ଶତପଥୀ । ପବ୍ଲିକ୍ ଲାଇଫରେ ବହୁ ଲୋକ ଏମିତି ଫୁଲତୋଡ଼ା ଦିଅନ୍ତି । ତେଣୁ ଏହାକୁ ନେଇ ରାଜନୀତି ହେବା ଉଚିତ୍ ନୁହେଁ ବୋଲି ସେ କହିଛନ୍ତି । ଏହି ଦୁଇ ଦଲାଲ୍ ଗାଡ଼ି ନଥାଇ ଜାଲ କାଗଜପତ୍ର ଜରିଆରେ ୨୭ଟି ଟ୍ୟାଙ୍କରର ରେଜିଷ୍ଟ୍ରେସନ୍ କରିବା ସହ ଆଇଓସିଏଲ୍ ଟେଣ୍ଡର ହାତେଇବାକୁ ଉଦ୍ୟମ କରିଥିଲେ । ଏନେଇ ଚଣ୍ଡିଖୋଲ ଆର୍ଟିଓ ବଡ଼ଚଣା ଥାନାରେ ମାମଲା ରୁଜୁ କରିଥିଲା । ଏହି ମାମଲାରେ ବର୍ତମାନ ସୁଦ୍ଧା ୧୩ଟି ଟ୍ୟାଙ୍କର ଜବତ ହୋଇଥିବା ବେଳେ ଆର୍ଟିଓ ଅଫିସରେ ଷ୍ଟେନୋ ଏବଂ ପୂର୍ବତନ ଜୁନିୟର ଏମ୍ଭିଆଇଙ୍କ ସମେତ ମୋଟ୍ ୭ ଜଣଙ୍କୁ ଗିରଫ କରାଯାଇଛି । ହେଲେ ଏବେ ବି ଫେରାର୍ ଅଛନ୍ତି ଏହି ଗ୍ୟାଙ୍କର ମାଷ୍ଟର ମାଇଷ୍ଟ ସୂର୍ଯ୍ୟକାନ୍ତ ଓ ଦିଲ୍ଲୀପ ।