କନକ ବ୍ୟୁରୋ : ପୁଣି ବଜ୍ରପାତ ଆଲର୍ଟ ଜାରି କରିଛି ପାଣିପାଗ ବିଭାଗ । ଆଜି ୧୨ଟାରୁ ଅପରାହ୍ଣ ୪ଟା ମଧ୍ୟରେ ଓଡ଼ିଶାର ୮ଟି ଜିଲ୍ଲାରେ ଘଡ଼ଘଡ଼ି ସହ ବର୍ଷା ହେବାର ସମ୍ଭାବନା ଅଛି । ଏନେଇ ସତର୍କ ସୂଚନା ଜାରି କିରିଛି ପାଣିପାଗ କାର୍ଯ୍ୟାଳୟ । ବଜ୍ରପାତ ହେବାର ସମ୍ଭାବ୍ୟ ଜିଲ୍ଲା ଗୁଡିକ ହେଲା ମୟୂରଭଞ୍ଜ, କେନ୍ଦୁଝର, ବାଲେଶ୍ୱର, ଭଦ୍ରକ, କେନ୍ଦ୍ରାପଡ଼ା, ଜଗତ୍ସିଂହପୁର, ଗଞ୍ଜାମ ଓ ରାୟଗଡ଼ା । ନିମ୍ନ ଲିଖିତ ଜିଲ୍ଲାର ଲୋକେ ଆଖପାଖର କୋଠାଘରେ କିଂବା ନିରାପଦ ସ୍ଥାନରେ ଆଶ୍ରୟ ନେବାକୁ ଉପଦେଶ ଦିଆଯାଇଛି।
Kanak News is now on WhatsApp
Join and get latest news updates delivered to you via WhatsApp
ଗତକାଲି ୬ଟି ଜିଲ୍ଲା ମୟୁରଭଞ୍ଜ, କେନ୍ଦୁଝର, ବାଲେଶ୍ୱର, ଭଦ୍ରକ, ଯାଜପୁର ଓ ଗଜପତି ପାଇଁ ଏହି ଆଲର୍ଟ ଜାରି କରାଯାଇଥିଲା । ଗତ ମାସରେ ରାଜ୍ୟର ବିଭିନ୍ନ ସ୍ଥାନରେ ବଜ୍ରପାତ ଘଟି ୪୦ରୁ ଅଧିକ ଲୋକଙ୍କ ପ୍ରାଣହାନି ହୋଇସାରିଛି ।
ବର୍ଷକୁ ବର୍ଷ ରାଜ୍ୟରେ ବଢ଼ୁଥିବା ବଜ୍ରାଘାତ ଜନିତ ମୃତ୍ୟୁକୁ ରୋକିବାକୁ ଅଂଟା ଭିଡିଛନ୍ତି ରାଜ୍ୟ ସରକାର । ବଜ୍ରପାତର କାରଣ ଓ ନିରାକରଣ ପାଇଁ ସରକାର ଖୁବ୍ ଶୀଘ୍ର ଗଠନ କରିବାକୁ ଯାଉଛନ୍ତି ଏକ ସ୍ୱତନ୍ତ୍ର ବିଶେଷଜ୍ଞ ଦଳ । ଏହି ଟିମ୍ ବ୍ରଜପାତ ମୃତ୍ୟୁର ରୋକିବାର ବାଟ ଖୋଜିବ ।
ବନ୍ୟା, ବତ୍ୟା, ବର୍ଷା ଓ ଅଗ୍ନିକାଣ୍ଡକୁ ବଳି ଯାଇଛି ବଜ୍ରପାତ । ବଜ୍ରପାତ ଏବେ ସବୁଠୁ ବଡ ବିପର୍ଯ୍ୟୟ ଭାବରେ ଉଭା ହୋଇଛି । ଆଉ ଏହାର ମୁକାବିଲା ପାଇଁ ଅଂଟା ଭିଡିଛନ୍ତି ରାଜ୍ୟ ସରକାର । କାରଣ ଖୋଜିବାକୁ ଗଠନ ହେବ ସ୍ୱତନ୍ତ୍ର ବିଶେଷଜ୍ଞ ଦଳ । ଯେଉଁ ଦଳରେ ରହିବେ ଆଇଆଇଟିର ବିଶେଷଜ୍ଞ, ବୈଜ୍ଞାନିକ, ପାଣିପାଗ ବିଭାଗର ଅଧିକାରୀ ଏବଂ ଓୟୁଏଟିର କୁଳପତି । ଏହି ଟିମର ଲକ୍ଷ୍ୟ ରହିବ- ବଜ୍ରପାତର କାରଣ ଖୋଜିବା ଏବଂ ସମାଧାନର ବାଟ ବାହାର କରିବା ।
ଅନ୍ୟ ରାଜ୍ୟ ତୁଳନାରେ ଆମ ରାଜ୍ୟରେ ବଜ୍ରାଘାତରେ ମୃତ୍ୟୁ ସଂଖ୍ୟା ଢ଼େର ଅଧିକ । ବିଶେଷ କରି ମେ’ ମାସରୁ ଅଗଷ୍ଟ ମାସ ଭିତରେ ଏହାର ମାତ୍ରା ଅଧିକ । ଆଉ ବଜ୍ରପାତର କିଛି ପ୍ରମୁଖ କାରଣ ହେଲା- – ମୌସୁମୀର ପ୍ରଭାବ । କାଳ ବୈଶାଖୀର ପ୍ରଭାବ । ବାୟୁମଣ୍ଡଳରେ ଅଧିକ ଜଳୀୟବାଷ୍ପ ସୃଷ୍ଟି ହେବା ।
ବଜ୍ରପାତରେ ପ୍ରତିବର୍ଷ ଦେଶରେ ଯାଉଛି ପ୍ରାୟ ୨ହଜାର ଲୋକଙ୍କ ଜୀବନ । ଆଉ ଏହି ସଂଖ୍ୟା ଓଡ଼ିଶାରେ ବର୍ଷକୁ ୪ଶହ ବି ଟପିଛି । ଚଳିତବର୍ଷ ଓଡ଼ିଶା ଏପ୍ରିଲରୁ ଏବେ ସୁଦ୍ଧା ୨୫୮ ଜଣଙ୍କ ମୃତ୍ୟୁ ହୋଇଛି । ଗତ ୪ବର୍ଷର ହିସାବ କହୁଛି-ଓଡ଼ିଶାରେ ପ୍ରାୟ ୧୬ଶହ ଲୋକଙ୍କ ମୃତ୍ୟୁ ହୋଇଛି । ଆଉ ଏସବୁ ଭିତରେ ଲୋକଙ୍କ ପାଇଁ ବଡ ଆହ୍ୱାନ ହୋଇଛି ସଚେତନତା । ଏଯେଉଁ ଟିମ୍ ଗଠନ ହେବ, ତାର ନିଷ୍କର୍ସ ଯାହା ଆସୁ, ଲୋକଙ୍କ ପାଇଁ ବଜ୍ରପାତରୁ ସୁରକ୍ଷିତ ରହିବା ପାଇଁ ସଚେତନତା ହିଁ ବର୍ତମାନ ପାଇଁ ବଡ଼ ଅସ୍ତ୍ର ।