ସାବଧାନ! ମୋ ସରକାର ସବୁ ଦେଖୁଛି । କାର୍ଯ୍ୟରେ ଅବହେଳା ପାଇଁ ସୁନ୍ଦରଗଡ ସିଡିଏମଓଙ୍କୁ ନିଲମ୍ବିତ କଲେ ରାଜ୍ୟ ସରକାର, ସରକାରୀ କର୍ମଚାରୀଙ୍କୁ କଡା ଚେତାବନୀ ଦେଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
କନକ ବ୍ୟୁରୋ : ‘ମୋ ସରକାର’ ଯୋଜନାକୁ ଅତି ଗୁରୁତର ସହ ଲାଗୁ କରୁଛନ୍ତି ରାଜ୍ୟ ସରକାର । କାର୍ଯ୍ୟରେ ଅବହେଳା କଲେ ନିସ୍ତାର ନାହିଁ । ଆଜି ଏଭଳି ସନ୍ଦେଶ ଆସିଛି ସୁନ୍ଦରଗଡରୁ । ଫାଇଭ୍-ଟି ସଚିବ, ସ୍ୱାସ୍ଥ୍ୟ ସଚିବ ଓ ଏନଆର୍ଏଚଏମ ନିର୍ଦ୍ଦେଶିକାଙ୍କ ଗସ୍ତବେଳେ ସୁନ୍ଦରଗଡ ଜିଲ୍ଲା ମୁଖ୍ୟ ଚିକିତ୍ସାଳୟରେ ଅବ୍ୟବସ୍ଥା ନେଇ ରୋଗୀମାନେ ଅଭିଯୋଗ କରିଥିଲେ । ଏହାପରେ କାର୍ଯ୍ୟାନୁଷ୍ଠାନ ଗ୍ରହଣ କରି ସରକାର ଆଜି ସିଡିଏମଓଙ୍କୁ ନିଲମ୍ବନ କରିଛନ୍ତି ଏବଂ ଜିଲ୍ଲାପାଳଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି । ଏପରିକି କାର୍ଯ୍ୟରେ ଅବହେଳା କରୁଥିବା ଅଧିକାରୀଙ୍କ ବିରୋଧରେ ଏଭଳି କାର୍ଯ୍ୟାନୁଷ୍ଠାନ ଆଗକୁ ମଧ୍ୟ ଜାରି ରହିବ ବୋଲି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଟ୍ୱିଟ୍ ସ୍ପଷ୍ଟ କରାଯାଇଛି । ବିଶେଷକରି ଥାନା ଓ ହସ୍ପିଟାଲରେ ଲୋକଙ୍କୁ ହଇରାଣ କରୁଥିବା କର୍ମଚାରୀଙ୍କ ଉପରେ କାର୍ଯ୍ୟାନୁଷ୍ଠାନ ନିଆଯିବ ବୋଲି ସିଏମଓ ପକ୍ଷରୁ କୁହାଯାଇଛି । ଗଣତନ୍ତ୍ରରେ ଲୋକମାନେ ପ୍ରକୃତ ମାଲିକ ତେଣୁ ଉଭୟ ବୃତ୍ତିଗତ ଓ ନୀତିଗତ ଭାବେ ସରକାରୀ କଳ ଏ ଦିଗରେ କାମ କରିବ ।
Kanak News is now on WhatsApp
Join and get latest news updates delivered to you via WhatsApp
‘ମୋ ସରକାର’ ଅଭିଯାନକୁ ରାଜ୍ୟ ସରକାର କେତେ ଗୁରୁତ୍ୱର ସହ ନେଉଛନ୍ତି ତା’ର ଏକ ବଡ ଉଦାହରଣ ସୁନ୍ଦରଗଡ଼ ଜିଲ୍ଲା ହସ୍ପିଟାଲରୁ ସାମ୍ନାକୁ ଆସିଛି । କାର୍ଯ୍ୟରେ ଅବହେଳା ଏବଂ ରୋଗୀଙ୍କୁ ହଇରାଣ କରିବା ଭଳି ସାଂଘାତିକ ଅଭିଯୋଗ ଆସିବା ପରେ ତୁରନ୍ତ ସିଡିଏମଓଙ୍କୁ ନିଲମ୍ବନ କରିଛନ୍ତି ରାଜ୍ୟ ସରକାର । ଏମିତି କି ରୋଗୀଙ୍କୁ କାହିଁକି ହସ୍ପିଟାଲରେ ଅସୁବିଧାର ସମ୍ମୁଖୀନ ହେବାକୁ ପଡୁଛି ସେ ସଂପର୍କରେ ଜଣାଇବା ପାଇଁ ଜିଲ୍ଲାପାଳଙ୍କୁ ନୋଟିସ୍ କରାଯାଇଛି ।
ସୁନ୍ଦରଗଡ଼ର ଏହି କାର୍ଯ୍ୟାନୁଷ୍ଠନ ପରେ ପରେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟରୁ ଆସିଛି ଏକ ଟ୍ୱିଟ୍, ଯେଉଁଥିରେ ଲେଖାଯାଇଛି- ଥାନା ଓ ଡାକ୍ତରଖାନାରେ ଜନତାଙ୍କୁ ହଇରାଣ ଏବଂ କାର୍ଯ୍ୟରେ ଅବହେଳା ସାମ୍ନାକୁ ଆସିିଲେ ଏହି ଭଳି କାର୍ଯ୍ୟାନୁଷ୍ଠାନ ଜାରି ରହିବ । ଗଣତନ୍ତ୍ରରେ ଜନତା ମାଲିକ, ତେଣୁ ସରକାରୀ ବ୍ୟବସ୍ଥା ନୈତିକତା ଆଧାରରେ ଏବଂ ପେଶାଦାର ଭାବେ କାର୍ଯ୍ୟ କରିବାକୁ ବାଧ୍ୟ ।
Such action will continue to be taken against negligence in duty and harassment to public in Government offices like police stations & hospitals. In our democracy where people are the true masters, the Government machinery must strive to serve people professionally and ethically.
— CMO Odisha (@CMO_Odisha) October 13, 2019
ଏହା ପୂର୍ବରୁ ଫାଇଭ-ଟି ସଚିବ, ସ୍ୱାସ୍ଥ୍ୟ ସଚିବ ଏବଂ ଏନଆରଏଚଏମ ନିର୍ଦେଶିକା ସୁନ୍ଦରଗଡ଼ ହସ୍ପିଟାଲ ଯାଇ ସ୍ୱାସ୍ଥ୍ୟସେବା ସଂପର୍କରେ ରୋଗୀ ଏବଂ ରୋଗୀଙ୍କ ସଂପର୍କୀୟଙ୍କୁ ପଚାରିବୁଝିଥିଲେ । ଆଉ ଏତିକି ବେଳେ ସାମ୍ନାକୁ ଆସିଥିଲା କିଛି ଏଭଳି ଅଭିଯୋଗ ।
-ଡାଇଲିସିସ୍ ପାଇଁ ରୋଗୀଙ୍କୁ ହସ୍ପିଟାଲ ବାହାରକୁ ଯିବାକୁ ପଡୁଛି
-ଚଢ଼ା ଦରରେ ରୋଗୀଙ୍କୁ ହସ୍ପିଟାଲ ବାହାରେ ବିଭିନ୍ନ ପରୀକ୍ଷା କରିବାକୁ ପଡୁଛି
-ହସ୍ପିଟାଲରେ ଆଡମିଟ୍ ହୋଇଥିବା ରୋଗୀଙ୍କୁ ଠିକ୍ ସମୟରେ ଖାଇବା ମିଳୁନି ।
ଆଉ ଏଭଳି ଅଭିଯୋଗ ଆସିବାର କିଛି ଘଣ୍ଟା ମଧ୍ୟରେ ନିଆଯାଇଥିଲା ଆକ୍ସନ । ସିଡିଏମଓଙ୍କୁ ନିଲମ୍ବନ ସହ ଜିଲ୍ଲାପାଳଙ୍କୁ କାରଣ ଦର୍ଶାଅ ନୋଟିସ ଜାରି କରାଯାଇଥିଲା ।
ସେହିଭଳି ଅଚାନକ ପୁରୀ ଗସ୍ତ କରିଛନ୍ତି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ଅତିରିକ୍ତ ସଚିବ ରୂପା ରୋଶନ ସାହୁ ଓ ଓଡିଶା ମେଡିସିନ କର୍ମପୋରେସନର ସିଏମଡି ଯାମିନୀ ଷଡଙ୍ଗୀ । ପୁରୀ ଡାକ୍ତରଖାନାରେ କେମିତି ଚାଲିଛି ସ୍ୱାସ୍ଥ୍ୟ ସେବା ତାହା ତଦାରଖ କରିବା ସହ ରୋଗୀ ଏବଂ ରୋଗୀଙ୍କ ସମ୍ପର୍କୀୟଙ୍କ ସହିତ ଆଲୋଚନା କରିଛନ୍ତି । ସେହିପରି ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟର ସ୍ୱତନ୍ତ୍ର ସଚିବ ଧିରେନ୍ଦ୍ର କୁଟେଙ୍କ ନେତୃତ୍ୱରେ ଏକ ସ୍ୱତନ୍ତ୍ର ଟିମ୍ ଢ଼େଙ୍କନାଳ ହସ୍ପିଟାଲରେ ପହଞ୍ଚି ସ୍ୱାସ୍ଥ୍ୟସେବା ସଂପର୍କରେ ପଚାରିବୁଝିଛନ୍ତି ।
ଆଉ ଏହାରି ଭିତରେ ସୁନ୍ଦରଗଡ଼ ଗସ୍ତ ପରେ ବାରିପଦାରେ ପହଞ୍ଚି ସ୍ୱାସ୍ଥ୍ୟସେବାର ସ୍ଥିତି ସଂପର୍କରେ ଅନୁଧ୍ୟାନ କରିଛନ୍ତି ୫-ଟି ସଚିବ । ଏହି ସରକାରୀ ଟିମ୍ ମେଡ଼ିକାଲ କଲେଜ ଏବଂ ଜିଲ୍ଲା ମୁଖ୍ୟଚିକିତ୍ସାଳୟ ପରିଦର୍ଶନ କରିବା ସହ ରୋଗୀଙ୍କୁ ଚିକିତ୍ସା ସେବା ସଂପର୍କରେ ପଚାରିବୁଝିଛନ୍ତି ।