ପ୍ରେମର ପ୍ରତୀକ ମହଙ୍ଗା ! ତାଜମହଲ ଦେଖିବା ପାଇଁ ଟିକେଟର ମୂଲ୍ୟ ହେଲା ୧୦୦୦ ଟଙ୍କା, ବୁଲିଯିବା ପୂର୍ବରୁ ଜାଣିନିଅନ୍ତୁ ନୂଆ ନିୟମ
ଦୁନିଆର ସପ୍ତାଶ୍ଚର୍ଯ୍ୟ ଭିତରେ ତାଜମହଲ ପୂରା ବିଶ୍ୱରେ ପରିଚିତ । ତାଜମହଲର ସୁନ୍ଦର କାରୁକାର୍ଯ୍ୟ ଦେଖିବା ପାଇଁ ଦେଶ ବିଦେଶରୁ ପର୍ଯ୍ୟଟକ ଛୁଟି ଆସନ୍ତି । କିନ୍ତୁ ଏଣିକି ପ୍ରେମର ପ୍ରତୀକ ତାଜମହଲ ବୁଲିବା ମହଙ୍ଗା ହେବାକୁ ଯାଉଛି । ଭାରତୀୟ ପ୍ରତ୍ନତତ୍ତ୍ୱ ବିଭାଗ ତାଜମହଲର ସଂରକ୍ଷଣ ପାଇଁ କିଛି ନୂଆ ପଦକ୍ଷେପ ନେବାକୁ ଯାଉଛି । ଯାହାର ସିଧାସଳଖ ପ୍ରଭାବ ପର୍ଯ୍ୟଟକଙ୍କ ପକେଟ ଉପରେ ପଡିବାକୁ ଯାଉଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରତ୍ନତତ୍ତ୍ୱ ବିଭାଗ ଆଣିବାକୁ ଥିବା ନୂଆ ନିୟମ ଅନୁଯାୟୀ ଏଣିକି ପ୍ରତିଦିନ ତାଜମହଲ ବୁଲିବା ପାଇଁ ପ୍ରତିଦିନ ୪୦ ହଜାର ପର୍ଯ୍ୟଟକଙ୍କୁ ଛଡାଯିବ ଏତଦବ୍ୟତୀତ ଏହି ମୋଗଲ ସ୍ମାରକୀ ପରିସରରେ ପର୍ଯ୍ୟଟକ ଅତି ବେଶିରେ ତିନି ଘଣ୍ଟା ସମୟସୀମା ପର୍ଯ୍ୟନ୍ତ ବୁଲିପାରିବେ । ଏନେଇ ନିଷ୍ପତି ନିଆସରିଛି । କିଛି ଅଧିକାରୀଙ୍କ କହିବା ଅନୁଯାୟୀ, ଉଭୟ ଅଫଲାଇନ ଓ ଅନଲାଇନରେ ଟିକେଟ ଉପଲବ୍ଧ ହେବ । କିନ୍ତୁ ପ୍ରତିଦିନ ୪୦,୦୦୦ ଟିକେଟ ବିକ୍ରି ହେବା ପରେ ଏହାକୁ ବନ୍ଦ କରାଯିବ । ଏହାଛଡା ଯେଉଁ ଲୋକ ତାଜମହଲର ମୁଖ୍ୟ ବେସମେଣ୍ଟ ଦେଖିବାକୁ ଚାହିଁବେ ସେମାନଙ୍କ ପାଇଁ ୧୦୦ ଟଙ୍କା ଟିକେଟ ସ୍ଥିର କରାଯାଇଥିବା ବେଳେ ଯେଉଁମାନେ ଏହାକୁ ନ ଦେଖିବେ ତାଙ୍କ ପାଇଁ ଟିକେଟର ମୂଲ୍ୟ ୫୦ ଟଙ୍କା ସ୍ଥିର କରାଯାଇଛି ।
୪୦୦୦୦ ହଜାର ପର୍ଯ୍ୟଟକଙ୍କୁ ପର୍ଯ୍ୟାୟକ୍ରମେ ତାଜମହଲ ଦେଖିବା ପାଇଁ ଭିତରକୁ ଛଡାଯିବ । ସକାଳୁ ଦ୍ୱିପ୍ରହର ୧୨ଟା ପର୍ଯ୍ୟନ୍ତ ୨୦ ହଜାର ପର୍ଯ୍ୟଟକଙ୍କୁ ଭିତରକୁ ଛଡା ଯିବାକୁ ଥିବା ବେଳେ ଦ୍ୱିତୀୟ ପର୍ଯ୍ୟାୟରେ ୧୨ ଟାରୁ ସଂଧ୍ୟା ପର୍ଯ୍ୟନ୍ତ ୨୦ ହଜାର ଲୋକ ତାଜମହଲର ସୌନ୍ଦର୍ଯ୍ୟକୁ ଉପଭୋଗ କରିପାରିବେ । ତାଜମହଲକୁ ଆସୁଥିବା ବିଦେଶୀ ପର୍ଯ୍ୟଟକଙ୍କ ପାଇଁ ଟିକେଟର ମୂଲ୍ୟ ୧୦୦୦ ଟଙ୍କା ସ୍ଥିର କରାଯାଇଛି । ତେବେ ୪୦ ହଜାର ଟିକେଟ ବୁକ୍ ହେବା ପରେ ଯେଉଁ ଭାରତୀୟ ନାଗରିକ ତାଜମହଲ ଦେଖିବା ପାଇଁ ଚାହିଁବେ ସେମାନେ ବିଦେଶୀ ପର୍ଯ୍ୟଟକଙ୍କ ଭଳି ୧୦୦୦ ଟଙ୍କା ଦେଇ ତାଜମହଲ ଦେଖିପାରିବେ । ପିକନିକ ଋତୁରେ ପ୍ରତିଦିନ ୬୦-୭୦ ହଜାର ପଯ୍ୟଟକ ତାଜମହଲ ପରିଦର୍ଶନ କରୁଥିବାରୁ ଏଭଳି ନୂଆ ନିୟମ ଆସିଛି ।