ଅନିଶ୍ଚିତ କାଳ ପାଇଁ ବନ୍ଦ ହେବାକୁ ଯାଉଛି ଶିରଡି ସାଇ ମନ୍ଦିର ! ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କ ବୟାନ ପରେ ତେଜିଲା ବିବାଦ ।
ସାଇବାବାଙ୍କ ଜନ୍ମଭୂମିକୁ ନେଇ ବିବାଦ ଏବେ ଉଗ୍ର ରୂପ ନେବାକୁ ଲାଗିଛି । ରବିବାରଠାରୁ ଶିରଡି ବନ୍ଦ କରିବା ପାଇଁ ଘୋଷଣା କରାଯାଇଛି । ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେ ପାଥରୀକୁ ସାଇବାବାଙ୍କ ଜନ୍ମଭୂମି କହିବା ପରେ ଏହି ବିବାଦ ଦେଖାଦେଇଛି । ଏହାକୁ ନେଇ ଶିରଡି ବାସୀ ଅସନ୍ତୋଷ ଥିବା ବେଳେ ବିଜେପି ସାଂସଦ ସୁରଜ୍ ବିଖେ ପାଟିଲ୍ ଏହାକୁ ନେଇ ଆଇନ୍ ର ଲଢେଇ ଲଢିବା ପାଇଁ ଚେତାବନୀ ଦେଇଛନ୍ତି । ଆପଣଙ୍କୁ କହିରଖୁଛୁ , ପରଭଣୀ ଜିଲ୍ଲାର ପାଥରୀ ଶିରଡିଠାରୁ ୨୭୫ କିଲୋମିଟର ଦୂରତାରେ ଅବସ୍ଥିତ । ଠାକରେ ଏହି ଅଞ୍ଚଳକୁ ସାଇବାବା ଜନ୍ମଭୂମି ବୋଲି କହିଥିଲେ ଏବଂ ଏହାର ବିକାଶ ପାଇଁ ୧୦୦ କୋଟି ଟଙ୍କା ଦେବାକୁ ଘୋଷଣା ମଧ୍ୟ କରିଥିଲେ । ଏମିତିରେ ସାଇବାବାଙ୍କ ଜନ୍ମସ୍ଥଳୀକୁ ନେଇ କେହି କେବେ ସ୍ପଷ୍ଟ ଭାବରେ କହିପାରିନାହାନ୍ତି । କୁହାଯାଏ , ବାବା ଶିରଡିକୁ ଆସି କିଛି ସମୟ ରହିବା ପରେ ତାଙ୍କୁ ଏହି ସ୍ଥାନ ଭଲ ଲାଗିଥିଲା ଏବଂ ସେ ଏଠାରେ ହିଁ ରହିଥିଲେ । ଏହା ପରଠାରୁ ଶିରଡିର ନାଁ ମଧ୍ୟ ସାଇବାବାଙ୍କ ନାଁ ସହ ଜଡିତ ହୋଇଗଲା ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟମନ୍ତ୍ରୀଙ୍କ ଘୋଷଣା ପରେ ଶିରଡି ନିବାସୀ ଅସନ୍ତୋଷ ବ୍ୟକ୍ତ କରିଥିଲେ । ଶିରଡି ସାଇ ଟ୍ରଷ୍ଟ୍ କାର୍ଯ୍ୟକର୍ତ୍ତା ଙ୍କ କହିବାନୁୁସାର ସେମାନଙ୍କୁ ପାଥରୀର ବିକାଶରେ କୌଣସି ଆପତ୍ତି ନାହିଁ କିନ୍ତୁ ଏହାକୁ ସାଇବାବାଙ୍କ ଜନ୍ମସ୍ଥଳୀ କହିବା ଠିକ୍ ନୁହଁ । ଏହା ପୂର୍ବରୁ ସାଇବାବାଙ୍କ ମାତାପିତାକୁ ନେଇ ଭୁଲ୍ କଥା ପ୍ରଚାର ଏବଂ ପ୍ରସାର କରାଯାଇଥିଲା । ମହାରାଷ୍ଟ୍ର ମୁଖ୍ୟମନ୍ତ୍ରୀଙ୍କ ବୟାନରେ ଲୋକଙ୍କ ମଧ୍ୟରେ ଏତେ ଆକ୍ରୋଶ ଆସିଯାଇଛି ଯେ ସେମାନେ ଶିରଡି ସାଇ ମନ୍ଦିରକୁ ବନ୍ଦ କରିବା ପାଇଁ ଡାକରା ଦେଇଛନ୍ତି । ବିବାଦକୁ ଶାନ୍ତ କରିବା ପାଇଁ ମହାରାଷ୍ଟ୍ର ବିଧାନ ପରିଷଦର ଉପସଭାପତି ଏବଂ ଶିବସେନା ନେତା ନିଲମ୍ ଗୋର୍ହେ ଗୁରୁବାର ଶିରଡି ପହଁଚି ମନ୍ଦିର ବନ୍ଦ ନ କରିବା ପାଇଁ ଅପିଲ୍ କରିଥିଲେ ।
