ଅସ୍ତରଙ୍ଗରେ କୂଳ ଲଙ୍ଘୁଛି ସମୁଦ୍ର ! ନୀଳ ଜଳରାଶିରେ ଲୀନ ହୋଇଯିବ ୧୦ଟି ଗାଁ
କନକ ବ୍ୟୁରୋ : ମାଡି ଆସୁଛି ସମୁଦ୍ର । କୂଳ ଲଙ୍ଘୁଛି ସମୁଦ୍ର । ଧୀରେ ଧୀରେ ସମୁଦ୍ର ଅଶାନ୍ତ ରୂପ ଧାରଣ କରୁଛି । ସମୁଦ୍ରର ଢେଉ ମାଡିଯିବା ଯୋଗୁଁ ଜଙ୍ଗଲ ଧ୍ୱସଂ ହେବାରେ ଲାଗିଛି । ଢ଼େଉ ମାଡରେ କୂଳରେ ଥିବା ଝାଉଁବଣ ନଷ୍ଟ ହେଉଛି । ସମୁଦ୍ରର ଅଶାନ୍ତ ରୂପ ସମୁଦ୍ର କୂଳିଆ ଲୋକଙ୍କ ମନରେ ଆଣିଛି ଛନକା । ଫଳରେ ଭୟ ଓ ଆଶଙ୍କାରେ ଦିନ କାଟୁଛନ୍ତି ୭ଟି ପଂଚାୟତର ୧୦ଟି ଗାଁରଲୋକେ । ସଁ ସଁ ଗର୍ଜନ ସାଙ୍ଗକୁ ବଡ ବଡ ଉଚ୍ଚ ଢେଉ । ସମୁଦ୍ରର ଏଭଳି କରାଳ ରୂପ ଏବେ ଅସରଙ୍ଗ ଠାରେ ଦେଖିବାକୁ ମିଳୁଛି।
Kanak News is now on WhatsApp
Join and get latest news updates delivered to you via WhatsApp
ଜନବସତି ଆଡକୁ ହୁ ହୁ ହୋଇ ମାଡି ଆସୁଛି ଅଶାନ୍ତ ସମୁଦ୍ର । ସମୁଦ୍ର କୂଳ ଲଙ୍ଘିବା ଯୋଗୁଁ ଏବେ ବିପଦରେ ପଡିଯାଇଛି ପୁରୀ ଜିଲ୍ଲା ଅସ୍ତରଙ୍ଗର ୧୦ଟି ଗାଁ । ଆଗରୁ ପ୍ରାୟ ୭ଶହ ମିଟର ଦୂରରେ ଥିବା ସମୁଦ୍ର ଏବେ ପ୍ରାୟ ୫ଶହ ମିଟର ଆଗକୁ ମାଡି ଆସିଛି । ଛୁରିଥାନା ପଂଚାୟତର ଡାଳୁଅକଣି ନିକଟରେ ଝାଉଁ ବଣ ଆଡକୁ ମାଡି ଆସୁଛି ସମୁଦ୍ର । ଜୁଆର ମାଡରେ ବାଲିଅତଡା ଖସୁଥିବାରୁ ଏବେ ଆତଙ୍କରେ ଦିନ କାଟୁଛନ୍ତି ୭ଟି ପଂଚାୟତର ୧୦ଟି ଗାଁରଲୋକେ । ଲଘୁଚାପ, ଅମାବାସ୍ୟା ଓ ପୂର୍ଣ୍ଣିମା ତିଥି ଆସିଲେ ଅସ୍ତରଙ୍ଗରେ ସମୁଦ୍ରର ଭୟଙ୍କର ରୂପ ଦେଖିବାକୁ ମିଳୁଛି ।
ଡାଳୁଅକଣି ସମୁଦ୍ର କୂଳରେ ୧୦ହେକ୍ଟର ଜାଗାରେ ନୂଆ ଜଙ୍ଗଲ ସୃଷ୍ଟି କରିଥିଲା ବନ ବିଭାଗ । ତେବେ ସେଥିରୁ ପ୍ରାୟ ୩ଶହରୁ ଅଧିକ ଝାଉଁ ଗଛ ଏବେ ସମୁଦ୍ର ଗର୍ଭରେ ଲୀନ ହୋଇସାରିଛି ।
ଅନେକ ସମୟରେ ଲୁଣି ପାଣି ମାଡି ଯିବା ଯୋଗୁୁଁ ଫସଲ ମଧ୍ୟ ନଷ୍ଟ ହେଉଛି । କେଲୁଣି ମୁହାଣରୁ ଦେବୀ ମୁହାଣ ପର୍ଯ୍ୟନ୍ତ ପାଖାପାଖି ୨୦କିଲୋମିଟର ପର୍ଯ୍ୟନ୍ତ ସମୁଦ୍ର ଏବେ ମାଡିଆସିବାରେ ଲାଗିଛି ।