ସଂଧ୍ୟା ସାଢେ ୫ଟା ସୁଦ୍ଧା ମହିଳା କର୍ମଚାରୀ ଅଫିସ ଛାଡିବା ପ୍ରସଙ୍ଗ । ନିର୍ମାଣ ସୌଧ ଅଫିସରେ ପୂର୍ତ୍ତ ବିଭାଗ ଉପସଚିବଙ୍କ ତନାଘନା
କନକ ବ୍ୟୁରୋ: ଗତ ୨୭ ତାରିଖରେ ସର୍ବୋଚ୍ଚ ଯନ୍ତ୍ରୀ ସିଭିଲ୍ କାର୍ଯ୍ୟାଳୟ ପକ୍ଷରୁ ସଂଧ୍ୟା ସାଢେ ୫ଟା ସୁଦ୍ଧା ମହିଳା କର୍ମଚାରୀ ଅଫିସ ଛାଡିବାକୁ ନିର୍ଦ୍ଦେଶ ଦିଆଯାଇଥିଲା । ଏହି ନିର୍ଦ୍ଦେଶନାମା ଜାରି ହେବା ପରେ ନିର୍ମାଣ ସୌଧରେ ଥିବା କାର୍ଯ୍ୟାଳୟକୁ ଯାଇଥିଲେ ପୂର୍ତ ବିଭାଗର ଉପସଚିବ ପାରୁଲ ପଟୁଆରି । ମହିଳା କର୍ମଚାରୀ ଓ ଅଧିକାରୀଙ୍କ ସହ ସେ ଆଲୋଚନା କରିଥିଲେ । ଏହା ପରେ ସର୍ବୋଚ୍ଚ ଯନ୍ତ୍ରୀଙ୍କୁ ଲିଖିତ ଜବାବ ତଲବ କରିଛି ପୂର୍ତବିଭାଗ । କାହିଁକି ଏପରି ଏକ ଅଫିସ ଅର୍ଡର ଜାରି କରାଗଲା, ଏନେଇ ଲିଖିତ ଭାବେ ଜବାବ ଦାଖଲ କରିବାକୁ କୁହାଯାଇଛି । ଏଥିପାଇଁ ୭ଦିନ ସମୟ ଦେଇଛି ପୂର୍ତ ବିଭାଗ ଏବଂ ଏହାକୁ ଅତି ଜରୁରୀ ଭାବେ ନେବାକୁ ଦିଆଯାଇଛି ନିର୍ଦ୍ଦେଶ ।
Kanak News is now on WhatsApp
Join and get latest news updates delivered to you via WhatsApp
ସର୍ବୋଚ୍ଚ ଯନ୍ତ୍ରୀ ଜାରି କରିଥିବା ନିର୍ଦ୍ଦେଶନାମାକୁ ନେଇ ଜୋରାଦାର ଚର୍ଚ୍ଚା ହେବା ପରେ ଏହାକୁ ଗୁରୁତ୍ୱର ସହ ନେଇଛି ପୂର୍ତ ବିଭାଗ । ଏହି ପରିପ୍ରେକ୍ଷୀରେ ବିଶାଖା ମାମଲାରେ ସୁପ୍ରିମକୋର୍ଟ ଦେଇଥିବା ଗାଇଡଲାଇନକୁ ପାଳନ କରିବା ପାଇଁ ସର୍ବୋଚ୍ଚ ଯନ୍ତ୍ରୀଙ୍କୁ ନିର୍ଦ୍ଦେଶ ଦେଇଛି ବିଭାଗ । କାର୍ଯ୍ୟସ୍ଥଳରେ ମହିଳାଙ୍କୁ ନିର୍ଯାତନା ବିରୋଧରେ ଗଠିତ ଆଭ୍ୟନ୍ତର ଅଭିଯୋଗ କମିଟିର ପ୍ରିଜାଇଣ୍ଡିଂ ଅଫିସର ରହିଥିବା ପାରୁଲ ପଟୁଆରି ଆଲୋଚନା କରିଥିବାରୁ ଏହି ପ୍ରସଙ୍ଗକୁ ନେଇ ଅଧିକ ଚର୍ଚ୍ଚା ହୋଇଛି । ମହିଳା କର୍ମଚାରୀଙ୍କ ପାଇଁ ଏଭଳି ସମୟ କଟକଣା ପଛର ପ୍ରକୃତ କାରଣ କ’ଣ ଏନେଇ ପ୍ରଶ୍ନ ଉଠିଛି ।