କନକ ବ୍ୟୁରୋ: ମାତ୍ର କେଇ ଦିନ ଭିତରେ ବିଶ୍ୱର ୩ ନମ୍ବର ଧନୀ ଗୌତମ ଆଦାନୀ ଏବେ ଧନୀ ତାଲିକାର ଟପ-୨୦ରୁ ବି ଆଉଟ୍ ହୋଇଯାଇଛନ୍ତି । ମାତ୍ର ଗୋଟିଏ ରିପୋର୍ଟ ତାଙ୍କ ସାମ୍ରାଜ୍ୟର ମୂଳଦୁଆକୁ ଦୋହଲାଇ ଦେଇଥିବାବେଳେ, ଏବେ ସେହି ରିପୋର୍ଟକୁ ନେଇ ଆରମ୍ଭ ହୋଇଛି ଚର୍ଚ୍ଚା ଆଉ ଆଲୋଚନା । ହିଣ୍ଡେନବର୍ଗର ରିପୋର୍ଟ ପ୍ରକାଶ ପାଇବା ପରେ ଗୌତମ ଆଦାନୀଙ୍କର ବଡ କ୍ଷତି ଘଟିଛି । ତେବେ ଏହି ହିଣ୍ଡେନବର୍ଗ ରିପୋର୍ଟ କଣ ଆପଣ ଜାଣିଛନ୍ତି କି?
Kanak News is now on WhatsApp
Join and get latest news updates delivered to you via WhatsApp
ଆମେରିକାର ଏକ ଫାଇନାନସିଆଲ୍ ରିସର୍ଚ୍ଚ କମ୍ପାନୀ ହେଉଛି ହିଣ୍ଡେନବର୍ଗ । ୨୦୧୭ ମସିହାରେ ନାଥନ୍ ଏଣ୍ଡରସନ୍ ନାମକ ଜଣେ ବ୍ୟକ୍ତି ଏହି କମ୍ପାନୀର ଆରମ୍ଭ କରିଥିଲେ । ଏହି କମ୍ପାନୀର ମୁଖ୍ୟ କାମ ହେଉଛି ସେୟାର ମାର୍କେଟ, ଇକ୍ୱିଟି ଏବଂ କ୍ରେଡିଟ୍ ଉପରେ ରିସର୍ଚ୍ଚ କରିବା । ଆଉ ଏହି ରିସର୍ଚ୍ଚ ଜରିଆରେ ହିଣ୍ଡେନବର୍ଗ କମ୍ପାନୀ ସେୟାର ମାର୍କେଟରେ ହେଉଥିବା ପ୍ରତିିଟି ଭୁଲ କାମକୁ ଖୋଜି ବାହାର କରିଥାଏ ଆଉ ବଡ ବଡ କମ୍ପାନୀକୁ ତଳି ତଳାନ୍ତ କରିଥାଏ । ତେବେ ଏହା ପଛରେ ହିଣ୍ଡେନବର୍ଗ କମ୍ପାନୀର ଲାଭ ମଧ୍ୟ ରହିଛି । ସର୍ଟ ସେଲିଂ ମାଧ୍ୟମରେ ଗୋଟିଏ କମ୍ପାନୀର ସେୟାରକୁ ତଳକୁ ଖସାଇ ଏହା ମାଧ୍ୟମରେ ଟଙ୍କା ରୋଜଗାର କରିଥାଏ ହିଣ୍ଡେନବର୍ଗ କମ୍ପାନୀ ।
ହିଣ୍ଡେନବର୍ଗ କମ୍ପାନୀ ଆଦାନୀ ଗ୍ରୁପ ବିଷୟରେ ବିସ୍ତୃତ ରିପୋର୍ଟ ଆଣିବା କିଛି ନୂଆ କଥା ନୁହେଁ । ଏହା ପୂର୍ବରୁ ମଧ୍ୟ ଅନେକ କମ୍ପାନୀ ବିଷୟରେ ରିପୋର୍ଟ ଆଣିସାରିଛି ହିଣ୍ଡେନବର୍ଗ । ଇଲେକ୍ଟ୍ରିକ୍ ଟ୍ରକ୍ ନିର୍ମାଣ କରୁଥଇବା କମ୍ପାନୀ ନିକୋଲାର ସେୟାର ଖୁବ ଦ୍ରୁତ ଗତିରେ ବୃଦ୍ଧି ପାଉଥିଲା । ଆଉ ଏତିକି ବେଳେ ୨୦୨୦ ମସିହାରେ ହିଣ୍ଡେନବର୍ଗ ଏକ ରିପୋର୍ଟ ଜାରି କରିଥିଲା । ଏହି ରିପୋର୍ଟ ପ୍ରକାଶ ପାଇବା ପରେ ନିକୋଲା କମ୍ପାନୀର ସେୟାର ୮୦ ପ୍ରତିଶତ କମିଯାଇଥିଲା । ତେବେ ଖାଲି ଏତିକି ନୁହେଁ, ବିଶ୍ୱର ଆହୁରି ଅନେକ ନାମୀଦାମୀ କମ୍ପାନୀର ହେରଫେରକୁ ମଧ୍ୟ ବାହାର କରିସାରିଛି ହିଣ୍ଡେନବର୍ଗ କମ୍ପାନୀ ।
ସୂଚନାଯୋଗ୍ୟ ଯେ, ଲଗାତାର ଭାବେ ଖସିବାରେ ଲାଗିଛି ଆଦାମୀ ଗ୍ରୁପ୍ କମ୍ପାନୀ ଗୁଡିକର ସେୟାର ମୂଲ୍ୟ । ୨୪ ଜାନୁଆରୀରୁ ହିଣ୍ଡେନବର୍ଗ ରିପୋର୍ଟ ସାମ୍ନାକୁ ଆସିବା ପରେ ବର୍ତ୍ତମାନ ସୁଦ୍ଧା ପାଖାପାଖି ୧୦ ଲକ୍ଷ କୋଟି ଟଙ୍କାର ଘାଟା ଆଦାନୀ ଗ୍ରୁପକୁ ହୋଇ ସାରିଲାଣି । ଏଭଳି ସ୍ଥିତିରେ ଗତକାଲି ସାମ୍ନାକୁ ଆସି ବୟାନ ରଖିଥିଲେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ । ସାମ୍ବାଦିକ ସମ୍ମିଳନୀ ଜରିଆରେ ସେ କହିଛନ୍ତି ଆଦାନୀ ଗ୍ରୁପ୍ ଠକେଇ ସହ ଭାରତର ଆର୍ଥିକ ସ୍ଥିତିର କୌଣସି ସମ୍ପର୍କ ନାହିଁ । ଭାରତର ଅର୍ଥନୀତି ଏଥିରେ ଆଦୌ ପ୍ରଭାବିତ ହୋଇନାହିଁ । ବରଂ ଗତ ଦୁଇ ଦିନ ଭିତରେ ଭାରତର ବିଦେଶୀ ମୁଦ୍ରା ଭଣ୍ଡାର ୮ ମିଲିଅନ୍ ଡଲାର ବା ୬୫ କୋଟି ୭୮ ଲକ୍ଷ ୬୮ ହଜାର ଟଙ୍କା ବୃଦ୍ଧି ପାଇଛି ବୋଲି ଅର୍ଥମନ୍ତ୍ରୀ ପ୍ରତିକ୍ରିୟା ରଖିଥିଲେ ।
ଜାଣିରଖିବା ଉଚିତ୍ ଯେ, ଜାନୁୟାରୀ ୨୪ରେ ହିଡେନବର୍ଗର ରିପୋର୍ଟରେ ଅଦାନୀ ଗ୍ରୁପ ଠକେଇ କରିଥିବା ଅଭିଯୋଗ ପ୍ରକାଶିତ ହୋଇଥିଲା । ତୁରନ୍ତ ଅଭିଯୋଗକୁ ଅମୂଳକ ଓ ଭିତ୍ତିହୀନ କହି ଖଣ୍ଡନ କରିଥିଲା ଆଦାନୀ ଗ୍ରୁପ । କିନ୍ତୁ ନିବେଶକ ଆଦାନୀ ଗ୍ରୁପର ସଫେଇ ବଦଳରେ ହିଡେନବର୍ଗର ରିପୋର୍ଟରେ ପ୍ରଭାବିତ ହୋଇଥିଲେ । ଯାହାର ପ୍ରଭାବ ସେୟାର ମାର୍କେଟରେ ଦେଖିବାକୁ ମିଳିଥିଲା ।