ଧର୍ମେନ୍ଦ୍ରଙ୍କ ‘ନେତୃତ୍ୱ’ ବୟାନ ବଢାଇଲା ଉତ୍କଣ୍ଠା । ଅପରାଜିତାଙ୍କୁ ନେଇ ଚାଲିଛି କି ଭିତିରି ଅଙ୍କକଷା
ଉଠିଲା ପ୍ରଶ୍ନ, ଅପରାଜିତା ହେବେ କି ଓଡିଶାର ବିଜେପି ଚେହେରା?
କନକ ବ୍ୟୁରୋ: କିଏ ହେବ ଓଡ଼ିଶା ବିଜେପିର ଚେହେରା ? କାହା ନେତୃତ୍ୱରେ ବିଜେପି ଲଢ଼ିବ ୨୦୧୯ ନିର୍ବାଚନ? ଏହି ସବୁ ପ୍ରଶ୍ନର ଉତର, ଜଟିଳ ହୋଇଯାଉଛି ଯେତେବେଳେ ବିଜେପିର ବରିଷ୍ଠ ନେତାମାନେ ବିଭିନ୍ନ ସମୟରେ ଭିନ୍ନ ଭିନ୍ନ ବୟାନ ଦେଉଛନ୍ତି । କେତେବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଅପରାଜିତାଙ୍କୁ ନେତୃତ୍ୱ ନେବା ପାଇଁ ଆହ୍ୱାନ ଦେଉଛନ୍ତି, ତ ଆଉ କେତେବେଳେ ସାମୂହିକ ନେତୃତ୍ୱରେ ଲଢ଼ିବା କଥା କହୁଛନ୍ତି । ଏପଟେ ଜୁଏଲ ଓରାମ, ଧର୍ମେନ୍ଦ୍ରଙ୍କୁ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ ବୋଲି କହି ସାରିଛନ୍ତି । ଏସବୁ ଭିତରେ ଅପରାଜିତାଙ୍କ ଉର୍ଦ୍ଦେଶ୍ୟରେ ଧର୍ମେନ୍ଦ୍ର ରଖିଥିବା ବୟାନ ନୂଆ ଚର୍ଚ୍ଚା ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
୨୦୧୯ ନିର୍ବାଚନରେ ଓଡ଼ିଶା ବିଜେପିର ଚେହେରା କିଏ ହେବ, ତାକୁ ନେଇ ଚର୍ଚ୍ଚା ହେଉଥିବା ବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଏହି ମନ୍ତବ୍ୟ ହୁଏତ ବେଶ ଗୁରୁତ୍ୱ ରଖୁଛି । କାରଣ ତୃଳମୂଳସ୍ତରରେ ସଂଗଠନକୁ ମଜବୁତ କରିବାରେ ଓଡ଼ିଶା ବିଜେପିର ଉଦ୍ୟମ ଏବଂ ଏଥିରେ ଧର୍ମେନ୍ଦ୍ରଙ୍କ ଭୂମିକାକୁ ବେଶ ଗୁରୁତ୍ୱ ଦିଆଯାଏ । ଏତିକି ବେଳେ ଏହି ବୟାନ କି ବାର୍ତା ଦେଉଛି ?
ଦୀର୍ଘ ବର୍ଷର ପ୍ରଶାସନିକ ଅଭିଜ୍ଞତା ନେଇ ଅପରାଜିତା ଯେତେବେଳେ ବିଜେପିରେ ସାମିଲ ହୋଇଥିଲେ, ତାଙ୍କୁ ସ୍ୱାଗତ କରିବା ପାଇଁ ରାଜ୍ୟ କାର୍ଯ୍ୟଳୟରେ ଆୟୋଜିତ ହୋଇଥିଲା ଏକ ଭବ୍ୟ ସମ୍ବର୍ଦ୍ଧନା । ଆଉ ଏହି ଅବସରରେ ଅପରାଜିତାଙ୍କୁ ଓଡ଼ିଶାର ବୋହୂ କରିବା ସହ ରାଜ୍ୟ ପାଇଁ ଗୌରବ କହିଥିଲେ ଧର୍ମେନ୍ଦ୍ର । ଆଉ ନେତୃତ୍ୱ ନେବାକୁ ଆହ୍ୱାନ ଦେଇଥିଲେ ।
ଅବଶ୍ୟ ଏହି ବୟାନର ଠିକ୍ ଗୋଟିଏ ଦିନ ପରେ ଧର୍ମେନ୍ଦ୍ରଙ୍କ ମୁହଁରୁ ଶୁଣିବାକୁ ମିଳିଥିଲା ଆଉ ଏକ ଭିନ୍ନ କଥା । ଧର୍ମେନ୍ଦ୍ର କହିଲେ, ବିଜେପି ସାମୂହିକ ନେତୃତ୍ୱରେ ନିର୍ବାଚନ ଲଢ଼ିବ । କେନ୍ଦ୍ରମନ୍ତ୍ରୀ ଜୁଏଲ ଓରାମ ଯେତେବେଳେ ଧର୍ମେନ୍ଦ୍ରଙ୍କୁ ବିଜେପିର ମୁଖ୍ୟମନ୍ତ୍ରୀ ପ୍ରାର୍ଥୀ କହିଥିଲେ, ଧର୍ମେନ୍ଦ୍ର ଉଠାଇଥିଲେ ସାମୂହିକ ନେତୃତ୍ୱର କଥା ।
ଅପରାଜିତା ଷଡଙ୍ଗୀ ବିଜେପିରେ ଯୋଗ ଦେବା ପୂର୍ବରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଓଡ଼ିଶା ବିଜେପିର ସବୁଠୁ ବଡ ଚେହେରା ବୋଲି ଚର୍ଚ୍ଚା ହେଉଥିଲା । ଏବେ ଧର୍ମେନ୍ଦ୍ର ଖୋଦ୍ ଅପରାଜିତାଙ୍କୁ ନେତୃତ୍ୱ ନେବା ପାଇଁ ଆହ୍ୱାନ ଦେବା ଏବଂ ପରବର୍ତୀ ସମୟରେ ସାମୂହିକ ନେତୃତ୍ୱର କଥା କହିବା, ପୁରା ସମୀକରଣକୁ ଓଲଟପାଲଟ କରିଦେଇଛି । ପ୍ରକୃତରେ ୨୦୧୯ ନିର୍ବାଚନରେ କିଏ ହେବ ରାଜ୍ୟ ବିଜେପିର ଚେହେରା?