କିଏ ଲୁଚାଇଥିଲା ଅର୍ଚ୍ଚନାଙ୍କ ଏଣ୍ଡେଭର କାର: ଗତ ୧ ମାସର ସିସିଟିଭି ଫୁଟେଜ ଯାଞ୍ଚ କରିବ ଇଡି
କନକ ବ୍ୟୁରୋ: ଲେଡି ବ୍ଲକମେଲର ଅର୍ଚନା ନାଗଙ୍କ ସମ୍ପର୍କରେ ଦିନକୁ ଦିନ ପ୍ରବର୍ତନ ନିର୍ଦ୍ଦେଶାଳୟକୁ ଗୁରୁତ୍ୱପୂର୍ଣ୍ଣ ତଥ୍ୟ ମିଳିବାରେ ଲାଗିଛି । ଅର୍ଚ୍ଚନାଙ୍କ ଯେଉଁ ଏଣ୍ଡେଭର କାରକୁ ଇଡି ଅଧିକାରୀ ଖୋଜୁଥିଲେ, ସେହି କାରକୁ ଜବତ କରାଯାଇଛି । ଚର୍ଚ୍ଚାରେ ଥିବା ଅର୍ଚ୍ଚନାଙ୍କ ୩୩ ଲକ୍ଷ ଟଙ୍କାର ଏଣ୍ଡେଭର କାରକୁ ମଂଚେଶ୍ୱର ଶିଳ୍ପାଂଚଳରୁ ଠାବ କରିଛି ଇଡି । ପ୍ରଥମେ କାରକୁ ନେବା ପାଇଁ ଟୋଇଂ କାର ଡକାଯାଇଥିଲା । ହେଲେ କାର ପାର୍କିଂ ମୋଡରେ ଥିବାରୁ ନେବା ସମ୍ଭବପର ହୋଇନଥିଲା । ଅତ୍ୟାଧୁନିକ ଜ୍ଞାନକୌଶଳରେ ନିର୍ମିତ ଗାଡିର ଡୋର ଖୋଲିପାରିନଥିଲା । ପରେ କାରକୁ ନେବା ପାଇଁ ବିଶେଷଜ୍ଞ ଦଳକୁ ଡକାଇଥିଲେ ଇଡି ଅଧିକାରୀ । କିଛି ସମୟ ପରେ ଏକ ମାଷ୍ଟର କି ଜରିଆରେ କାରର ଡୋର ଖୋଲାଯାଇଥିଲା । ଇଡି ଅଧିକାରୀ ଗାଡିର ଚେସିସ ଓ ଇଂଜିନ ନଂବର ଯାଂଚ କରିଥିଲେ । ଏହାପରେ ସେହି ନମ୍ବରକୁ ହ୍ୱାଟସଆପରେ ପଠାଇ ପୁଷ୍ଟି କରିଥିଲେ ଗାଡି କାହା ନାଁରେ ରହିଛି । ସେପଟୁ ମେସେଜ ଆସିବା ପରେ ପରିତ୍ୟକ୍ତ ଅବସ୍ଥାରେ ପଡିଥିବା ଏଣ୍ଡେଭର ଗାଡିଟି ଅର୍ଚ୍ଚନାଙ୍କର ବୋଲି ସ୍ପଷ୍ଟ କରିଥିଲେ ଇଡି ଅଧିକାରୀ । ଏଣ୍ଡେଭର କାରକୁ ଯାଂଚ କରିବା ପରେ ଇଡି ଅଧିକାରୀ କାରକୁ ଚଲାଇ ଇଡି କାର୍ଯ୍ୟାଳୟକୁ ନେଇଛନ୍ତି । ମାଷ୍ଟର କି ଏକ୍ସପର୍ଟ ଟିମ ଦେଲେ, ନା ଅର୍ଚ୍ଚନାଙ୍କ ଘରୁ ଚାବି ଖୋଜା ହୋଇ ଆସିଲା, ତାହା ଜଣାପଡି ନାହିଁ । ଆଗକୁ କାର ସୋରୁମ ମାଲିକକୁ ଡାକି ପୁଣି ଥରେ ପଚରା ଉଚରା କରିପାରନ୍ତି ଇଡି ଅଧିକାରୀ । ଏହାଛଡା ଗାଡି ସେଠାରେ କିଏ ନେଇ ରଖିଥିଲା ସେ ନେଇ ବି ଛାନଭିନ କରିବ ଇିଡି । ସ୍ଥାନୀୟ ଅଂଚଳର ସିସିଟିଭିକୁ ବି ଯାଂଚ କରାଯିବ । ଆଗକୁ ଇଡି ବଳିଷ୍ଠ ପ୍ରମାଣ ଯୋଗାଡ କରି ଅର୍ଚ୍ଚନାଙ୍କ କଳା ସାମ୍ରାଜ୍ୟର ଗୁମର ଖୋଲିବ ବୋଲି ଚର୍ଚ୍ଚା ହେଉଛି ।
Kanak News is now on WhatsApp
Join and get latest news updates delivered to you via WhatsApp
ମଂଚେଶ୍ୱର ଶିଳ୍ପାଂଚଳରେ ଏକ ଏଣ୍ଡେଭର କାର ପରିତ୍ୟକ୍ତ ଅବସ୍ଥାରେ ପଡିଥିବା ଖବର ପ୍ରଥମେ ଦେଖାଇଥିଲା କନକ ନ୍ୟୁଜ ଟିମ୍ । ମଂଚେଶ୍ୱର ରୟାଲ କଲେଜ ନିକଟରେ ପରିତ୍ୟକ୍ତ ଅବସ୍ଥାରେ ଏଣ୍ଡେଭର କାର ଥିବା ଖବର ପାଇ କନକ ନ୍ୟୁଜ ଟିମ ଘଟଣାସ୍ଥଳରୁ ସିଧା ପ୍ରସାରଣ କରିଥିଲା । ସ୍ଥାନୀୟ ଲୋକଙ୍କ କହିବା କଥା ଶୁକ୍ରବାରଠାରୁ ଏଣ୍ଡେଭରଟି ସେଠାରେ ଛିଡ଼ା ହୋଇଥିଲା । କେହି ଜଣେ ବ୍ୟକ୍ତି ଅନ୍ଧାରରେ କାରକୁ ପାର୍କ କରି ପଲାଇଥିଲେ । ନିଛାଟିଆ ସ୍ଥାନରେ କାରଟି କାହିଁକି କିଏ ଛାଡି ଦେଇଛି, ଗାଡିର ନଂବର ନଥିବାରୁ ଲୋକଙ୍କ ସନ୍ଦେହ ବଢିଥିଲା । ଅନ୍ୟପଟେ ବ୍ଲାକମେଲିଂ କୁଇନ ଅର୍ଚ୍ଚନା ନାଗଙ୍କ ଏଣ୍ଡେଭର କାରକୁ ଇଡି ଖୋଜୁଥିବା ନେଇ ଦୁଇ ଦିନ ହେଲା ଗଣମାଧ୍ୟମରେ ଖବର ପ୍ରକାଶ ପାଉଛି । ତେଣୁ ଲୋକଙ୍କ ସନ୍ଦେହ ସ୍ୱାଭାବିକ ଭାବେ ଅର୍ଚ୍ଚନା କାର ଆଡକୁ ଯାଇଥିଲା । ଆଉ ଲୋକଙ୍କ ଠାରୁ ଖବର ପାଇଁ କନକ ନ୍ୟୁଜ ପହଂଚି ଖବର ପ୍ରସାରଣ କରିବାର କିଛି ସମୟ ପରେ ସେଠାରେ ପହଂଚିଥିଲେ ଇଡି ଅଧିକାରୀ । ଆଉ ଯାଂଚ ପରେ କାରଟି ଅର୍ଚ୍ଚନା ନାଗଙ୍କର ବୋଲି ଜଣାପଡିଥିଲା ।