କେବେ ଗଡ଼ିବ ଓଡ଼ିଶାରେ ପାସେଞ୍ଜର ଟ୍ରେନ୍ । ଇଷ୍ଟକୋଷ୍ଟ ରେଲୱେ କହିଲା, ପରିସ୍ଥିତିରେ ସୁଧାର ଆସିଲେ ଏପ୍ରିଲରୁ ଚାଲିପାରେ ଟ୍ରେନ୍ ।
କନକ ବ୍ୟୁରୋ: କୋଭିଡ କଟକଣା ଯୋଗୁଁ ବନ୍ଦ ରହିଥିବା ପାସେଞ୍ଜର ଟ୍ରେନ ଲୋକଙ୍କ ଚିନ୍ତା ବଢାଇଦେଇଛି । ପାସେଞ୍ଜର ଟ୍ରେନ ନଚାଲିବା କାରଣରୁ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ପାସେଞ୍ଜର ଟ୍ରେନ ଚାଲିବା ନେଇ କେନ୍ଦ୍ର ସରକାରଙ୍କ ସହିତ ରାଜ୍ୟ ସରକାର ଆଲୋଚନା କରିଥିଲେ ମଧ୍ୟ ସମାଧାନର ବାଟ ବାହାରିପାରିନାହିଁ । ଏପଟେ ଇଷ୍ଟକୋଷ୍ଟ ରେଳବାଇ ପକ୍ଷରୁ କୁହାଯାଇଛି, କୋଭିଡ ପରିସ୍ଥିତିରେ ସୁଧାର ଆସିଲେ ଏପ୍ରିଲ ମାସରୁ ସ୍ୱାଭାବିକ ହୋଇପାରେ ଟ୍ରେନ ଚଳାଚଳ । ରାଜ୍ୟ ସରକାର ଏବଂ ରେଳବାଇ ବୋର୍ଡ ଏ ସଂକ୍ରାନ୍ତୀୟ ନିଷ୍ପତି ନେବେ ।
Kanak News is now on WhatsApp
Join and get latest news updates delivered to you via WhatsApp
କୋଭିଡ କଟକଣା ହଟିବା ପରେ ଟ୍ରେନ ଚଳାଚଳ ସ୍ୱାଭାବିକ ହୋଇଛି ସତ କିନ୍ତୁ ରାଜ୍ୟରେ ସମସ୍ତ ପାସେଞ୍ଜର ଟ୍ରେନ ନଗଡିବା ଦୈନନ୍ଦିନ ଯାତ୍ରୀଙ୍କ ପାଇଁ ସମସ୍ୟା ସୃଷ୍ଟି କରିଛି । ମିଳିଥିବା ସୂଚନା ଅନୁସାରେ ଏବେ ରାଜ୍ୟରେ ସମ୍ବଲପୁର-ଝାରସୁଗୁଡା, ପୁରୀ-ଅନୁଗୁଳ-ତାଳଚେର, ଗୁଣପୁର-ରାଉରକେଲା ପାସେଞ୍ଜର ଟ୍ରେନ କୋଭିଡ କଟକଣା ଲାଗୁ ହେବା ପରଠାରୁ ବନ୍ଦ ରହିଛି । ଏହିଭଳି ରାଜ୍ୟରେ ଚାଲୁଥିବା ଅନେକ ପାସେଞ୍ଜର ଟ୍ରେନ ଚଳାଚଳ ପ୍ରାୟ ବର୍ଷେ ହେବ ବନ୍ଦ ରହିଛି । ସେହିପରି ବନ୍ଦ ରହିଥିବା ଏକ୍ସପ୍ରେସ ଟ୍ରେନ ମଧ୍ୟରେ ରହିଛି, ହୀରାକୁଦ ଏକ୍ସପ୍ରେସ, ତପସ୍ୱିନୀ ଏକ୍ସପ୍ରେସ, ଇସ୍ପାତ ଏକ୍ସପ୍ରେସ, ସମଲେଶ୍ୱରୀ ଏକ୍ସପ୍ରେସ ଏବଂ ଇଂଟରସିଟି ଏକ୍ସପ୍ରେସ । ଏଥିସହ ମେମୁ ଓ ଡିଏମୟୁ ଟ୍ରେନ ଚଳାଚଳ ମଧ୍ୟ ବନ୍ଦ ରହିଛି । ଏହି ଟ୍ରେନଗୁଡିକ ବନ୍ଦ ରହିବା କାରଣରୁ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି ।
ଗୋଟିଏ ପଟେ ପେଟ୍ରୋଲ ଓ ଡିଜେଲର ଅହେତୁକ ଦର ବୃଦ୍ଧି କାରଣରୁ ବସରେ ଯିବା ପାଇଁ ଯାତ୍ରୀଙ୍କ ପକେଟକୁ ବାଧୁଛି । ଏପରି ସ୍ଥିତିରେ ସାଧାରଣଲୋକଙ୍କ ଜୀବନ ରେଖା କୁହାଯାଉଥିବା ପାସେଞ୍ଜର ଟ୍ରେନ ବନ୍ଦ ହେବା ଯାତାୟାତରେ ବାଧା ସୃଷ୍ଟି କରିଛି । ପୁଣି ତତକାଳ ଟ୍ରେନରେ ଅଧିକ ଭଡା କାରଣରୁ ମଧ୍ୟ ଯାତ୍ରୀ ଯିବାକୁ ଠିକ ମଣୁନାହାନ୍ତି ।
ପାସେଞ୍ଜର ଟ୍ରେନ ଗଡିବା ନେଇ କେନ୍ଦ୍ର ସରକାରଙ୍କୁ ବାରମ୍ବାର ରାଜ୍ୟ ସରକାର ଜଣାଇଥିଲେ ମଧ୍ୟ ସମନ୍ୱୟ ଅଭାବରୁ ଏହା କାର୍ଯ୍ୟକାରୀ ହୋଇପାରିନାହିଁ । ଅନ୍ୟପଟେ ଇଷ୍ଟକୋଷ୍ଟ ରେଳବାଇ ପକ୍ଷରୁ କୁହାଯାଇଛି, କୋଭିଡ ପରିସ୍ଥିତିରେ ସୁଧାର ଆସିଲେ ଏପ୍ରିଲ ମାସରୁ ସ୍ୱାଭାବିକ ହୋଇପାରେ ଟ୍ରେନ ଚଳାଚଳ । ରାଜ୍ୟ ସରକାର ଏବଂ ରେଳବାଇ ବୋର୍ଡ ଏ ସଂକ୍ରାନ୍ତୀୟ ନିଷ୍ପତି ନେବେ । ପଡୋଶୀ ରାଜ୍ୟ ଛତିଶଗଡ, ପଶ୍ଚିମବଙ୍ଗ ଏବଂ ଝାଡଖଣ୍ଡରେ କିଛି କିଛି ପାସେଞ୍ଜର ଟ୍ରେନ ଗଡୁଥିବା ବେଳେ କୋଭିଡ ଲେଉଟାଣିକୁ ଦୃଷ୍ଟିରେ ରଖି ରାଜ୍ୟ ସରକାର ପାସେଞ୍ଜର ଟ୍ରେନ ଗଡିବା ନେଇ କୌଣସି ନିର୍ଣ୍ଣାୟକ ନିଷ୍ପତି ନେଇପାରୁନାହାନ୍ତି ।