ଶ୍ରୀଲଙ୍କାରେ ଆହୁରି ଗମ୍ଭୀର ହେଲା ଆର୍ଥିକ ସଂକଟ : ବିଦେଶୀ ଋଣ ସୁଝିବାକୁ ଅସମର୍ଥ ରାଜପାକ୍ସେ ସରକାର; ବିପଦ ବେଳର ବନ୍ଧୁ ଭାବେ ସହାୟତା କରୁଛି ଭାରତ
କନକ ବ୍ୟୁରୋ : ଶ୍ରୀଲଙ୍କାରେ ଆର୍ଥିକ ସଂକଟ ଆହୁରି ଗମ୍ଭୀର ହେବାରେ ଲାଗିଛି । ଫଳରେ ବିଦେଶୀ ରୁଣ ଶୁଝିବାକୁ ଅସାମର୍ଥ୍ୟ ପ୍ରକାଶ କରିଛି କଲମ୍ବୋ । ଶ୍ରୀଲଙ୍କା ଇତିହାସରେ ଏହା ପ୍ରଥମ ଘଟଣା । ଦେଶର ରୁଣଭାର ଏତେ ବଢି ଯାଇଛି ଯେ, ଇଏମଆଇ ଶୁଝି ପାରୁନାହିଁ । ଯାହାର ଅର୍ଥ ଗୋଟିଏ ଦେଶ ଦେବାଳିଆ ହୋଇଯାଇଛି । କାରଣ ଶ୍ରୀଲଙ୍କା ପାଖରେ ଅଛି ମୋଟ୍ ୫୦ କୋଟି ଡଲାର । ଅନ୍ତର୍ଜାତୀୟ ବଜାରରେ ମୁଖ୍ୟତଃ ଡଲାରରେ କାରବାର ହୋଇଥାଏ ।
Kanak News is now on WhatsApp
Join and get latest news updates delivered to you via WhatsApp
ତେଣୁ ବିଦେଶରୁ ଅଧିକ ଆମଦାନୀ କରୁଥିବା ଏକ ଦେଶ ପାଖରେ ମାତ୍ର ୫୦ କୋଟି ଡଲାର ମହଜୁଦ ରହିବା ଅତି ସାଂଘାତିକ ସ୍ଥିତି । ଆଗାମୀ ସପ୍ତାହରେ ଅନ୍ତର୍ଜାତୀୟ ମୁଦ୍ରା ପାଣ୍ଠିରୁ ଆର୍ଥିକ ସହାୟତା ପାଇଁ ଆବେଦନ କରିବ ଶ୍ରୀଲଙ୍କା । ହେଲେ ଏହା ପୂର୍ବରୁ ରାଜପାକ୍ସେ ପରିବାର କ୍ଷମତାଚ୍ୟୁତ ହେବାର ଯଥେଷ୍ଟ ସମ୍ଭାବନା ରହିଛି । କାରଣ ବିରୋଧୀ ଦଳଗୁଡିକ ରାଜପାକ୍ସେ ପରିବାରକୁ ସରକାରରୁ ହଟାଇବା ପାଇଁ ଅନାସ୍ଥା ପ୍ରସ୍ତାବ ଆଣିବାକୁ ଯାଉଛନ୍ତି । ଏହି କ୍ରମରେ ୩ଟି ପ୍ରସ୍ତାବ ଉପରେ କାମ କରୁଛନ୍ତି ବିରୋଧୀ ଦଳ । ପ୍ରଥମେ ରାଷ୍ଟ୍ରପତି ଗୋଟବାୟା ରାଜପାକ୍ସେଙ୍କ ବିରୋଧରେ ଅନାସ୍ଥା ପ୍ରସ୍ତାବ ଆଣିବେ ବିରୋଧୀ ।
ଦ୍ୱିତୀୟରେ ଶ୍ରୀଲଙ୍କା ସରକାରଙ୍କ ବିରୋଧରେ ସଂସଦରେ ଅନାସ୍ଥା ପ୍ରସ୍ତାବ ଅଣାଯିବ । ଫଳରେ ପ୍ରଧାନମନ୍ତ୍ରୀ ମହିନ୍ଦ୍ରା ରାଜପାକ୍ସେ ଓ ତାଙ୍କ ସରକାରଙ୍କୁ କ୍ଷମତାଚ୍ୟୁତ କରାଯିବ । ଏବଂ ଶେଷରେ ସମ୍ବିଧାନ ସଂଶୋଧନ ପ୍ରସ୍ତାବ ରହିଛି । ଶ୍ରୀଲଙ୍କା ସମ୍ବିଧାନର ଅନୁଚ୍ଛେଦ ୨୦ରେ ଶ୍ରୀଲଙ୍କା ରାଷ୍ଟ୍ରପତିଙ୍କୁ ଅଧିକ କ୍ଷମତା ପ୍ରଦାନ କରାଯାଇଛି । ଏହା ସରକାରକୁ ଦୁର୍ବଳ କରୁଥିବାରୁ ଏହି ଅନୁଚ୍ଛେଦକୁ ଉଠାଇ ଦେବାପାଇଁ ବିରୋଧୀ ରଣନୀତି ପ୍ରସ୍ତୁତ କରୁଛନ୍ତି । ସରକାରଙ୍କ କ୍ଷମତାଚ୍ୟୁତ କରିବା ପାଇଁ ବିରୋଧୀଙ୍କୁ ସାଧାରଣ ନାଗରିକଙ୍କ ସମର୍ଥନ ମଧ୍ୟ ରହିଛି ।
ଶ୍ରୀଲଙ୍କାରେ ଆର୍ଥିକ ସଂକଟ ଗମ୍ଭୀର ହେଉଥିବାବେଳେ ବିପଦର ବନ୍ଧୁ ଭାବେ ଆଗକୁ ଆସିଛି ଭାରତ । ପଡୋଷୀକୁ ନିୟମିତ ସହୟତା ଯୋଗାଇ ଆସୁଛି ନୂଆଦିଲ୍ଲୀ ।
– ଗତ ୩ ମାସ ମଧ୍ୟରେ ପ୍ରାୟ ୨୫୦ କୋଟି ଡଲାରର ସହାୟତା ପଠାଇଛି ଭାରତ
– ମାର୍ଚ୍ଚ ମଧ୍ୟଭାଗରୁ ୨ ଲକ୍ଷ ୭୦ ହଜାର ମେଟ୍ରିକ ଟନ୍ ପେଟ୍ରୋଲ ଓ ଡିଜେଲ ପଠାଇଛି
– ଆଗୁଆ ରୁଣ ଆକାରରେ ପ୍ରାୟ ୪୦ ହଜାର ଟନ୍ ଚାଉଳ ପଠାଇଛନ୍ତି ମୋଦୀ ସରକାର
– ସିଂହଳି ଓ ତାମିଲ ନୂଆବର୍ଷ ଅବସରରେ ୧୧ ହଜାର ମେଟ୍ରିକ ଟନ ଚାଉଳ ପଠାଯାଇଥିଲା
– ଫେବ୍ରୁଆରୀରେ ମଧ୍ୟ ପେଟ୍ରୋଲ ଓ ଡିଜେଲ କିଣିବାକୁ ୫୦ ହଜାର କୋଟି ଡଲାର ରୁଣ ଦେଇଥିଲା ଭାରତ
– ୨୦୨୧ ନଭେମ୍ବରରେ ୧୦୦ ଟନ୍ ନାଇଟ୍ରୋଜେନ ଲିକୁଇଡ ଫର୍ଟିଲାଇଜର ପଠାଇଥିଲା
– ଶ୍ରୀଲଙ୍କାବାସୀଙ୍କ ସହୟତା ପାଇଁ ଏପ୍ରିଲ ୧୦ରେ ପରିବା ଓ ଅନ୍ୟାନ୍ୟ ରାସନ ସାମଗ୍ରୀ ପଠାଇଥିଲା ଭାରତ
– ବଳକା ଥିବା ଚିନି, ଗହମ ଓ ଚାଉଳ ମଧ୍ୟ ଜାହାଜରେ ଭର୍ତ୍ତି କରି ପଠାଇଥିଲା ଭାରତ