ପଶ୍ଚିମବଙ୍ଗରେ ଖୁବଶୀଘ୍ର ଲଂଚ୍ ହେବାକୁ ଯାଉଛି ‘ଷ୍ଟୁଡେଣ୍ଟ କ୍ରେଡିଟ କାର୍ଡ’ । ଉଚ୍ଚଶିକ୍ଷା ପାଇଁ ତୁରନ୍ତ ମିଳିବ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ
କନକ ବ୍ୟୁରୋ : ପଶ୍ଚିମବଙ୍ଗ କ୍ୟାବିନେଟ୍ ଗୁରୁବାର ଦିନ ଷ୍ଟୁଡେଣ୍ଟ କ୍ରେଡିଟ୍ କାର୍ଡ ଯୋଜନାକୁ ମଞ୍ଜୁରୀ ପ୍ରଦାନ କରିଛନ୍ତି । ଏହି କାର୍ଡ ସହାୟତାରେ ଛାତ୍ର ଛାତ୍ରୀମାନଙ୍କୁ ଉଚ୍ଚଶିକ୍ଷା ପାଇଁ ୧୦ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ମିଳିପାରିବ ।
Kanak News is now on WhatsApp
Join and get latest news updates delivered to you via WhatsApp
ଏନେଇ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ କହିଛନ୍ତି କି, ନିର୍ବାଚନ ବେଳେ ଛାତ୍ର ଛାତ୍ରୀ ମାନଙ୍କୁ ଦିଆଯାଇଥିବା ପ୍ରତିଶୃତି ପୂରଣ କରାଯାଇଛି । ଏହି ଷ୍ଟୁଡେଣ୍ଟ କ୍ରେଡିଟ କାର୍ଡ ମାଧ୍ୟମରେ ପଶ୍ଚିମବଙ୍ଗରେ ୧୦ ବର୍ଷ ଧରି ବସ ବାସ କରୁଥିବା କୌଣସି ବି ଛାତ୍ର ଛାତ୍ରୀ ଏହାର ଲାଭ ଉଠାଇ ପାରିବେ । ଭାରତ କିମ୍ବା ବିଦେଶରେ ଗ୍ରାଜୁଏସନ, ପୋଷ୍ଟ-ଗ୍ରାଜୁଏସନ,ଡକ୍ଟରେଟ୍ ଓ ଅନ୍ୟ ଉଚ୍ଚ ଶିକ୍ଷା ପାଇଁ ଏହି କ୍ରେଡିଟ କାର୍ଡ ମାଧ୍ୟମରେ ଛାତ୍ର ଛାତ୍ରୀମାନେ ଋଣ ନେଇ ପାରିବେ । ଜୁନ ୩୦ ତାରିଖରୁ ରାଜ୍ୟରେ ଏହି ଯୋଜନା ଲାଗୁ ହେବ ବୋଲି ମମତା କହିଛନ୍ତି ।
ମୁଖ୍ୟମନ୍ତ୍ରୀ ଆହୁରି କହିଛନ୍ତି କି, ୪୦ ବର୍ଷ ବୟସ ପର୍ଯ୍ୟନ୍ତ ଛାତ୍ର ଛାତ୍ରୀ ମାନେ ଏହି କାର୍ଡର ବ୍ୟବହାର କରିପାରିବେ । ଏବେ କୌଣସି ପିଲାକୁ ପାଠ ପଢାଇବାକୁ ଅବିଭାବକ ମାନଙ୍କୁ କାହା ପାଖରେ ହାତ ପାତିବା ବା ଘର ବାଡି ବିକ୍ରି କରିବାକୁ ପଡିବ ନାହିଁ । ଅନ୍ୟପଟେ ଏହି ଋଣ ପରିଶୋଧ କରିବାକୁ ପୁରା ୧୫ ବର୍ଷ ସମୟ ଦିଆଯିବ ବୋଲି ମମତା କହିଛନ୍ତି । ଏହାସହ ଏହି କାର୍ଡ ପାଇବାକୁ ଛାତ୍ର ଛାତ୍ରୀ ମାନେ ଅନଲାଇନ ମାଧ୍ୟମରେ ଆବେଦନ କରିପାରିବେ ।