ନିର୍ବାଚନ ପୂର୍ବରୁ ମମତାଙ୍କ ଟେମ୍ପୁଲ ରନ୍ : ହିନ୍ଦୁ ଭୋଟ୍ ବ୍ୟାଙ୍କ ହାତେଇବାକୁ ଉଦ୍ୟମ; ମନ୍ଦିରରେ ପୂଜାର୍ଚ୍ଚନା ସହ କରୁଛନ୍ତି ଚଣ୍ଡୀପାଠ
କନକ ବ୍ୟୁରୋ : ସେପଟେ ପଶ୍ଚିମବଙ୍ଗରେ ଜୋରଦାର ହୋଇଛି ହିନ୍ଦୁ ରାଜନୀତି । ନିର୍ବାଚନ ପୂର୍ବରୁ ରାଜନେତାଙ୍କ ଟେମ୍ପୁଲ ରନ୍ ଆରମ୍ଭ ହୋଇଯାଇଛି । ଅନ୍ୟାନ୍ୟ ରାଜ୍ୟ ବିଧାନସଭା ନିର୍ବାଚନ ପୂର୍ବରୁ ଯେମିତି ବିଜେପି ବିରୋଧୀ ନେତାଙ୍କ ମନ୍ଦିର ଗସ୍ତ ଚାଲେ, ଠିକ ସେମିତି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ଜୋରଦାର ମନ୍ଦିର ଗସ୍ତ କରୁଥିବା ଦେଖିବାକୁ ମିଳୁଛି । ଘରେ ଜଗନ୍ନାଥଙ୍କ ପୂଜା କରିବାଠୁ ଆରମ୍ଭ କରି ଶିବ ମନ୍ଦିରରେ ଜଳାଭିଶେକ କରିବା ଭଳି ମମତାଙ୍କ ସବୁ କାର୍ଯ୍ୟକ୍ରମରୁ ପ୍ରତିପକ୍ଷ ଭିନ୍ନ ଭାଷାରେ ଚତ୍ରଣ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସବୁବେଳେ ମୁସଲିମ ତୁଷ୍ଟିକରଣ ରାଜନୀତି କରୁଥିବା ମମତା ଅଚାନକ ହିନ୍ଦୁ ଭୋଟ ବ୍ୟାଙ୍କ ହାତେଇବା ପାଇଁ ନିଜକୁ ହିନ୍ଦୁଙ୍କ ହିତାକାଂକ୍ଷୀ ବୋଲି ଦର୍ଶାଇବାକୁ ଚେଷ୍ଟା କରୁଥିବା ଅଭିଯୋଗ ବାଢିଛନ୍ତି । ମନ୍ଦିରରେ ଘଂଟା ଘଂଟା ପୂଜାର୍ଚ୍ଚନା କରି କେବଳ ନିଜ ନିର୍ବାଚନ କ୍ଷେତ୍ର ନୁହେଁ ବରଂ ସାରା ରାଜ୍ୟରେ ହିନ୍ଦୁ ଭୋଟ ଧ୍ରୁବୀକରଣର ପ୍ରୟାସ କରୁଥିବା ଆଶଙ୍କା କରୁଛି ମୁଖ୍ୟ ବିରୋଧୀ ବିଜେପି । ନିର୍ବାଚନ ରଣନୀତିକାରଙ୍କ ଅନୁମାନ ଯେ, ମୁସଲମାନ ଭୋଟ ଟିଏମସି ଖାତାକୁ ଯିବ । ହେଲେ ହିନ୍ଦୁ ମାନଙ୍କ ଏକ ବଡ ଭୋଟବ୍ୟାଙ୍କ କାଳେ ବିଜେପି ଆଡକୁ ଚାଲିଯିବ ସେହି ଭୟରେ ମମତା ହିନ୍ଦୁ ରାଜନୀତିକୁ ଜୋରଦାର କରିଦେଇଛନ୍ତି ।
କିଛିଦିନ ତଳେ ଏକ ନିର୍ବାଚନୀ ସଭାରେ ଚଣ୍ଡିପାଠ ଆରମ୍ଭ କରିଦେଇଥିଲେ ମୁଖ୍ୟମନ୍ତ୍ରୀ ମମତା ବାନାର୍ଜୀ । ଜୟ ଶ୍ରୀରାମ ନାରା ଶୁଣି ବିଜେପି ଉପରେ ଚିଡି ଯାଉଥିବା ମମତାଙ୍କ ଏଭଳି କାୟାକଳ୍ପ ପରିବର୍ତନ ପଛରେ ରହିଛି ବାଧ୍ୟବାଧ୍ୟତା । କାରଣ ହିନ୍ଦୁ ମାନଙ୍କ ଭୋଟ ହାତରୁ ଖସିଯିବା ଆଶଙ୍କାରେ ଏହିଭଳି ରଣନୀତି ଆପଣାଇଛନ୍ତି ମମତା ବାନାର୍ଜୀ । ବିଶେଷ କରି ନନ୍ଦିଗ୍ରାମରେ ମମତାଙ୍କ ବିରୋଧରେ ବିଜେପି ତାଙ୍କର ପୁରୁଣା ସହଯୋଗୀ ଶୁଭେନ୍ଦୁ ଅଧିକାରୀଙ୍କୁ ଉତାରିଛି । ସେ ମଧ୍ୟ ହନୁମାନ ମନ୍ଦିରରେ ପୂଜାର୍ଚ୍ଚନା କରି ହିନ୍ଦୁ କାର୍ଡ ଖେଳୁଥିବା ଚର୍ଚ୍ଚା ହେଉଛି । ସେପଟେ ଭବାନୀପୁରରେ ମମତାଙ୍କ ବିଜୟ ବ୍ୟବଧାନ ପ୍ରାୟ ୨୫ ହଜାରକୁ ଖସିଆସିଥିବାରୁ ଏଥର ନିଜର ଲଢେଇ ନନ୍ଦିଗ୍ରାମକୁ ନେଇ ଆସିଛନ୍ତି ମମତା । କାଳେ ବିଜେପି ଏଠାରେ ବାଜି ମାରିନେବ ସେହି ଆଶଙ୍କାରେ ମମତା କୌଣସି ମୌକା ହାତଛଡା କରୁନାହାନ୍ତି ।