ବିଦ୍ରୋହୀ ବିଧାୟକଙ୍କୁ ସଞ୍ଜୟଙ୍କ ଚେତାବନୀ । ବିଦ୍ରୋହୀଙ୍କ ସମୟ ଶେଷ , ଆମ ପାଖରେ ବହୁମତ ଅଛି । ବିଜୟ ଆମର ସୁନିଶ୍ଚିତ ।
କନକ ବ୍ୟୁରୋ : ମହାରାଷ୍ଟ୍ର ରାଜନୀତିରେ ମହାନାଟକ । ପୁଣିଥରେ ବିଦ୍ରୋହୀ ବିଧାୟକଙ୍କ ପାଇଁ କଡା ବାର୍ତ୍ତା ରଖିଲେ ଶିବସେନା ନେତା ସଞ୍ଜୟ ରାଉତ । ଏନସିପି ମୁଖ୍ୟ ଶରଦ ପାୱାରଙ୍କୁ ଭେଟିବା ପରେ ସଞ୍ଜୟ କହିଛନ୍ତି, ବହୁତ ସମୟ ଦେଲୁ ଆଉ ନୁହେଁ । ଉଦ୍ଧବ ଠାକରେ ହିଁ ମୁଖ୍ୟମନ୍ତ୍ରୀ ରହିବେ, ଫ୍ଲୋର ଟେଷ୍ଟରେ ଆମେ ହିଁ ବିଜୟୀ ହେବୁ । ବିଦ୍ରୋହୀ ବିଧାୟକ ବହୁତ ଭୁଲ ନିଷ୍ପତ୍ତି ନେଇଛନ୍ତି । ଆମ ପାଖରେ ବହୁମତ ଅଛି, ଆମେ ହିଁ ବିଜୟୀ ହେବୁ । ଆମେ ଯାହା କରିବା କଥା କରି ସାରିଛୁ । ପୂର୍ବରୁ ଶରଦ ପାୱାର ବିଧାନସଭାର ବାଚସ୍ପତି ରହି ସାରିଛନ୍ତି, ତେଣୁ ଆଇନର ଲଢେଇରେ ଆମର ବିଜୟ ସୁନିଶ୍ଚିତ । କିଛି ଏଭଳି ଦମ୍ଭୋକ୍ତି ଦେଇ କହିଛନ୍ତି ସଞ୍ଜୟ । ଆଉ ଏହାପରେ ମହାରାଷ୍ଟ୍ର ରାଜନୀତି ଆହୁରି ରୋଚକ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଏହାପୂର୍ବରୁ ଜାତୀୟ ଗଣମାଧ୍ୟମକୁ ଦେଇଥିବା ପ୍ରତିକ୍ରିୟାରେ ଏକନାଥ କହିଥିଲେ ବିଧାୟକଙ୍କୁ ଅଯୋଗ୍ୟ ଘୋଷିତ କରିପାରିବେନି ଉଦ୍ଧବ, କାରଣ ସରକାର ଏବେ ଅଳ୍ପମତରେ ରହିଛି । ଏବେ ମୋ ସହ ୩୭ ଶିବସେନା ବିଧାୟକଙ୍କୁ ମିଶାଇ ୫୦ ବିଧାୟକଙ୍କ ସମର୍ଥନ ରହିଛି । ଆଉ ଲୋକତନ୍ତ୍ରରେ ସଂଖ୍ୟାବଳ ସବୁଠୁ ଜରୁରୀ । ଆମକୁ ଏବେ ଡରାଇବାକୁ ପ୍ରୟାସ ଚାଲିଛି । କିନ୍ତୁ ଆମେ ଡରିବାର ପ୍ରଶ୍ନ ଉଠୁନାହିଁ କାରଣ ଆଇନ ଆମ ସପକ୍ଷରେ ଅଛି । ଶିବସେନା ଯେତେ ନୋଟିସ ପଠାଇଲେ ମଧ୍ୟ ଆମେ ଡରିବୁନି ।
ଏହାଛଡା ସିନ୍ଦେ କହିଛନ୍ତି ଖୁବଶୀଘ୍ର ମହାରାଷ୍ଟ୍ରର ରାଜ୍ୟପାଳଙ୍କୁ ଭେଟିବି । କିନ୍ତୁ ଏନେଇ କୌଣସି ତାରିଖ ସ୍ଥିର ହୋଇନାହିଁ । ଏସବୁ ଭିତରେ ମହାରାଷ୍ଟ୍ର ବିଧାନସଭା ଉପବାଚସ୍ପତିଙ୍କୁ ଚିଠି ଲେଖିଛନ୍ତି ବିଦ୍ରୋହୀ ବିଧାୟକଙ୍କ ନେତା ଏକନାଥ ସିନ୍ଦେ । ୩୭ ଜଣ ଶିବସେନା ବିଧାୟକଙ୍କ ଦସ୍ତଖତ ଥିବା ଚିଠିକୁ ରାଜ୍ୟପାଳ ଭଗତ ସିଂ କୋସିୱାରି ଓ ଲେଜିସଲେଟିଭ୍ କାଉନସିଲ ସଚିବ ରାଜେନ୍ଦ୍ର ଭଗୱତଙ୍କ ମଧ୍ୟ ଲେଖିଛନ୍ତି । ଚିଠିରେ ସିନ୍ଦେ ଦାବି କରିଛନ୍ତି ଯେ, ତାଙ୍କୁ ପୁଣି ଥରେ ଶିବସେନା ବିଧାୟକ ଦଳ ନେତା ଭାବେ ଅବସ୍ଥାପିତ କରାଯାଉ । ଏହାସହ ଭରତସେଟ ଗୋଗାୱଲେଙ୍କୁ ଦଳର ମୁଖ୍ୟ ସଚେତକ ଭାବେ ନିଯୁକ୍ତ ଚିହ୍ନଟ କରାଯାଉ । ବିଦ୍ରୋହୀ ବିଧାୟକମାନେ ଏକନାଥ ସିନ୍ଦେଙ୍କୁ ସେମାନଙ୍କ ନେତା ଘୋଷଣା କରିଛନ୍ତି । ଏହାସହ ସିନ୍ଦେ ଗୋଷ୍ଠୀଙ୍କ ସଂଖ୍ୟା ବଢ଼ିବାରେ ଲାଗିଛି । ଏହି ବିଦ୍ରୋହୀ ଗୋଷ୍ଠୀରେ ନୂଆ ନୂଆ ନେତା ଯୋଗଦେବାରେ ଲାଗିଛନ୍ତି । ମହାରାଷ୍ଟ୍ରର ଆଉ ୨ ଜଣ ସ୍ୱାଧୀନ ବିଧାୟକ ଆସାମର ଗୌହାଟୀରେ ପହଂଚିଛନ୍ତି । ଏହାପୂର୍ବରୁ ଦୁଇ ଜଣ ଶିବସେନା ବିଧାୟକ ମଧ୍ୟ ସିନ୍ଦେଙ୍କ କ୍ୟାମ୍ପରେ ଯୋଗଦେଇଥିଲେ ।