ହାରିଗଲା ଚେନ୍ନାଇ କିନ୍ତୁ ମନ ଜିଣିଲେ ୱାଟସନ୍ । ରକ୍ତ ଜୁଡୁବୁଡୁ ଅବସ୍ଥାରେ ଚେନ୍ନାଇର ବିଜୟ ପାଇଁ କରୁଥିଲେ ସଂଘର୍ଷ ।
କନକ ବ୍ୟୁରୋ : ଆଇପିଏଲ ୨୦୧୯ରେ ଚେନ୍ନାଇକୁ ଚିତ୍ କରି ଚତୁର୍ଥ ଥର ପାଇଁ ଆଇପିଏଲର ତାଜ ପିନ୍ଧିଲା ମୁମ୍ବାଇ ଇଣ୍ଡିଆନ୍ସ । ରୋମାଞ୍ଚକର ମ୍ୟାଚରେ ଚେନ୍ନାଇ ହାରିଗଲା ସତ, କିନ୍ତୁ କୋଟି କୋଟି କ୍ରୀଡାପ୍ରେମୀଙ୍କ ମନ ଜିଣିଛନ୍ତି ଅଷ୍ଟ୍ରେଲୀୟ ବ୍ୟାଟ୍ସମ୍ୟାନ ସେନ୍ ୱାଟସନ୍ । ସୁପରସଣ୍ଡେର ଫାଇନାଲ ଫାଇଟରେ ଏପରି କିଛି ଦୃଶ୍ୟ ଦେଖିବାକୁ ମିଳିଥିଲା, ଯାହା କୋଟି କୋଟି କ୍ରିକେଟ୍ ପ୍ରେମୀଙ୍କୁ ଭାବବିହ୍ୱଳ କରିଦେଇଛି ।
Kanak News is now on WhatsApp
Join and get latest news updates delivered to you via WhatsApp
ମ୍ୟାଚର ଦ୍ୱିତୀୟ ଇନିଂସରେ ୧୫୦ ରନର ଟାର୍ଗେଟକୁ ନେଇ ଯେତେବେଳେ ଚେନ୍ନାଇ ବ୍ୟାଟିଂ କରୁଥିଲା, ସେତେବେଳେ ଜଣଙ୍କ ପରେ ଜଣେ ବ୍ୟାଟ୍ସମ୍ୟାନ ଆଉଟ୍ ହୋଇ ପ୍ୟାଭିଲିୟନ୍ ଫେରିଯାଉଥିଲେ । ଆଉ ଅନ୍ୟପଟେ ଦଳର ବିଜୟ ପାଇଁ ଏକାକୀ ସଂଘର୍ଷ କରୁଥାନ୍ତି ସେନ୍ ୱାଟସନ୍ । ତେବେ ଖେଳର ମଧ୍ୟଭାଗରେ କ୍ୟାମେରାରେ ଏପରି କିଛି ଦୃଶ୍ୟ ଦେଖିବାକୁ ମିଳିଥିଲା, ଯାହା ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଥିଲା । ୱାଟସନ୍ ବ୍ୟାଟିଂ କରୁଥିବା ସମୟରେ ତାଙ୍କ ଆଣ୍ଠୁରୁ ରକ୍ତ ବାହାରୁଥିବାର ଦେଖିବାକୁ ମିଳିଥିଲା । ତେବେ କାହାରିକୁ କିଛି ନକହି ଚେନ୍ନାଇର ବିଜୟ ପାଇଁ ରକ୍ତ ଜୁଡୁବୁଡୁ ଅବସ୍ଥାରେ ବ୍ୟାଟିଂ ଜାରି ରଖିଥିଲେ ଏହି ପୂର୍ବତନ ଅଷ୍ଟ୍ରେଲୀୟ ତାରକା ।
ଦଳକୁ ସିନା ବିଜୟ ଦେଇପାରିଲେନି କିନ୍ତୁ କୋଟି କୋଟି କ୍ରୀଡା ପ୍ରେମୀଙ୍କ ମନ ଜିଣିନେଲେ ୱାଟସନ୍ । ତେବେ ୱାଟସନଙ୍କ ଆହତ ନେଇ ନିଜ ଇଷ୍ଟାଗ୍ରାମ ପେଜରେ ସୂଚନା ଦେଇଥିଲେ ହରଭଜନ ସିଂହ । ସେ ଲେଖିଥିଲେ, ଆଣ୍ଠୁରୁ ରକ୍ତ ବାହାରୁଥିଲେ ମଧ୍ୟ, ୱାଟସନ୍ ଦଳର କୌଣସି ଖେଳାଳୀଙ୍କୁ ଏବାବଦରେ ଜଣାଇନଥିଲେ । ସେ ଆହତ ହୋଇଥିବା ନେଇ ସେତେବେଳେ ଜଣାପଡିଲା, ଯେତେବେଳେ ସେ ରନ୍ ଆଉଟ୍ ହୋଇ ପ୍ୟାଭିଲିୟନ୍ ଫେରିଆସିଥିଲେ । ତାଙ୍କ ଗୋଡରୁ ବହୁତ ରକ୍ତ ବାହାରିଥିଲା ଏବଂ ଆହତ ସ୍ଥାନରେ ୬ଟି ଷ୍ଟିଚ୍ ପଡିଛି ବୋଲି ମଧ୍ୟ ହରଭଜନ ସିଂହ ନିଜ ଇଷ୍ଟାଗ୍ରାମ ପେଜର ଲେଖିଛନ୍ତି ।
ଫାଇନାଲ ଫାଇଟରେ ଚେନ୍ନାଇ ପାଇଁ ଏକାକୀ ସଂଘର୍ଷ କରି ୮୦ ରନର ଏକ ଦମଦାର ପାଳି ଖେଳିଥିଲେ ସେନ୍ ୱାଟସନ୍ । ଦଳକୁ ବିଜୟଦ୍ୱାରକୁ ନେଇଯାଇଥିଲେ ସତ, କିନ୍ତୁ ବିଜୟ ଦେଇପାରିନଥିଲେ । ଶେଷ ଓଭରରେ ୱାଟସନଙ୍କୁ ଆଉଟ୍ କରି ଖେଳକୁ ନିଜ ଆଡକୁ କରିନେଇଥିଲା ମୁମ୍ବାଇ ଇଣ୍ଡିଆନ୍ସ । ଶେଷରେ ଚେନ୍ନାଇକୁ ମାତ୍ର ୧ ରନରେ ହରାଇ ଚତୁର୍ଥ ଥର ଆଇପିଏଲ ବିଜେତା ବନିଥିଲା ମୁମ୍ବାଇ ।