କନକ ବ୍ୟୁରୋ : ଏଥର ଖଣ୍ଡଗିରିରେ ହୋଇପାରିବନି ଅଶ୍ଳୀଳ ନାଚ । କଟକଣା ଲଗାଇଲା ବିଏମସି । ପୋଲିସ ବି ଯାତ୍ରା ଆୟୋଜକ କମିଟିକୁ କରାଇଲେ ସତର୍କ । ଅଶ୍ଳୀଳ ନୃତ୍ୟ ପରିବେଶଣ କଲେ ଯାତ୍ରା ବନ୍ଦ କରିଦେବାକୁ ଚେତାବନୀ ଦେଇଛି ପ୍ରଶାସନ । ଯାତ୍ରା ପାର୍ଟିମାନେ ଯେମିତି ବାହାରୁ ନୃତ୍ୟ ଶିଳ୍ପୀ ଆଣି ଯାତ୍ରା ପରିବେଷଣ ନକରିବେ, ନିଜ କଳାକାରଙ୍କୁ ନେଇ ଯାତ୍ରା ପରିବେଶଣ କରିବେ ତାହା ନିଶ୍ଚିତ କରିବାକୁ କୁହାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏଥିସହ ଯାତ୍ରା ପାର୍ଟି ମାନେ ମଞ୍ଚରେ ଯେମିତି କୌଣସି ଅଶ୍ଳୀଳ ନୃତ୍ୟ ପରିବେଶଣ ନକରିବେ, ତାହା ନିଶ୍ଚିତ କରିବାକୁ କୁହାଯାଇଛି । ବିଶେଷକରି ଅଶ୍ଳୀଳ ନୃତ୍ୟ କରି ଚର୍ଚ୍ଚାରେ ଥିବା ରାଣୀ ପଣ୍ଡାଙ୍କ ନୃତ୍ୟ ଉପରେ ସ୍ୱତନ୍ତ୍ର ନଜର ଦେବାକୁ କୁହାଯାଇଛି । ରାଣୀ ପଣ୍ଡା କେବଳ ପୂରା ପୋଷାକରେ ନୃତ୍ୟ ପରିବେଶଣ କରିବାକୁ ଅନୁମତି ଦିଆଯାଇଛି । ଏହାଦ୍ୱାରା ସାଧାରଣ ଲୋକ ପରିବାର ସହ ଯାତ୍ରା ଦେଖିବାକୁ ଆସିବେ ବୋଲି କୁହାଯାଉଛି । ପ୍ରଶାସନର ଏପରି ନିର୍ଦ୍ଦେଶକୁ ସ୍ୱାଗତ ଜଣାଇଛନ୍ତି ବହୁ କଳାକାର । କରୋନା ଯୋଗୁଁ ଦୁଇ ବର୍ଷର କଟକଣା ପରେ ଏଥର ପୁଣି ଥରେ କମ୍ପିବ ଖଣ୍ଡଗିରି ଯାତ୍ରା ପଡିଆ ।
ମଇଦାନରେ ଏଥରକ ୧୧ ଅପେରା ଯାତ୍ରା ପେଣ୍ଡାଲକୁ ଓହ୍ଲାଇବେ । ଯାତ୍ରା ପରିବେଶଣ ପାଇଁ ଚଳିତ ବର୍ଷ ୬ଟି ଯାତ୍ରା କମିଟିକୁ ଆବଶ୍ୟକ ଅନୁମତି ମିଳିଥିବା ଜଣାଯାଇଛି । ହାତରେ ସପ୍ତାହକରୁ କମ୍ ସମୟ ଥିବାରୁ କମିଟି ଓ ଅପେରା ଦଳ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଯାଇଛି । ତେବେ ମାଘ ମେଳାରେ କେମିତି ହେବ ଯାତ୍ରା, ଯାତ୍ରାରେ ଅଶ୍ଳିଳ ନାଚ ହେବ କି ନାହିଁ, ସେ ନେଇ ଚର୍ଚ୍ଚା ଭିତରେ ସାମନାକୁ ଆସିଛି ପ୍ରଶାସନର ଏହି ନିର୍ଦ୍ଦେଶ ।