“ପ୍ରଧାନମନ୍ତ୍ରୀଙ୍କୁ ହତ୍ୟା ପାଇଁ କରାଯାଇଥିଲା ସାଂଘାତିକ ଷଡଯନ୍ତ୍ର” ସଙ୍ଗୀନ ଅଭିଯୋଗ ଆଣିଲେ ଆସାମ ମୁଖ୍ୟମନ୍ତ୍ରୀ । କହିଲେ…
କନକ ବ୍ୟୁରୋ : ପଞ୍ଜାବରେ ପ୍ରଧାନମନ୍ତ୍ରୀଙ୍କ ସୁରକ୍ଷା ତ୍ରୁଟିକୁ ନେଇ ବିଜେପି-କଂଗ୍ରେସ ମଧ୍ୟରେ ବୟାନବାଜୀ ଯୁଦ୍ଧ ଶେଷ ହେବାର ନାଁ ନେଉନାହିଁ । ପଞ୍ଜାବର ଚନ୍ନି ସରକାର ପ୍ରଧାନମନ୍ତ୍ରୀଙ୍କ ସୁରକ୍ଷାରେ ତ୍ରୁଟି ନଥିବା କହି ଆସୁଥିବା ବେଳେ ବିଜେପି ନେତା କିଛି ନଛୋଡବନ୍ଧା । ଲଗାତାର ଏହି ପ୍ରସଙ୍ଗରେ ଉଭୟ ଚନ୍ନି ସରକାର ଓ କଂଗ୍ରେସକୁ ଟାର୍ଗେଟ କରି ଆସୁଛି ବିଜେପି । ଆଉ ଏବେ ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ସାଂଘାତିକ ଅଭିଯୋଗ ଆଣିଛନ୍ତି । ସାମ୍ବାଦିକ ସମ୍ମିଳନୀ କରି ହିମନ୍ତ କହିଛନ୍ତି ଯେ, ପ୍ରଧାନମନ୍ତ୍ରୀଙ୍କୁ ହତ୍ୟା କରିବାକୁ ସାଂଘାତିକ ଷଡଯନ୍ତ୍ର କରାଯାଇଥିଲା । ଉଭୟ ଚନ୍ନି ସରକାର ଓ କଂଗ୍ରେସ ଏନେଇ ସୁପରିକଳ୍ପିତ ଷଡଯନ୍ତ୍ର କରିଥିଲେ । ଷ୍ଟିଙ୍ଗ୍ ଅପରସେନ ପରେ ଏହି ସନ୍ଦେହ ଆହୁରି ସ୍ପଷ୍ଟ ହୋଇଥିବା କହିଛନ୍ତି ହିମନ୍ତ ।
Kanak News is now on WhatsApp
Join and get latest news updates delivered to you via WhatsApp
ଆସାମର ମୁଖ୍ୟମନ୍ତ୍ରୀ କହିଛନ୍ତି, ଏକ ଟେଲିଭିଜନ ଚ୍ୟାନେଲ ଦ୍ୱାରା କରାଯାଇଥିବା ଷ୍ଟିଙ୍ଗ୍ ଅପରେସନରୁ ସ୍ପଷ୍ଟ ହୋଇଛି ଯେ, ପ୍ରଧାନମନ୍ତ୍ରୀଙ୍କ କାରକେଡ ଯେଉଁ ଅଞ୍ଚଳରେ ଅଟକି ରହିଥିଲା ସେଠାରେ ପ୍ରଦର୍ଶନ ହେବ ବୋଲି ପୂର୍ବରୁ ପୋଲିସକୁ ସୂଚନା ମିଳିଥିଲା । ଏନେଇ ଉପରିସ୍ଥ ଅଧିକାରୀ ମଧ୍ୟ ଜାଣିଥିଲେ । ଏହାସତ୍ତେ୍ୱ ମଧ୍ୟ ସୁରକ୍ଷା ବ୍ୟବସ୍ଥାକୁ କଡାକଡି କରାଗଲା ନାହିଁ । ଏହାଛଡା ଆନ୍ଦୋଳନରେ ଚାଷୀ ନୁହେଁ ବରଂ ଖଲିସ୍ତାନୀ ସମର୍ଥକ ବସିଥିଲେ । ଏହାବାଦ୍ ପ୍ରଧାନମନ୍ତ୍ରୀଙ୍କ କାରକେଡ ଅଟକିଥିବା ସ୍ଥାନ ଠାରୁ ମାତ୍ର ୧୦ କିଲୋମିଟର ଦୂରରେ ପାକିସ୍ତାନ ସୀମା ରହିଥିଲା । ଆଉ ଏହି ଅଞ୍ଚଳରେ ବେଶ ସହଜରେ ଶତ୍ରୁ ଦେଶର ଡ୍ରୋନ, ସ୍ନାଇପର, ମିସାଇଲ ରେଞ୍ଜରେ ଆସିପାରୁଥିଲା । ଏଭଳି ସମ୍ବେଦନଶୀଳ ସ୍ଥାନରେ ପ୍ରଧାନମନ୍ତ୍ରୀଙ୍କ ସୁରକ୍ଷା ବ୍ୟବସ୍ଥାକୁ କିଭଳି କଡାକଡି କରାଗଲା ନାହିଁ ବୋଲି ପ୍ରଶ୍ନ କରିଛନ୍ତି ହିମନ୍ତ ।
ସବୁଠୁ ବଡ କଥା ହେଉଛି, ପ୍ରଧାନମନ୍ତ୍ରୀ କାରକେଡ ଅଟକିବା ଘଟଣା କଂଗ୍ରେସର ହାଇକମାଣ୍ଡଙ୍କ ସହ ଆଲୋଚନା କରିଥିଲେ ପଞ୍ଜାବ ମୁଖ୍ୟମନ୍ତ୍ରୀ । କିଭଳି ଦଳୀୟ ଫୋରମରେ ଏହା ଆଲୋଚନା କରାଗଲା ତାହାକୁ ନେଇ ହିମନ୍ତ ପ୍ରଶ୍ନ କରିଛନ୍ତି । ପ୍ରଧାନମନ୍ତ୍ରୀଙ୍କ ଗସ୍ତ ଦିନ ପଞ୍ଜାବ ମୁଖ୍ୟମନ୍ତ୍ରୀ, ମୁଖ୍ୟ ଶାସନ ସଚିବ ମଧ୍ୟ ସ୍ୱାଗତ କରିବାକୁ ବିମାନବନ୍ଦରରେ ପହଞ୍ଚିନଥିଲେ । କୋଭିଡ ସଂକ୍ରମିତଙ୍କ ସଂସ୍ପର୍ଶରେ ଆସିଥିବାରୁ ଦୂରେଇ ରହିଥିବା କହିଥିଲେ କିନ୍ତୁ ଏହି ଘଟଣାର ପରଦିନ କିଭଳି ଚନ୍ନି ପ୍ରେସମିଟ୍ କରି ସଫେଇ ରଖିଲେ ବୋଲି ପ୍ରଶ୍ନବାଣ ମାରିଛନ୍ତି । ଚନ୍ନି ସରକାରଙ୍କ କାର୍ଯ୍ୟକଳାପ ଓ କଂଗ୍ରେସ ନେତାଙ୍କ ବୟାନବାଜି ହିଁ ଦର୍ଶାଉଛି ଯେ, ପ୍ରଧାନମନ୍ତ୍ରୀଙ୍କୁ ହତ୍ୟା କରିବାକୁ ବଡ ଧରଣର ପ୍ରାୟୋଜିତ ଷଡଯନ୍ତ୍ର ହୋଇଥିଲା । ଗତ ୫ ତାରିଖରେ ପଞ୍ଜାବରେ ଏକ ସଭାରେ ଯୋଗଦେବାକୁ ଯାଉଥିବା ବେଳେ ଫିରୋଜପୁର ଓଭରବ୍ରିଜ ଉପରେ ପ୍ରଧାନମନ୍ତ୍ରୀଙ୍କ କାରକେଡ ପ୍ରାୟ ୧୫ରୁ ୨୦ ମିନିଟ୍ ଫଶି ରହିଥିଲା । ଚାଷୀ ପ୍ରଦର୍ଶନ କରୁଥିବା କାରଣରୁ ପ୍ରଧାନମନ୍ତ୍ରୀଙ୍କ କାରକେଡକୁ ଅଟକାଯାଇଥିଲା । ଆଉ ଏହାପରେ ସଭାସ୍ଥଳକୁ ନ ଯାଇ ବିମାନବନ୍ଦର ଫେରି ଆସିଥିଲେ ପ୍ରଧାନମନ୍ତ୍ରୀ । ଏହି ଘଟଣାକୁ ନେଇ ଏବେ ବିଜେପି-କଂଗ୍ରେସ ମଧ୍ୟରେ ଜୋରଦାର ବୟାନବାଜି ଯୁଦ୍ଧ ଆରମ୍ଭ ହୋଇଛି ।