କନକ ବ୍ୟୁରୋ : ବୈଶ୍ୱିକ ବ୍ୟବସ୍ଥାକୁ ସମ୍ମାନ ଦିଅ ନଚେତ ଭୟାବହ ବିଶ୍ୱର ସମ୍ମୁଖୀନ ହେବ ବୋଲି ଗୁରୁବାର ଦିନ ଯୁକ୍ତରାଷ୍ଟ୍ର ଆମେରିକା ଚୀନକୁ ଚେତାବନୀ ଦେଇଛି।
Kanak News is now on WhatsApp
Join and get latest news updates delivered to you via WhatsApp
ସିନଜିଆଙ୍ଗ୍, ହଂକଂ ଏବଂ ତାଇଓ୍ଵାନ୍ ଅଞ୍ଚଳରେ ଚୀନ୍ ଚଳାଇଥିବା କାର୍ଯ୍ୟକଳାପ ଏବଂ ଯୁକ୍ତରାଷ୍ଟ୍ର ଆମେରିକା ଉପରେ ସାଇବର୍ ଆକ୍ରମଣ ତଥା ତା’ର ମିତ୍ରରାଷ୍ଟ୍ରମାନଙ୍କ ଉପରେ ଆର୍ଥିକ ଚାପ ସୃଷ୍ଟି କରିବା ଆନ୍ତର୍ଜାତିକ ସମ୍ପର୍କକୁ ବିଗାଡୁଛି ବୋଲି ଗୁରୁବାର ଦିନ ଯୁକ୍ତରାଷ୍ଟ୍ର ଆମେରିକାର ବୈଦେଶିକ ସଚିବ ଆଣ୍ଟୋନି ବ୍ଲିଙ୍କେନ୍ ଚୀନର ବରିଷ୍ଠ ସରକାରୀ ଅଧିକାରୀମାନଙ୍କ ସହ ଆଲୋଚନା କଲା ବେଳେ ଏ କଥା କହିଛନ୍ତି।
ଅଲାସ୍କାରେ ଆୟୋଜିତ ଆନ୍ତର୍ଜାତିକ ସମ୍ପର୍କ ସମ୍ବନ୍ଧୀୟ ଏହି ପ୍ରଥମ ଗୁରୁତ୍ୱପୂର୍ଣ୍ଣ ବୈଠକରେ ଆମେରିକାର ବୈଦେଶିକ ସଚିବ ବ୍ଲିଙ୍କେନ୍ ଓ ନିରାପତ୍ତା ଉପଦେଷ୍ଟା ଜେକ୍ ସଲିଭିଆନ୍ ସେମାନଙ୍କର ଚୀନ ପ୍ରତିପକ୍ଷ ଓ୍ଵାଙ୍ଗ୍ ୟି ଏବଂ ୟାଙ୍ଗ୍ ଜିଏଚି ଯୋଗ ଦେଇଥିଲେ। ବ୍ଲିଙ୍କେନ୍ କହିଲେ ଯେ, ବୈଶ୍ୱିକ ସ୍ଥିରତା ବଜାୟ ରଖୁଥିବା ନୀତିନିୟମକୁ ସୁରକ୍ଷା ଦେବା ଯୁକ୍ତରାଷ୍ଟ୍ର ଆମେରିକାର ଉଦ୍ଦେଶ୍ୟ। ଏହି ନୀତିନିୟମ ନ ରହିଲେ ବିଶ୍ୱ ଖୁବ୍ ଭୟାବହ ହୋଇଯିବ।
ବେଜିଙ୍ଗ୍ ବିପକ୍ଷରେ ଟ୍ରମ୍ପ୍ ପ୍ରଶାସନ ଗ୍ରହଣ କରିଥିବା କଠୋର କଟକଣା କୋହଳ କରାଯିବ ନାହିଁ ବୋଲି ଉକ୍ତ ବୈଠକରେ ସ୍ପଷ୍ଟ କରାଯାଇଛି। ବରଂ ମିତ୍ର ରାଷ୍ଟ୍ରମାନଙ୍କ ସହ ମିଶି ଉକ୍ତ କଟକଣା ସବୁକୁ ଅଧିକ କଠୋର କରିବା ଲାଗି ବାଇଡେନ୍ ପ୍ରଶାସନ ବ୍ୟବସ୍ଥା କରିବ ବୋଲି ‘ସିଏନଏନ୍’ ରିପୋର୍ଟ କରିଛି।