ଜମି ବିକ୍ରି ଅନୁମତି ନମିଳିବାରୁ ଜୀବନ ହାରିଲେ ଦିବ୍ୟାଙ୍ଗ ଜଗଦୀଶ : ଜୀବନ ଯିବା ପରେ ଆରମ୍ଭ ହୋଇଛି ତନାଘନା, ନୂଆପଡ଼ା ସଦର ତହସିଲଦାର ନିଲମ୍ବିତ
କନକ ବ୍ୟୁରୋ: ନୂଆପଡା ତହସିଲରେ ଆତ୍ମହତ୍ୟା ଉଦ୍ୟମ କରିଥିବା ଦିବ୍ୟାଙ୍ଗ ଜଗଦୀଶ ଚୌହ୍ୱାନଙ୍କ ମୃତ୍ୟୁ ହୋଇଯାଇଛି । ଏହି ଘଟଣାରେ ନୂଆପଡା ତହସିଲଦାର ଦେବେନ୍ଦ୍ର ରାଉତଙ୍କୁ ନିଲମ୍ବିତ କରାଯାଇଛି । ଏଥିସହ ତହସିଲଦାର ଓ ଅତିରିକ୍ତ ତହସିଲଦାର ବିରୋଧରେ ମାମଲା ରୁଜୁ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ମିଳିଥିବା ସୂଚନା ଅନୁସାରେ ନିଜ ଜମି ବିକ୍ରି କରିବା ପାଇଁ ଦିବ୍ୟାଙ୍ଗ ଜଗଦୀଶ ବାରମ୍ବାର ସଦର ତହସିଲ ଅଫିସକୁ ଦୌଡି ଦୌଡି ନିରାଶ ହୋଇଥିଲେ । ହେଲେ ତହସିଲଦାର ତାଙ୍କୁ ନିଜ ଜମି ବିକ୍ରି କରିବା ପାଇଁ ଅନୁମତି ଦେଇନଥିଲେ । ଅସହାୟ ହୋଇ ଜଗଦୀଶ ଗତ ଗୁରୁବାର ଦେହରେ ନିଆଁ ଲଗାଇ ଆତ୍ମହତ୍ୟା ଉଦ୍ୟମ କରିଥିଲେ । ଗୁରୁତର ଜଗଦୀଶଙ୍କୁ ପ୍ରଥମେ ଜିଲ୍ଲା ମୁଖ୍ୟ ଚିକିତ୍ସାଳୟ ଓ ପରେ ବୁର୍ଲା ମେଡିକାଲକୁ ସ୍ଥାନାନ୍ତର କରାଯାଇଥିଲା । ବିଳମ୍ବିତ ରାତିରେ ବୁର୍ଲାରେ ଚିକିତ୍ସାଧିନ ଅବସ୍ଥାରେ ତାଙ୍କର ଦେହାନ୍ତ ପରେ ଗାଁକୁ ଆଣାଯାଇଥିଲା ମୃତଦେହ ।
ଜଗଦୀଶଙ୍କ ମୃତ୍ୟୁ ଖବର ପାଇ ନୂଆପଡା ପୁଲିସ ସାଇଟିଂଫିକ ଟିମ୍ ଓ ଡଗସ୍କ୍ୱାର୍ଡ ନେଇ ତହସିଲଦାର ଅଫିସରେ ତଦନ୍ତ କରିଥିଲେ । ଅନ୍ୟପଟେ ଗ୍ରାମବାସୀ ଓ ପରିବାର ଲୋକେ କ୍ଷତିପୂରଣ ଦାବି ପୂରଣ ନହେବା ଯାଏଁ ଅନ୍ତିମ ସଂସ୍କାର କରିବେ ନାହିଁ ବୋଲି ଅଡି ବସିଥିଲେ । ପରେ ପ୍ରଶାସନ ପକ୍ଷରୁ ଦିବ୍ୟାଙ୍ଗ ଜଗଦୀଶଙ୍କ ସ୍ତ୍ରୀଙ୍କୁ ଆରଏମଆରସିରେ ଚାକିରୀ, ପିଲାଙ୍କ ପାଠ ପଢା ପାଇଁ ସହାୟତା ଦେବା ସହ କ୍ଷତିପୂରଣ ଦେବାକୁ ପ୍ରତିଶ୍ରୁତି ଦିଆଯାଇଥିଲା । ଏହାପରେ ଜଗଦୀଶ ଚୌହ୍ୱାନଙ୍କ ଅନ୍ତିମ ସଂସ୍କାର କରାଯାଇଛି ।