କାହିଁକି ଗଲା ସାମ୍ବାଦିକଙ୍କ ଚାକିରି ? ଏବିପି ନ୍ୟୁଜରୁ ଇସ୍ତଫା ଦେବା ପରେ ପୁନ୍ୟ ପ୍ରସୁନ ବାଜପାୟୀଙ୍କୁ ନେଇ ସବୁଠି ଚର୍ଚ୍ଚା, ସଂସଦରେ ସରକାରଙ୍କୁ ଘେରିଲେ ବିରୋଧୀ
କନକ ବ୍ୟୁରୋ : କାହିଁକି ଗଲା ସାମ୍ବାଦିକଙ୍କ ଚାକିରି । ଏବିପି ନ୍ୟୁଜର ବରିଷ୍ଠ ସାମ୍ବାଦିକ ପୁଣ୍ୟ ପ୍ରସୁନ ବାଜପାୟୀଙ୍କ ଇସ୍ତଫା ପରେ ଏହାକୁ ନେଇ ସବୁଠି ଚର୍ଚ୍ଚା । ପୁଣ୍ୟ ପ୍ରସୁନ କରୁଥିବା ସୋ-ମାଷ୍ଟର ଷ୍ଟ୍ରୋକର ଭିଡିଓ କ୍ଲିପ୍ ସହ ସୋସିଆଲ ମିଡିଆରେ ଆସୁଛି ଘନଘନ ମତାମତ । ବିରୋଧୀ ଦଳ ଏହାକୁ ସାମ୍ବାଦିକଙ୍କ ମୁହଁ ବନ୍ଦ କରିବାର ପ୍ରୟାସ ବୋଲି ଅଭିଯୋଗ ହେଉଥିବା ବେଳେ ଗଣତନ୍ତ୍ରର ଚତୁର୍ଥ ସ୍ତମ୍ଭକୁ ନେଇ ହେଉଛି ଜୋରଦାର ଚର୍ଚ୍ଚା । ଆଉ ଏସବୁ ଭିତରେ ଏହି ସାମ୍ବାଦିକଙ୍କ ପରବର୍ତ୍ତୀ କାର୍ଯ୍ୟପନ୍ଥା ଉପରେ ରହିଛି ସମସ୍ତଙ୍କ ନଜର ।
Kanak News is now on WhatsApp
Join and get latest news updates delivered to you via WhatsApp
ଟିଭିରେ ହିନ୍ଦୀ ନ୍ୟୁଜ୍ ଦେଖୁଥିବା ଦର୍ଶକଙ୍କୁ ସାମ୍ବାଦିକ ପୁଣ୍ୟ ପ୍ରସୁନ ବାଜପାୟୀଙ୍କ ପରିଚୟ ଦେବା ହୁଏତ ଆବଶ୍ୟକ ନୁହେଁ । କାରଣ ଦେଶର ଜଣେ ଲୋକପ୍ରିୟ ସାମ୍ବାଦିକ ଭାବରେ ପରିଚିତ ପୁଣ୍ୟ ପ୍ରସୁନ ବାଜପାୟୀ । ଆଜତକ୍ ଛାଡି ଏବିପି ନ୍ୟୁଜରେ ଯୋଗ ଦେଇଥିବା ପୁଣ୍ୟ ପ୍ରସୁନ ସାମ୍ବାଦିକ ନିକଟରେ ଚାକିରିରୁ ଇସ୍ତଫା ଦେଇଛନ୍ତି । ଆଉ କୁହାଯାଉଛି କେନ୍ଦ୍ରର ମୋଦି ସରକାରଙ୍କ ଚାପ ଯୋଗୁଁ ସାମ୍ବାଦିକ ଜଣକ ଚାକିରି ହରାଇଛନ୍ତି ।
ଏବିପି ନ୍ୟୁଜରେ ରାତି ୯ଟାରେ ପ୍ରସାରିତ ହେଉଥିବା ପ୍ରସୁନ ବାଜପାୟୀଙ୍କ ସୋ’ ଗୁରୁବାର ଅଚାନକ୍ ବ୍ଲାକ୍ ଆଉଟ୍ ହୋଇଗଲା । ଟିଭି ପରଦାରେ ପ୍ରସୁନ ବାଜପାୟୀ ଆସିବା ବଦଳରେ ଆସିଲା ଏକ ଘୋଷଣା । କାରଣ ସେତେବେଳେ ଆଉ ପ୍ରସୁନ ବାଜପାୟୀଙ୍କ ସୋ’ ମାଷ୍ଟର ଷ୍ଟ୍ରୋକ୍ ଆଉ ଆସିନଥିଲା । ଆଉ ଏହା ପରେ ପରେ ଏବିପି ନ୍ୟୁଜ୍ ପକ୍ଷରୁ ରଖାଯାଇଥିଲା ଏକ ସ୍ପଷ୍ଟୀକରଣ । ଯେଉଁଥିରେ କୁହାଯାଇଥିଲା ଏବିପି ନ୍ୟୁଜ୍ ପାଇଁ ଏହା ହେଉଛି ଏକ କଳାଦିନ । ସାମ୍ବାଦିକଙ୍କୁ ନିଷ୍ଠାର ସହ କାମ କରିବା ପାଇଁ ବି ଦଣ୍ଡିତ କରାଯାଉଛି ।
ଆଉ ପୁଣ୍ୟ ପ୍ରସୁନ ବାଜପାୟୀଙ୍କ ଇସ୍ତଫା ପଛରେ ଥିଲା ଏହି ରିୟଲିଟି ଚେକ୍ । ଯାହା ମୋଦି ସରକାରଙ୍କୁ ହରଡଘଣାରେ ପକାଇଦେଇଥିଲା । ଛତିଶଗଡ଼ର ଜଣେ ମହିଳା ଯିଏ ମୋଦିଙ୍କୁ ନିଜ ଆୟ ଦୁଇଗୁଣ ବୃଦ୍ଧି ପାଇଲା ବୋଲି କହୁଥିଲେ । ତାହା ପଛରେ ସରକାରୀ ଚାପ ଥିଲା ବୋଲି ଖୋଦ୍ ସେହି ମହିଳା ଜଣକ ସ୍ୱୀକାର କରିଥିଲେ । କୁହାଯାଉଛି, ଏହି ଖବର କେନ୍ଦ୍ର ସରକାରଙ୍କୁ ଏତେ ଘାଇଲା କରିଥିଲା ଯେ, ମୋଦି ସରକାର ପ୍ରତିଶୋଧ ପରାୟଣ ହୋଇ ଉଠିଥିିଲେ । ଯାହାର ଫଳ ସ୍ୱରୁପ ଏବିପି ନ୍ୟୁଜର ପରିଚାଳନା ସଂପାଦକ ମିଲିନ୍ ଖଣ୍ଡେକର ଓ ଉପସ୍ଥାପକ ପୁଣ୍ୟ ପ୍ରସୁନ ବାଜପାୟୀଙ୍କୁ ଇସ୍ତଫା ଦେବାକୁ ପଡ଼ିଲା । ଏବଂ ଆଉ ଜଣେ ଉପସ୍ଥାପକ ଅଭିସାର ଶର୍ମାଙ୍କୁ ୧୫ ଦିନ ପାଇଁ ନିଲମ୍ବିତ ହେବାକୁ ପଡ଼ିଥିଲା ।
ଏହି ଖବର ପ୍ରଘଟ ହେବା ପରେ ଟ୍ୱିଟର ଏବଂ ଫେସବୁକ୍ ଭଳି ସୋସିଆଲ ମିଡ଼ିଆରେ ଆସିବାରେ ଲାଗିଲା ଘନଘନ ମତାମତ । ସାଧାରଣ ଜନତାଙ୍କଠାରୁ ଆରମ୍ଭ କରି ରାଜନୈତିକ ଦଳ ଗୁଡ଼ିକ ମଧ୍ୟ ଏହି ଘଟଣାକୁ ନେଇ ଆଲୋଚନା କରିଥିଲେ । ଯାହାର ପ୍ରଭାବ ଗୁଞ୍ଜରିତ ହୋଇଥିଲା ସଂସଦରେ । ଗଣମାଧ୍ୟମକୁ ଗଣତନ୍ତ୍ରର ଚତୁର୍ଥ ସମ୍ଭ କୁହାଯାଉଥିବା ବେଳେ ସାମ୍ବାଦିକଙ୍କ ମୁହଁ ବନ୍ଦ କରିବାର ପ୍ରୟାସ ହେଉଥିବା ବିରୋଧୀ ଅଭିଯୋଗ କରିଛନ୍ତି । ଆଉ ଏହି ଅଭିଯୋଗ ଯଦି ସତ ହୁଏ ତାହା ନିଶ୍ଚିତ ଭାବରେ ଭାରତର ଲୋକତନ୍ତ୍ର ପ୍ରତି ଏକ ଅଜଣା ସଂକଟ ମାଡି ଆସୁଛି ।