କନକ ବ୍ୟୁରୋ: ଅପରେସନ ପରେ ଜଗା ବଳିଆଙ୍କ ସ୍ୱାସ୍ଥ୍ୟବସ୍ଥା ସ୍ଥିର ରହିଛି । ଉଭୟଙ୍କ ସ୍ୱାସ୍ଥ୍ୟବସ୍ଥାରେ ସାମାନ୍ୟ ସୁଧାର ଆସିଛି । ତେବେ ବଳିଆ ଅପେକ୍ଷା ଜଗାର ସ୍ୱାସ୍ଥ୍ୟ ଭଲ ରହିଛି । ଜଗା ଧିରେ ଧିରେ ଗୋଡ଼ହାତ ହଲେଇବା ସହିତ ଆଖି ଖୋଲୁଥିବା ଏମ୍ସ ପକ୍ଷରୁ କୁହଯାଇଛି । ସେପଟେ ଜଗା ବଳିଆଙ୍କ ଆରୋଗ୍ୟ କାମନା କରି ବିଭିନ୍ନ ସ୍ଥାନରେ ପୂଜାର୍ଚ୍ଚନା ଚାଲିଛି । ବୁଧବାର ସକାଳ ପ୍ରାୟ ୯ଟାରେ ଆରମ୍ଭ ହୋଇଥିଲା ଜଗା ବଳିଆଙ୍କ ଦ୍ୱିତୀୟ ପର୍ଯ୍ୟାୟ ଅପରେସନ୍ । ଦୀର୍ଘ ୧୧ ଘଂଟା ପରେ ରାତି ପ୍ରାୟ ୮ ଟାରେ ଜଗା-ବଳିଆଙ୍କ ଯୋଡାମୁଣ୍ଡକୁ ଅଲଗା କରିଥିଲେ ଡାକ୍ତର । ଜଗା ବଳିଆଙ୍କ ଆଇସିୟୁରେ ଭେଂଟିଲେଟରରେ ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଏମ୍ସ ନ୍ୟୁରୋସର୍ଜନଙ୍କ ମତରେ ଏବେ ସବୁଠାରୁ ବଡ ଚ୍ୟାଲେଂଜ ହେଉଛି ସ୍ୱତନ୍ତ୍ର ଭାବେ ଦୁଇଟି ମସ୍ତିଷ୍କ କିପରି ପୃଥକ ପୃଥକ କାମ କରିବ । କାରଣ, ଜନ୍ମରୁ ଦୁଇଟି ଦୃଷ୍ଟିକୋଣରୁ ଉଭୟଙ୍କ ମସ୍ତିଷ୍କ ପରସ୍ପର ଉପରେ ନିର୍ଭରଶୀଳ । ଗୋଟିଏ ହେଉଛି, ମନସ୍ତାତ୍ତ୍ୱିକ ଭାବେ ପରସ୍ପର ସହ ନିର୍ଭରଶୀଳ ଏବଂ ଅନ୍ୟଟି ହେଉଛି, ଶାରୀରିକ ଭାବେ ମଧ୍ୟ ଗୋଟିଏ ମସ୍ତିଷ୍କ ଆଉ ଗୋଟିଏ ମସ୍ତିଷ୍କ ଉପରେ ନିର୍ଭରଶୀଳ । ଏବେ ଅଲଗା ହେବା ପରେ ଦୁଇଟି ମସ୍ତିଷ୍କ ସ୍ୱତନ୍ତ୍ର ଭାବେ କାମ କରିବାକୁ କିଭଳି ସକ୍ଷମ ହେବେ ତା ଉପରେ ଡାକ୍ତର ମାନେ ନଜର ରଖିଛନ୍ତି । ଏଥିସହ ଯୋଡାମୁଣ୍ଡରୁ ଅଲଗା ହେବା ପରେ ଦୁଇ ଜଣଙ୍କ ଶରୀର ବି କିଭଳି ଅଲଗା ଅଲଗା କାମ କରିବ ତା ଉପରେ ବି ନଜର ରହିଛି । ଏଭଳି ଜଟିଳ କେସରେ ଅପରେସନ ପରେ ମସ୍ତିଷ୍କର ମନସ୍ତତ୍ୱ ସଂପୂର୍ଣ୍ଣ ଭାବେ ବଦଳିଯାଏ । ପୂର୍ବରୁ ଦୁଇ ଶିଶୁଙ୍କ ମସ୍ତିଷ୍କ ପରସ୍ପର ଉପରେ ନିର୍ଭରଶୀଳ ଥିବା ବେଳେ ଅଲଗା ହେବା ପରେ ଜଣଙ୍କ ବିନା ଆଉ ଜଣଙ୍କ ମସ୍ତିଷ୍କ କିଭଳି ସଂଚାଳନ ହେବ ତାହା ହିଁ ସବୁଠାରୁ ବଡ ଚ୍ୟାଲେଂଜ ।
ଏମ୍ସ ଡାକ୍ତରଙ୍କ ମତରେ ଏହି ୨୭ ମାସର ଦୁଇ ଶିଶୁଙ୍କ ପାଇଁ ଆଗାମୀ ୧୫ ଦିନ ବହୁ ଗୁରୁତ୍ୱପୂଣ୍ଣ ରହିବ । ଏହି ସମୟ ମଧ୍ୟରେ ଦୁଇଟି ଶରୀର ଓ ଦୁଇଟି ମସ୍ତିଷ୍କ ସ୍ୱତନ୍ତ୍ର ଭାବେ କାମ କରିବାକୁ ସ୍ୱାଭାବିକ ଭାବେ ପ୍ରୟାସ କରିବେ ଏବଂ ଏଥିରେ ଉଭୟ ସକ୍ଷମ ହେବାର ମଧ୍ୟ ଯଥେଷ୍ଟ ସମ୍ଭାବନା ରହିଛି । ତେବେ ଅପରେସନ ପରେ ଜଗାର ହାର୍ଟ ଓ ବଳିଆର କିଡନୀରେ ସମସ୍ୟା ଦେଖାଯାଇଛି । କାହିଁକି ନା ବଳିଆର ରକ୍ତସଂଚାଳନ ଜଗା ଦେହରେ ଅଧିକ ପରିମାଣରେ ହେଉଥିବାରୁ ହାର୍ଟ ଉପରେ ଚାପ ପଡିଥିଲା । ସେହିପରି ଅଧିକ ପରିମାଣର ଔଷଧ ବଳିଆ ଦେହକୁ ଯାଇଥିବାରୁ ବଳିଆର କିଡନୀରେ ସମସ୍ୟା ଦେଖାଦେଇଛି ।
ତୃତୀୟ ପର୍ଯ୍ୟାୟରେ ଚର୍ମ ଆବରଣ ଭିତରେ ଥିବା ମସ୍ତିଷ୍କର ଅଂଶକୁ ଖପୁରୀ ଆବରଣ ଦିଆଯିବ । ଏହା ସହ କୃତ୍ରିମ ଶିରାପ୍ରଶିରା ମାଧ୍ୟମରେ ମସ୍ତିଷ୍କକୁ ରକ୍ତ ସଂଚାଳନକୁ ସ୍ୱାଭାବିକ କରାଯିବ । ସେପଟେ ହୃତପିଣ୍ଡ, ଫୁସଫୁସ ଏବଂ କିଡନୀକୁ ସ୍ୱଭାବିକ ରକ୍ତ ସଂଚାଳନ ଉପରେ ଡାକ୍ତର ଗୁରୁତ୍ୱ ଦେବେ । ଏହାପରେ ଜଗାବଳିଆଙ୍କ ଏକ ଦୀର୍ଘ ମିଆଦୀ ଚିକିତ୍ସା ଜାରି ରହିବ ।